Bhāratamañjarī 6-19 · Chapter 9

iti kṣemendraviracitāyāṃ bhāratamañjaryāṃ karṇaparva
Śalyaparvan
nārāyaṇaṃ namaskṛtya naraṃ caiva narottamam /
devīṃ sarasvatīṃ vyāsaṃ tato jayamudīrayet

evaṃ jambha ivendreṇa hate karṇe kirīṭinā /
yuddhaṃ nyavedayadrājñe punarabhyetya saṃjayaḥ

śekhare sarvavīrāṇāmarthināṃ kalpapādape /
hate vaikartane rājansarvāśārajanīkṛti

tadātmanā gate kvāpi nijajīva ivākulaḥ /
duryodhano nirucchvāso mene śūnyā diśo daśa

cacāra rathināṃ madhye pāṇḍavānyoddhumudyataḥ /
pareṇaiva śarīreṇa paralokagato naraḥ

tato drauṇigirā kṛtvā śalyaṃ senāpatiṃ nṛpaḥ /
raṇaṃ vitara(?)rājyārthe viveśa tridaśālayam

rathānāmayutaṃ sāgraṃ tāvadeva ca dantinām /
lakṣyadvayaṃ dvayānāṃ ca tisraḥ koṭyaḥ padātinām

sainyaśeṣamabhūdetatkururājasya saṃgare /
ator'dhaṃ pāṇḍavānāṃ ca hataśeṣamabhūdbalam

asminnāyodhane ghore rājñāṃ saṃhāramaṇḍale /
mastiṣkakardamaluṭhatpattisyandanakuñjare

ākīrṇavaktrakamale raṅgodbhaṅgarathāṅgake /
visrastārājaṃsaughe khaṅgakhaṇḍotpalākule

keśaśevālajambālaśeṣakīlālapicchile /
akālakālakariṇā sarasīva viloḍite

srastavarāśvakarṇāṅke bhagnabāṇāsanāvṛte /
kadalīśakalālole vane vajrairivāhate

utpalāvayavāpūrṇavyaktaśaktyāsavodite /
udyāna iva kālasya kapālacaṣakākule

punaḥ pravṛtte samare śalyahārdikyasauvalāḥ /
viviśuḥ pāṇḍavacamūṃ kṛpadrauṇisuyodhanāḥ

pārthapārṣataśaineyadraupadeyaśikhaṇḍinaḥ /
jaghnustrigartagāndhārakapināthavarūthinīḥ

amaryāde raṇe tasminkṣībā iva mahārathāḥ /
kruddhā yuyudhire ghoraṃ hatabandhusuhṛdgaṇāḥ

satyasenaṃ suṣeṇaṃ ca citrasenaṃ ca karṇajam /
jaghāna nakulo vīrānkarṇatulyaparākramān

tataḥ śalyena balinā gajeneva sarojinī /
mṛdyamānā sanirghoṣā cakampe pāṇḍuvāhinī

śalyena ripuśalyenā vadhyamānāṃ varūthinīm /
dṛṣṭvā bhīmo gadāpāṇirbhīmakopastamādravat

sa hatvā gadayā tasya rathaṃ rathaśatacchidaḥ /
mumūrṣordaṇḍamudyamya tasthau kāla ivāgrataḥ

ādāya madrarājo 'pi gadāṃ cāmīkarāṅgadām /
bhīmaṃ bhīmabalaḥ kopāddarpoddhatamayodhayat

maṇḍalāni carantau tāvabhipatya parasparam /
ghātajātasphuliṅgābhyāṃ gadābhyāmabhijaghnatuḥ

tayormūrcchitayoḥ kṣipraṃ mohātpatitayorbhuvi /
sānugāstūrṇamājagmuḥ saṃrabdhāḥ kurupāṇḍavāḥ

saṃjñāmavāpya sahasā yathāvatsthitayostayoḥ /
duryodhanamukhā vīrāḥ pārthamukhyānayodhayan

brahmalokābhikāmeṣu yudhyamāneṣu rājasu /
suyodhanaścekitānamavadhīdbhūbhujāṃ varam

madrarājastataḥ kruddhaḥ pāṇḍūputrānsahānugān /
avārayadbalādekaḥ pūjyamāno nabhaścaraiḥ

