Bhargava Tantra · Chapter 14

// caturdaśo'dhyāyaḥ //
[vivāhotsavanirūpaṇādhyāyaḥ]
[pāṇigrahaṇotsavaprayojanaṃ vidhiṃ ca varṇayituṃ agastyasya prārthanā]
agastyaḥ
kathaṃ nu devadevīyaṃ pāṇigrahaṇamaṅgalam/
tatkārayitvā kiṃ bhūyāt tanmahyaṃ brūhi bhārgava

[udvāhotsavasya phalakīrtanam]
śrīrāmaḥ
devena saha devīnāṃ śayane parikalpite/
nodvāhakarma kurvīta tatkuryādanyathā yadi

sarvakalyāṇasampattirāyurvṛddhiśca jāyate/
abhipretārthasiddhiḥ syāddevīkalyāṇakāriṇām

naśyanti sarvaduḥkhāni pāpaiścāpi na lipyate/
dhanaṃ dhānyaṃ ca labhate pāṇigrahaṇakarmakṛt

[vivāhotsavakrame aṅkurārpaṇadinam]
udvāhadivasātpūrvam aṅkurārpaṇamācaret/
[devasya devyāśca kalyāṇamaṇḍape ānayanam]
kalyāṇe'hani kartavyaṃ pṛthakkaustukamaṅgalama

devaṃ devīṃ ca bhūṣādyairambaraiḥ kusumādibhiḥ/
prasādhayitvā śibikāmāropya gṛhadhāma ca

pradakṣiṇīkṛtya devau nayetkalyāṇamaṇḍapam/
[aṅkurārpaṇavidhinirūpaṇam]
viṣvaksenaṃ samārādhya karmavighnośāntaye

aṅkurāṇyarpayet sadyo yadvodvāhe prasannadhīḥ/
brahmādidevānārādhya pālikāsvapi pañcasu

bījapātraṃ samādāya namasyāmi diśāṃ patīn/
iti prārthya samāsīno `yā jātā' iti vidyayā

iti bījāni saṃjaptvā bījāvāpaṃ samācaret/
madhye tu brahmajajñānaṃ yata indraḥ purandare

yo'sya koṣṭhyaṃ yamadiśi `imaṃ me varuṇe'bhavet/
somo dhenuṃ tathā some bījāvāpassakṛdbhavet

tūṣṇīṃ dviranyai ṛtvigbhistūṣṇīṃ nyasanamucyate/
`mūrdhānami'ti mantreṇa mṛdbhirācchādya deśikaḥ

`imaṃ me varuṇe'tyeva secayecchuddhavāribhiḥ/
[devasya devyāśca haste kautukabandhaprakāraḥ]
puṇyāhapūrvaṃ kṛtvaivaṃ kuryātkautukabandhanam

saptavāraṃ pratisara'mastramantre'ṇa mantritam/
`tryambakena' ṛcālipya candanakṣodavāriṇā

`viśvettāte'ti mantreṇa haste devasya dakṣiṇe/
bandhayet sva-svamantreṇa devīnāmitare kare

[rakṣāvidhiḥ]
spṛṣṭvā dakṣiṇahastena `yo brahme'tyabhimantrayet/
`bṛhatsāme'ti mantreṇa rakṣā syāddhūpabhasmanā

trikṛtvaḥ praṇameddevaṃ `puṇḍarīkākṣa'vidyayā/
[śubhikābandhanavidhiḥ puṣpamālikābandhanavidhiścaḥ]
ullikhyāgniṃ pratiṣṭhāpya `śubhike śira'ityṛcā

śubhikāṃ bandhayenmūrdhni dampatīnāṃ yathākramam/
`yāmāharadi'ti ṛcā bandhayetpuṣpamālikām

pādaprakṣālanaṃ viṣṇoḥ tathā trīni padeti ca/
`mayi maha' iti mantreṇa ātmānamabhimarśayet

[pāṇigrahaṇavidhinirūpakakrame prokṣaṇaprakāraḥ]
tatastu mṛṇmaye pātre sākṣate puṣpasaṃyute/
arhaṇāyāmbunāpūryaṃ gṛhṇīyātkarayordvayoḥ

`arhaṇīyā āpa' iti prārthya devaṃ tataḥ param/
`āmāganni'ti mantreṇa japetpātrāmbudeśikaḥ

haste tu devadevasya `virojo doha' ityṛcā/
ninīya nītamudakaṃ `samudraṃ' veti coccaran

prokṣayetkūrcamādāya gāṃ ca dadyāttadā hareḥ/
`yuvaṃ vastreti' mantreṇa vastreṇācchādayeddharim

[yajñopavītakalpanaṃ pādayoḥ akṣatārpaṇañca]
yajñopavītamantreṇa yajñasūtraṃ prakalpayet/
`irāvatīti'mantreṇa pādayorakṣatārpaṇam

[madhuparkanivedanāpośanakramaḥ]
madhuparkaṃ svarṇapātre gṛhītvā taṃ triruccaran/
`trayyai' `āmāgannita' ca dvābhyāṃ tamabhimantrayet

`amṛtopastaraṇama'sītyāpośanamatha smṛtam/
`yanmadhune'ti ca japan madhuparkaṃ nivedayet

`amṛtādhāna'mantreṇa punarāpośanaṃ matam/
[govisarjanaprakāraḥ]
gāṃ pradarśyātha haraye `gaurgau`ra'sīti vidyayā

praṇavo caṃ cikituṣe iti gāmabhimantrayet/
`omutsṛjata'ityuktvā gāṃ visṛjya tato guruḥ

