Bhela Samhita · Chapter 1.11

āhāraṃ praghasaṃ nẏṇām upayuktaṃ caturvidham /
pacyamānaṃ dvidhā kāye koṣṭhe rasamalākhyayā //

svedamūtraśakṛdrūpairniṣkrāmati malaḥ punaḥ /
annasya pākatastejo raso nirvartyate nṛṇām //

rasādraktaṃ tato māṃsaṃ māṃsānmedastato ' sthi ca /
asthno majjā tataḥ śuklaṃ śuklād garbhasya saṃbhavaḥ //

evaṃ pūrvātparaṃ yāti dhātuṃ dhāturyathākramam /
mātrāpathyaṃ yadā bhuktaṃ rasarūpaṃ gataṃ punaḥ //

kuryānna rogān dīptāgneḥ rasavyāpattisambhavān /
śoṇitādyātmatāṃ gacchet pariṇāmavaśāṃ tadā //

yasmin vyāpadyate dhātau tasmin vyādhīn karotyatha /
viṣūcikāṃ sālasakāṃ pittadāhaṃ vilambikām //

anyedyuṣkaṃ satatakaṃ tṛtīyakacaturthakam /
pittaṃ lohitapittaṃ ca raktārśāṃsi pralepakam //

vipāṭikāṃś ca tān vyādhīn rasavyāpattijān viduḥ /
kacchūṃ carmadalaṃ pāmāṃ carmakīlaṃ vicarcikām //

vyaṅgavīsarpakuṣṭhāni raktavyāpattijānviduḥ /
māṃsakīlārbudaṃ gaṇḍamajakāṃ jātulāni ca //

pūtimāṃsālajīś caiva māṃsavyāpattijān viduḥ /
daurgandhyaṃ svedanaṃ sthaulyaṃ pipāsāṃ bahunidratām //

pramehān viṃśatiṃ cāpi medovyāpattijānviduḥ /
dantarogo nakhaśmaśrukeśaromābhipātanam //

ativṛddhis tathā vāsthnāmasthivyāpattijān viduḥ /
vidāhaṃ ca madaṃ caiva sonmādaṃ cāpatānakam //

tamodarśanamūrchāyau majjāvyāpattijān viduḥ /
retaḥ kṣārāgnimañjiṣṭhānīlahāridrakaṃ pṛthak //

mehane bhasmavarṇaṃ ca śuklavyāpattijānviduḥ /
narasya strīsvaratvaṃ vā strī vāpi puruṣasvarā //

āmagarbhacyutirvāpi garbhavyāpattijānviduḥ /
ity ete āmajā nẏṇāṃ viruddhādhyaśanātmakāḥ /
viruddhāśanavarjī syādetadārogyam uttamam // ity āha bhagavān ātreyaḥ iti bhele ekādaśo ' dhyāyaḥ // // dvādaśo ' dhyāyaḥ // athātaḥ ātreyakhaṇḍakāpyīyaṃ vyākhyāsyāma iti ha smāha bhagavān ātreyaḥ /