Bhargava Tantra · Chapter 15

// pañcadaśo'dhyāyaḥ //
[vividhapratiṣṭhāvidhinirūpaṇādhyāyaḥ]
[vidhyādidevānāṃ vimānādīnāṃ ca pratiṣṭhākramaviṣayakaḥ praśnaḥ]
agastyaḥ
vidhirudrārkasutrāmukuberādyamṛtāśinām/
tārkṣyavighneśasarpendracaṇḍādyamalasūriṇām

vimānamaṇḍapādīnāṃ balipīṭhādikasya ca/
ghaṇṭākṣamālāyānānāṃ devīnāṃ ca viśeṣataḥ

prabhāpadmāsanādīnāṃ pādukāyāśca bhārgava/
vāpīkūpataṭākānāṃ pratiṣṭhā kīdṛśī prabho

[vividhapratiṣṭhākrame sāmānyaviṣayāḥ]
śrīrāmaḥ
śṛṇu vakṣye muniśreṣṭha pratiṣṭhā vividhā api/
aṅkurārpaṇamārabhya kriyāḥ pūrvaṃ yathā tathā

[svatantraparatantrapratiṣṭhayoḥ kumbhasaṃkhyādivicāraḥ]
svātantrye navakuṃbhāḥ syurekakuṃbhaḥ paratra cet/
vardhanyaiva mahākuṃbhasthāpanaṃ sarvakarmasu

āvāhanaṃ mahākuṃbhe pratiṣṭhā yasya kārayet/
upakuṃbhāṣṭake kuryādindrādīnāṃ samarcanam

ekasminneva kuṇḍe syāddhavanaṃ nānyathā bhavet/
tattannāma catuthyaiva mantroddhāraṃ samācaret

[vāhanādipratiṣṭhākrame viśeṣaḥ]
praṇavādinamontaṃ syādarcanaṃ vāhanādiṣu/
svāhāntaṃ havane mantraḥ pratiṣṭhotsavakarmasu

snapanaṃ navabhiḥ kuṃbhairnānyathā parikalpayet/
mṛtivastukacitrāṇāṃ snapanaṃ darpaṇe bhavet

devīnāṃ tu śriyādīnāṃ viśeṣaḥ kiñciducyate/
prāgbhāge kamale kuṇḍhe śriyamāvāhya pūjayet

dvāre caṇḍīṃ pracaṇḍīñca viṣvaksenapade punaḥ/
sumukhīṃ sthāpayeddhīmān kuṃbheṣu navasu kramāt

mahākuṃbhe'rcayeddevīṃ pratiṣṭhāpya svanāmataḥ/
sudarśanaṃ ca karake prāgādyaṣṭasu sa kramāt

vāgīśvarī kriyā kīrtirlakṣmīḥ sṛṣṭistathaiva ca/
prahvī satyā tathā brāhmī yaṣṭavyāḥ kalaśeṣvimāḥ

anyatsarvaṃ yathāpūrvaṃ viśeṣo nāsti kaścana/
āyudhanyāsayajanaṃ viṣṇorekasya kīrtitam

[vimānamaṇḍapādīnāṃ pratiṣṭhākrame viśeṣaḥ]
vimānamaṇḍapādīnāṃ viśeṣamavadhāraya/
nṛsūktarūpiṇaṃ devaṃ dhyātvā nārāyaṇaṃ harim

chāyāsnapanamādarśe sakūrce parikalpayet/
śayanaṃ ca mahāvedyāṃ kūrcadvārā samācaret

`agnirme vāci' mantreṇa kūrcaṃ spṛṣṭvābhimantrayet/
mahākubhe ca kuṇḍe ca viṣṇugāyatriyā guruḥ

āvāhya pūjayeddhomaṃ tathā kalaśasaṃbhava/
samidbhirājyaiścarubhistilairhutvā yathākramam

mahāvyāhṛtibhirhutvā saṃpātājyeta secayet/
anyatsarvaṃ yathāpūrvamevaṃ vai maṇḍapasya ca

[balipīṭhapratiṣṭhākrame viśeṣaḥ]
balipīṭhāni sarvāṇi sākṣāttoye'dhivāsayet/
snāpayecca yathānyāyyaṃ sthāpayeddhānyarāśiṣu

dhyānamāvāhanaṃ cāpi homaścāpi vimānavat/
oṃ bhūtebhya nama iti mahāpīṭhamanurbhavet

anyeṣāmevamovohyaṃ pīṭhānāṃ parikalpane/
[dhvajapratiṣṭhāyāṃ viśeṣaḥ]
dhvajastaṃbhapratiṣṭhāyāṃ devatā tu khageśvaraḥ

na dṛṣṭimokṣaṇaṃ tatra tathā prāsādapīṭhayoḥ/
nyāsahome tu samprāpte vimānavadihācaret

