Bhela Samhita · Chapter 1.13

kasmin janapade rogāḥ ke bhavantyadhikā iti /
gurdālubhekinā pṛṣṭo vyācacakṣe punarvasuḥ //

matsyānnabhojino nityaṃ prācyāḥ syuḥ kaphapittanaḥ /
ślīpadaṃ galagaṇḍaṃ ca prāyaśasteṣu dṛśyate //

nadītoyagatān matsyān bhakṣayanti samudrajān /
prāyaśaḥ kuṣṭhikāstena manuṣyā dakṣiṇādiśi //

masūrayavagodhūmatilakoddālasevinaḥ /
bhūyiṣṭhamarśasāstena kāmbhojādantajāḥ smṛtāḥ //

māṃsakāmāḥ surākāmāḥ strīkāmāssāhasapriyāḥ /
prīcyāstena bhūyiṣṭhaṃ dṛśyante rājayakṣmiṇaḥ //

tīkṣṇoṣṇāni hi bāhlīkāḥ prāyeṇānnāni bhuñjate /
abhiṣyandīni māṃsāni pānakāny audakāni ca //

prakṛtyā cāpy abhiṣyaṇṇāḥ pārvatopatyakāssadā /
tena bāhlīkadeśeṣu prāyo vyādhirbalāsakaḥ //

meghe ' varṣati varṣāsu hemante yatra varṣati /
ṛtuvyāpattisamaye janamāraḥ pravartate //

tatropavāsī dhṛtimān rato viprābhivādane /
mantrauṣadharataś cāpi janamārāt pramucyate //

sūryopatāpātsahasā varṣānte pittamīryate /
śaradi prāyaśastena jvaro bhavati dehinām //

gavāṃ ca cāraṇākhyaś ca catuṣpācchvāpadeṣu ca /
indrajālaś ca matsyeṣu śakunānāṃ pramīlakaḥ //

citrakassarvadhānyeṣu davo mūlaphaleṣu ca /
hastināṃ pākalaś caiva jvara ity abhidhīyate //

utkarṇakastathāśveṣu tejassarvāmayeṣu ca /
sarvatra vasati hyeṣa eṣa cāntaka ucyate //

taṃ dhūmaketuṃ pratyakṣaṃ kṣipraṃ praśamayejjvaram /
asātmyaṃ gandhamādāya vāto yatrātivījyate //

tatra martyeṣu sāmānyaḥ pratiśyāyaḥ pravartate /
tathā batālikā nāma piṭakā cāsya jāyate //

kakṣāyāmūrumūle ca pāṇipādataleṣu ca /
kaṇṭhe vā śrotramāśrity a vastau vā hṛdaye ' pi vā //

tvaramāṇaścikitseta pravṛddhā mārayennaram /
pittaśleṣmasamutthānā vātaśoṇitmūrcchitā //

batāliketi tāmāhuryatnavāṃs tatra jīvati /
ity etatsamyaguddiṣṭaṃ sarvaṃ yadyac ca coditam /
ṛṣibhyaḥ paripṛcchadbhyaḥ praśnajātaṃ yathākramam // ity āha bhagavān ātreyaḥ /
iti bhele trayodaśo ' dhyāyaḥ // // caturdaśo ' dhyāyaḥ // athātaḥ cikitsāprābhṛtīyaṃ vyākhyāsyāma iti ha smāha bhagavān ātreyaḥ /