Bhargava Tantra · Chapter 13

// trayodaśo'dhyāyaḥ //
[maṇḍalalpanapūrvakapuṣpayāgavidhinirūpaṇādhyāyaḥ]
[maṇḍalakalpanāt pūrvaṃ bhagavataḥ ārādhanam]
śrīrāmaḥ
prabhātāyāṃ triyāmāyām āditye'bhyudite guruḥ/
nirvartya niyamān svīyān bhaktairbhāgavataiḥ saha

ālayābhyantaraṃ gatvā saṃpūjya ca yathāvidhi/
samāpya balidānāntam ācāryo maṇḍapāntera

[maṇḍalavedikākalpanaprakāraḥ]
cakrābjaṃ varttayeddhīmān vakṣyamāṇena vartmanā/
āyāmasama vistāraivedikāṃ parikalpayet

pañcabhirvā caturbhirvā hastairdṛśyāṃ manoharām/
gomayābhyobhirālipya kuryāddarpaṇasannibhām

[maṇḍalakalpanārthaṃ sūtrapātavidhiḥ]
prāñci tiryañci sūtrāṇi daśa sapta ca pātayet/
ṣaṭ pañca dve ca koṣṭhāni santi madhye'tha ṣaṭtriṣu

[karṇakādipañcakṣetravibhāgakramaḥ]
madhye śaṅkuṃ sthāpayitvā bhrāmayitvātha pañcadhā/
bhuvaṃ vibhajya sūtreṇa madhyamaṃ karṇikāpadam

dvitīyaṃ kesaradalaṃ nābhīnāṃ parikalpane/
tṛtīyaṃ ca turīyaṃ ca dve cārakṣetramucyate

pañcamaṃ nemibhūreṣāṃ bahiḥ koṣṭhāni mārjayet/
[maṇḍaladvārakṣetrakalpanaprakāraḥ]
tridhā tadvibhajetkṣetraṃ sūtrabhramaṇavartmanā

karṇiṃkākṣetramānane sūtrapātaṃ caturdiśa/
tathākṛte caturdikṣu dvārakṣetraṃ bhaviṣyati

[maṇḍale dvādaśābjanirmāṇasthānanirdeśaḥ]
pratyāvaraṇabhūbhāge dvādaśābjāni kalpayet/
koṇe koṇe bhavedekaṃ dve dve valajapārśvayoḥ

[maṇḍalakoṇeṣu pāñcajanyakalpananirdeśaḥ]
caturṣvapi ca koṇeṣu bahirāvaraṇatrayāt/
pāñcajanyaṃ suruciraṃ kalpayecchāstravittamaḥ

[karṇikākṣetre dvādaśabindukalpananirdeśaḥ]
kalpayetkarṇikākṣetre bindudvādaśakaṃ budhaḥ/
[maṇḍale abjasya kesarādipadanirmāṇaprakāraḥ]
sūtrabhramaṇamārgeṇa dvitīyaṃ vibhajetttridhā

prathamaṃ kesarapadaṃ dvitīyaṃ dalabhūrbhavet/
tṛtīyaṃ nābhivalayaṃ kesarān navatissaṣaṭ

dvādaśāmbujarekhāśca dalabhūmau prakalpayet/
digvidigbhāgakalitāścatatro viṃśatistathā

[maṇḍale arakalpanaprakāraḥ]
ekīkṛtya dvayaṃ kṣetramararekhāḥ prakalpayet/
aradvayaṃ vidikṣu syāt ekaikaṃ dikṣu kalpayet

ambhojadalatulyāni nīlotpalanibhāni ca/
maṇḍalaṃ śobhayetpañcavidhairvarṇairyathākramam

[maṇḍale varṇakalpanārthamupādānadravyāṇi]
śālipiṣṭairgandhacūrṇaiḥ śvetavarṇo haridrayā/
pītavarmastu yājñīyairaṅgārairnīlamucyate

yājñīyaiśca dalaiścūrṇaiḥ śyāmalo varṇa īritaḥ/
kuṅkumaireva raktaṃ syādevaṃ pañcavidhaḥ smṛtaḥ

[abjakarṇikādīnāṃ varṇakalpanavivekaḥ]
karṇikāṃ pītavarṇena bandūn śuklena kalpayet/
pāṭalaiḥ karṇikārekhāḥ kṛṣṇaiḥ kesarabhūtalam

dvidhā kṛtvā pūrvabhāgaṃ śvetairbhāgamathottaram/
pītairagre'rjunairbindūn raktaiśca dalakoṭiṣu

ādyantayostu patrāṇāṃ sitairaktaiśca śobhanam/
dalāntavalayaṃ raktaiḥ bhūṣayedathavārjunaiḥ

śyāmena bhūṣayennābhimasitenārabhūtalam/
arāṇi raktavarṇena tadantavalayaṃ sitaiḥ

asitairnemivasatiṃ sitairnemyantabhūtalam/
prathamāvaraṇaṃ kṛṣṇairdvitīyāvaraṇaṃ sitaiḥ

tṛtīyāvaraṇaṃ raktaiḥ padmāni ca yathāpuram/
raktapītāsitasitairdvārāṇīndrādidik‌kramāt