[vedyāḥ pratiṣṭhākrame viśeṣaḥ]
vedyāṃ śayanamapyevaṃ snānaṃ cāmbvadhivāsanam/
balipīṭhavidhānoktamanyat sarvaṃ yathāpuram

[pādukāyāḥ ghaṇṭāyāśaaca pratiṣṭhākrame viśeṣaḥ]
pādukāyāśca ghaṇṭāyāḥ balipīṭhakriyā bhavet/
pādukādevatā śeṣaḥ ghaṇṭāyāḥ kamalālayā

[mahānasapratiṣṭhāyāṃ viśeṣaḥ]
mahānasapratiṣṭhāyāṃ lakṣmīṃ tatra niveśayet/
culyā madhye tu dhātāraṃ vidhātāraṃ tu pṛṣṭhataḥ

[dvāradevatāpratiṣṭhāyāṃ viśeṣaḥ]
dharmādharmadvayaṃ sthāpyaṃ savye savyetare tathā/
caṇḍapracaṇḍau tad‌dvāre śiṣṭaṃ karma vimānavat

[vāpīkūpādīnāṃ pratiṣṭhāyāṃ viśeṣaḥ]
vāpīkūpataṭākānāṃ varuṇo devatā bhavet/
aṅkurārṇyarpayitvādau kumbhasthāpanamācaret

kautukaṃ bandhayetkumbhe kūrcena śayanaṃ bhavet/
tattvābhimantraṇaṃ homo vimānavidhinā bhavet

jalādhivāsanaṃ naiva tathā nayanamokṣaṇam/
sarvamanyadvidhātavyaṃ pratiṣṭhāsamaye guruḥ

gaṅgādyāḥ saritastatra mantrairāvāhayejjale/
mahākuṃbhajalaṃ tatra varuṇarcāniyojayet

[akṣamālāpratiṣṭhākrame viśeṣaḥ]
akṣamālāpratiṣṭhāyāṃ gomūtre tvadhivāsayet/
pañcagavyena saṃkṣālya padmapatre niveśayet

puṇyāhavāribhiḥ prokṣya kuṅkumenānulepayet/
śālipīṭhe vinikṣipya `agnirme'tyabhimantrya ca

viṣṇuśaktirbhaveddevī manuraṣṭākṣaro bhavet/
prokṣaṇādikriyāṃ sarvāṃ yathāvidhi samācaret

[dhūpādīnāṃ pratiṣṭhākrame viśeṣaḥ]
dhūpasya devatā vahnirdīpasya ca divākaraḥ/
chatracāmaravādyānāṃ puṇyāhaprokṣaṇaṃ bhavet

[caṇḍādidevānāṃ hetīnāṃ ca pratiṣṭhākrame viśeṣaḥ]
caṇḍādidevatānāṃ ca hetīnāṃ ca jagadguroḥ/
indrādīnāmiva bhavet viśeṣo nāsti kaścana

[bhaktabimbapratiṣṭhāvidhiḥ]
bhaktabimbapratiṣṭhāyāṃ kuryātpratisarāṅkure/
vivāhoktena vidhinā kumbhamekaṃ samarcayet

ekasminneva kurvīta kuṇḍe homādi pūrvavat/
na homo na balistīrthaṃ na dhvajārohaṇakriyā

mṛgayā ca jaladroṇī na bhaktotsavakarmaṇi/
[rathādiyānapratiṣṭhāyāṃ viśeṣaḥ]
rathādiyānajātasya devatā vihagādhipaḥ

kumbhamekaṃ samabhyarcya kuṇḍe vā sthaṇḍile'pi vā/
mūrtihomamanuṣṭhāya prokṣayetkuṃbhavāriṇā

[gṛhārcāpratiṣṭhākramaḥ tatphalañca]
gṛhārcāsthāpane sarvaṃ pratiṣṭhākarma pūrvavat/
gṛhavaṃśarddhikṛddevaḥ sadanasthāpito hariḥ

[mandire devasthāpanaphalam]
mandire sthāpito devaḥ pālayedbhuvanatrayam/
// iti bhārgavatantre pañcadaśo'dhyāyaḥ //