Bhela Samhita · Chapter 1.15

prāṇaiṣaṇā syāt prathamā dvitīyā tu dhanaiṣaṇā /
dharmaiṣaṇā tṛtīyā tu puruṣasya bhavatyatha //

tatra prāṇaiṣaṇāṃ pūrvaṃ samāpadyeta mānavaḥ /
dharmārthakāmaprāptirhi sadbhiḥ prāṇaiḥ prapadyate //

dharmadīnāmavāptiś ca puruṣārthaḥ paraḥ smṛtaḥ /
tasmāccharīraṃ prayataḥ parirakṣeddhi śāstrataḥ //

dhanaiṣaṇāṃ dvitīyāṃ tu samāpadyeta mānavaḥ /
pāpīyo nāstyataḥ kiñcidyathā jīvannṛte dhanāt //

dharmakāmau na saṃpīḍya tasmād vittamupārjayet /
jvararogādikā yena nirasyedāpado budhaḥ //

dharmaiṣaṇāṃ tṛtīyāṃ tu samāpadyeta mānavaḥ /
avaśyamādhigantavyā dehabhede varā gatiḥ //

prāṇādyanuparodhena tasmād dharmaṃ caredbudhaḥ /
trivargānuparodhena tatprāptirhi nare hitā //

ity etāssammatā loke vyākhyātāstisra eṣaṇāḥ /
yathoktāstāḥ prayuñjānaḥ paratreha ca modate //

upastambhās tu catvāro yadāhāraś caturvidhaḥ /
śarīre ca balaṃ caiva malaṃ tebhyaḥ prajāyate //

śarīramātmano marma malamātmabalaṃ punaḥ /
rogās tasyātivṛddhyāṃ ca vātapittakaphātmakāḥ //

malaṃ tu rogo bhavati vaiṣamyaṃ dhātubhir gataiḥ /
malāc cāpy eti vaiṣamyaṃ tasmāt tamabhinirharet // ity āha bhagavān ātreyaḥ /
iti bhele pañcadaśo ' dhyāyaḥ // // ṣoḍaśo ' dhyāyaḥ // athāto vātakalākalīyaṃ vyākhyāsyāma iti ha smāha bhagavān ātreyaḥ /