[annanivedanakramaḥ]
`bhūtaṃ seti' vadan dhīmān annaṃ tasmai nivedayet/
`oṃ kalpayata' ityuccaiḥ brūyāddeśikasattamaḥ

[bhagavate devyāḥ dānaprakāraḥ]
tato nūtanavastreṇa paridhāya `yuvāsviti'/
divyairābharaṇairmālyairalaṅkṛtya śriyaṃ bhuvam

prāṇānāyamya saṃkalpya dātā bhūṣaṇabhūṣitām/
svagotranāmakathitāṃ devīmudakapūrvakam

suvarṇorvīyutāṃ dadyāt viṣṇave ca svayaṃbhuve/
kanyāṃ kanakasampannāṃ sarvābharaṇabhūṣitām

dāsyāmi viṣmave tubhyaṃ brahmalokajigīṣayā/
ityuktvā dakṣiṇaṃ hastaṃ gītavāditranisvanaiḥ

`devasya tveti' mantreṇa tāṃ guruḥ paramātmanaḥ/
arpayeddakṣiṇe haste sahiraṇyodakaṃ karam

praṇavonātha yuñjīta devena kamalāṃ bhuvam/
tataḥ pāṇigṛhītāyāḥ devyā devasya mūrdhani

`dhravaṃ teti' prakīryante kusumānyakṣatānyapi/
`abhrātṛdhnīmiti' ṛcaṃ japtvā paścāt svayaṃbhuve

`aghoracakṣuṣā' devīṃ darśayetkalaśodbhava/
kartavyānyapi karmāṇi pālanīyāstathā prajāḥ

āvābhyāmiti saṃkalpastayostaṃ ca vicintayet/
darbhaṃ saṃgṛhya tadanu japannidamahaṃ tviti

bhruvormadhyena saṃspṛśya prācyāṃ diśi visarjayet/
tato`jīvāṃ rudantīti' japtvā vedavido dvijān

`vyukṣakrūrami'ti śrutyā snānīyāya niyojayet/
`aryamna' iti mantreṇa darbheṇa valayaṃ śriyaḥ

`nidhāya khena sa' iti yugacchidraṃ niveśayet/
`śaṃ te hiraṇyam' ityuktvā svarṇaṃ chidre pidhāya ca

dvijāhṛtadalairdevīm abliṅgābhiśca pañcabhiḥ/
snāpayitvā'gnimūrdheti' plotavastreṇa mārjayet

`paritvā' `gīrvaṇā' dvābhyāṃ vastrābhyāṃ chādanaṃ śriyaḥ/
`dvādaśākṣaramantreṇa' namaḥ praṇavavidyayā

suvarṇaṃ bandhayetkaṇṭhe sarvamaṅgalasaṃyutam/
`āśāsāna saumanasam' iti yoktraṇa bandhayet

[udvāhahomaprakāraḥ]
udvāhahomaṃ kurvīta uttarāśāmukho guruḥ/
paristīrya yathānyāyaṃ purastāt tantramācaret

samidbhiścaruṇā cājyairhoma udvāhakarmaṇi/
samidbhirājyairjuhuyāt `devyāḥ sūktena' ṣoḍaśa

caruṇā `viṣṇugāyatryā' caturviṃśāhutirbhavet/
`śrīsūktastu' śriyo devyāḥ `bhūsūkta'stu bhuvo bhavet

anyāsāṃ yadi devīnāṃ tāsāṃ mūlena ṣoḍaśa/
[lājāhomaprakāraḥ prāyaścittāhutyādiprakāraśca]
tataḥ `puruṣasūktena' lājahomaṃ samācaret

analaṃ triḥparikramya lājaśeṣaṃ sakṛdguruḥ/
juhuyātpraṇaveṇāgnau `pañca vāruṇikaiḥ' punaḥ

prāyaścittāhutiṃ hutvā dvādaśākṣaravidyayā/
pūrṇāhutividhānaṃ syāt brāhmaṇānapi bhojayet

toṃṣayitvāthadeveśaṃ devīṃ cābhyarcya deśikaḥ/
puṇyāhaṃ vācayetpaścāt madhuparkaṃ nivedayet

nīrājayettadāśīśca piṇḍikākṣepaṇaṃ tathā/
[vivāhotsavakrame dainandinakṛtyam]
pratyahaṃ bhojayedviprān snāpayecca yathāvidhi

utsavaṃ cānvahaṃ kuryāt prātaḥ sāyaṃ yathāvidhi/
agnau ca juhuyānnityaṃ sandhyayorubhayorapi

pālikādevatāssarvāḥ pūjayedanvahaṃ guruḥ/
[vivāhotsavakrame caturthadinakṛtyam]
caturthe'hani samprāpte turyayāme yathāvidhi

udvāhaśeṣahomaṃ tat kārayetkamalāpateḥ/
sarpiṣā `dampatīmantraiḥ' kuryādaṣṭottaraṃ śatam

prāyaścittāhutiṃ kuryāt `pañcopaniṣadā' punaḥ/
pūrṇāhutiṃ tataḥ kuryāt `mūlamantreṇa' deśikaḥ

sailādipūgaṃ tāmbūlaṃ praṇavena nivedayet/
tāmbūlaṃ dakṣiṇāṃ cāpi brāhmaṇebhyaḥ pradāpayet

[vivāhotsavakrame pañcamadinakṛtyam]
pañcame divase tailābhyaṃgaṃ tayorbhavet/
mahāhavirnivedyātha kārayedutsavaṃ mahat

[itarāsāṃ devīnāṃ vivāhavidhiḥ]
udvāhānantaraṃ devaṃ devīsahitamarcayet/
devīnāmitarāsāṃ ca vivāhavidhirīdṛśaḥ