Bhela Samhita · Chapter 1.12

ātreyaḥ khaṇḍakāpyaś ca maitreyo ' nye ca tadvidhāḥ /
rasasaṃkhyākathāṃ cakrurvane caitrarathe dvijāḥ //

tatra kaścidrasaikatvaṃ rasasāmānyato ' bravīt /
sātmyāsātmyāttathā dvitvaṃ traividhyaṃ sthānato ' pare //

svādurasvāduramṛdurmṛduśceti catuṣṭayam /
mahābhūtavibhāgena pañcetyāhustathāpare //

tadetad evaṃ jānīyādyathoktādeva kāraṇāt /
ṣaṭtvaṃ saptatvamathavā brūyustadrucibhedataḥ //

madhuro lavaṇāmlau ca kaṣāyakaṭutiktakāḥ /
kṣāraś ca tān rasān sapta nātirekaṃ samācaret //

rasātisevanājjantussadyo mṛtyumavāpnuyāt /
bhaveyurvyādhayaś cāsya rasavyāsaṅgasaṃbhavāḥ //

vṛttarohitarājībhiḥ vṛttākṣaśśakalī tathā /
matsyaścilicimo nāma kūle carati vāriṇaḥ //

taṃ matsyaṃ varjayed ekaṃ dugdhenānyāṃs tu bhakṣayet /
payasā bhakṣyamāṇas tu nararaktaṃ pradūṣayan //

raktavyāpattijānvyādhīn mṛtyuṃ cāpi sa yacchati /
śvāvidvarāhaṃ caikatra payasā parivarjayet //

vanyamūlaphalāhārastadvidhena viruddhyate /
aśnīyātpayasā yas tu sadyo mṛtyumavāpnuyāt //

bhaveyurvyādhayaś cāsya śaṅkharogagalagrahāḥ /
madhunā gorasenāpi likucaṃ na ca bhakṣayet //

bādhiryaṃ vā ' pyathāndhyaṃ vā mṛtyuṃ vā bhakṣayan vrajet /
kapotān sarṣapairbhṛṣṭān payasā na tu bhakṣayet //

majjāvyāpattijān vyādhīnprāpnuyāddhi tathā param /
payasā sarpadaṣṭassan khādyaissiddhyati tādṛśaiḥ //

krimijā vyādhayaś cāsya dṛśyante yadi jīvati /
iha yā strī pumāṃś caiva hitajīrṇamitāśanau //

anudāvartinau caiva syātāṃ garbhastayoḥ khalu /
balavān varṇavāṃś caiva cakṣuṣmāṃś ca bhavatyatha //

viparyaye vartamānau viparītamiharcchataḥ /
ajīrṇe tvaśanaṃ yasya jīrṇe cānaśanaṃ bhavet //

sa tathobhayathā rogān dāruṇān prāpyān naraḥ /
tasmājjīrṇe ca pathyāś ca mātrāvanto ' virodhinaḥ /
sarva eva rasā bhojyāḥ yuktyā saṃvṛtadhātubhiḥ // ity āha bhagavān ātreyaḥ /
iti bhele dvādaśo ' dhyāyaḥ // /
/trayodaśo ' dhyāyaḥ // athāto janapadavibhaktīyaṃ vyākhyāsyāma iti ha smāha bhagavān ātreyaḥ /