śaṅkhānarjunavarṇena madhyarekhāruṇāmatā/
[cakramaṇḍalasya varṇakalpanaprakāraḥ]
śvetaiḥ raktaiśca pītaiśca syāmaiḥ kṛṣṇaiśca pañcabhiḥ

varṇairvā kālakusumaiḥ rañjayeccakramaṇḍalam/
[maṇḍale bhagavataḥ ārādhanam anujñāyācanañca]
maṇḍalaṃ citrayitvaivaṃ prokṣya puṇyāhavāriṇā

bhadrapīṭhaṃ nyasedasmin tasmin devaṃ niveśayet/
ardhyapādyādibhirdevamarcayitvā praṇamya tam

bhagavan puṇḍarīkākṣa sarvalokeśvara prabho/
prītaye'nuṣṭhitaste'dya dhvajapūrvo mahotsavaḥ

mayā ca yajamānena ṛtvigbhiḥ sādhakairapi/
tatra nyūnātirekābhyāṃ duṣkṛtaṃ yadi jāyate

taddoṣaśāntaye puṣpairyaṣṭumicchāmi samprati/
anujānīhi māṃ deva pūrayasva kriyāmapi

iti vijñāpya deveśaṃ prārabhetkusumārcanam/
[maṇḍale tattaddevānām ārādhanasthānavidhinirdeśaḥ]
`dvādaśākṣara'varṇeśān binduṣu dvādaśasvapi

karṇikāyāṃ vāsudevamāvāhyābhyarcanaṃ tataḥ/
ardhyaṃ pādyaṃ tathācāmaṃ snānaṃ vastropavītakam

gandhaṃ puṣpaṃ bhūṣaṇaṃ ca upacārā nava smṛtāḥ/
pratyakṣaraṃ ca kusumairarcayetkalaśodbhava

aṅgāni hṛdayādīni kusumairañjalisthitaiḥ/
phalaṃ bhavatu me puṣpairnama ityantamuccaran

bhūṣaṇāni tatoddiśya śrīvatsaprabhṛtīni ca/
sudarśanādyāyudhāni puṣpaibhyarcanaṃ caret

kesareṣu śriyādyaṣṭau tathā puṣpaissamarcanam/
tato dvādaśaśaktīśca yajeta dalabhūmiṣu

dalāntavalaye śaktīrvyāptyādyāstāssamarcayet/
nābhibhāge'rvayedviṣṇumāvāhya kusumairbudhaḥ

viṣṇvādīn dvādaśāreṣu kusumaiḥ paripūjayet/
arāntavalaye devān matsyādīn nemibhūtale

śaṅkhādīnyāyudhānyaṣṭau prathamāvaraṇe bahiḥ/
keśavādīn dvādaśābje dvitīyāvaraṇāmbuje

vāsudevādayo'bhyarcyāstṛtīyāvaraṇe tathā/
ādityā dvādaśārādhyā padmeṣu dvādaśasvapi

pūrvadvāre khageśānaṃ dakṣiṇe tu sudarśanam/
gadāmapāṃpatidvāre some śaṅkhaṃ samarcayet

[maṇḍale bhagavataḥ puṣpārcanavidhiḥ]
tataḥ `puruṣasūktena' tathā `nārāyaṇena'ca/
`pañcopaniṣadai'rmantrairdevasya caraṇāmbuje

puṣpārcanaṃ prakurvīta dhūpadīpau pradarśayet/
vedaiścāpi tathā sāṅgaiḥ stotrayejjagadīśvaram

annaṃ nivedayettasmai pāyasādicaturvidham/
[maṇḍalārcanakrame homavidhiḥ]
āgneye havanaṃ kuṇḍe sthaṇḍile vā mahānase

samidājyacaruprāyaiḥ śatamaṣṭottaraṃ bhavet/
`mūlena' juhuyādagnau pūrṇāhutyavasānakam

[maṇḍalasthadevodvāsanādikramaḥ]
pradakṣiṇaṃ praṇāmaṃ ca kṛtvā stutvā śriyaḥ patim/
maṇḍalasthān samudvāsya prathamāvaraṇaṃ nayet

sevārtham āgatāndevān sthānaṃ gantuṃ niyojayet/
anyāṃśca mānavān sarvān parikramya pradakṣiṇam

nityairabhyantaraissārdhaṃ satataṃ nityasevakaiḥ/
mandirābhyantaraṃ devaṃ ninayeddeśikottamaḥ

[mahotsavānte guroḥ sammānanam]
evaṃ mahotsavaṃ kṛtvā sampūjya gurumṛtvijaḥ/
alaṅkṛtya viśeṣeṇa manaḥ prāhlādanairdhanaiḥ

taṃ guruṃ yānamāropya sarvamaṅgalasaṃyutam/
grāmaṃ pradakṣiṇīkṛtya tad‌gṛhaṃ prāpayetprabhuḥ

[mahotsavaphalaśrutiḥ]
evaṃ mahotsavaṃ kurvan iha sarvatra modate/
paratra ca viśeṣeṇa kiṃ vā bhūyāditaḥ param

aśvamedhasahastrāṇi vājapeyāyutāni ca/
aptoryāmārbudaṃ kṛtvā yat phalaṃ jāyate nṛṇām

anena sarvaṃ devasya makhena bhavati dhruvam/
kevalaṃ devadevaṃ taṃ sevatāṃ ca mahotsave

phalamiṣṭaṃ karatale bhavatyeva na saṃśayaḥ/
kiṃ punastatra yuktānāṃ kaiṅkaryaniratātmanām