śastravṛṣṭiṃ tadutsṛṣṭāṃ chittvā bāṇairasaṃbhramaḥ /
muhurtādvidadhe śalyastānadṛśyānpatatribhiḥ

chādite śarajālena sainye madramahībhujā /
kruddho 'vadhītsahasre dve rathānāṃ dharmanandanaḥ

dṛṣṭvānugānhatānrājñā śalyo yudhi yudhiṣṭhiram /
śilīmukhaśataiḥ pūrṇamathāśokamivākarot

pīḍite dharmatanaye nakulaḥ kopakampitaḥ /
bhīmasātyakimukhyāśca śaraiḥ śalyamavākiran

tataḥ śarāndhakāreṇa sthagayanbhuvanodaram /
unmamāthaḥ ghanadhvānaḥ śalyaḥ pārthavarūthinīm

ākulaḥ samare tasmiñjiṣṇurdraiṇimayodhayat /
duryodhanaṃ bhīmaseno nakulaḥ subalātmajam

kṣapitāśeṣanṛpateḥ śalyasyātha yudhiṣṭhiraḥ /
chittvāyudhāni sarvāṇi tilaśo vidadhe ratham

aparaṃ rathamāsthāya madrarājaḥ krudhā jvalan /
cakāra dharmatanayaṃ kṛttacāparathadhvajam

bhīmaseno 'tha virathaṃ dṛṣṭvā rājānamākulaḥ /
cakarta madrarājasya rathaṃ sarvāyudhaiḥ saha

khaḍgahastastataḥ śalyo nighnansyandanakuñjarān /
cacārālakṣitatanurmargairgaruḍavikramaḥ

atha jvālāyamānena śoṇapaṭṭena guṇṭhitām /
bhrājiṣṇuratnakhacitāṃ mṛtyordantāvalīmiva

etadantaṃ kurubalaṃ yuddhamevaṃvidhaṃ kutaḥ /
itīva ghaṇṭāpaṭalaiḥ krośantīmaśanisvanām

yudhiṣṭhiraḥ sahasraghniṃ dīptāṃ ṣaṇmukhavikramaḥ /
prāhiṇonmadrarājāya śaktiṃ śaktimatāṃ varaḥ

sa tayā bhinnahṛdayaḥ papāta kṣmābhṛtāṃ varaḥ /
śrotranāsāsyavivarasravadrudhiranirjharaḥ

***** śalyavadhaḥ || 1 || *****
śalye hate kauravāṇāmāśā śeṣāvalambane /
rathino dudruvuḥ sarve bhagnamānamanorathāḥ

tataḥ śalyānujaḥ kruddho vicitrakavacābhidhaḥ /
abhyāyāyau dharmarājaṃ dārayantamanīkinīm

pṛṣatkavarṣiṇastasya citraratnojjvalaṃ śiraḥ /
rohaṇādrerivottuṅgaṃ śṛṅgaṃ ciccheda dharmajaḥ

tasminhate bhajyamānāṃ nāthahīnāṃ patākinīm /
parāvṛtya kṛpadrauṇihārdikyāstūrṇamāyayuḥ

nadadbhiścedipāñcālairlabdhalakṣyairmahārathāḥ /
te muhūrtaṃ yuyudhire prayātā bahutāmiva

tataḥ svāmivadhāmarṣādyudhiṣṭhiramabhidrutān /
hatvā śeṣānaho madrānamadrāṃ pṛthivīṃ vyadhāt

atha bhīmo gadāpāṇirnipuṇaḥ kṣayakarmasu /
niṣpiṣya mlecchānsarvāṃśca raṇaṃ śūnyamivākarot

tataḥ sātyakinā vīre satyarāje nipātite /
svayaṃ duryodhano 'bhyetya pāṇḍuputrānayodhayat

na ratho na gajo nāśvo na yodhaḥ pāṇḍaveṣvabhūt /
haimanāmāṅkitairvyāpto yo na duryodhaneṣubhiḥ

cakampe kuñjarakulaṃ tasya nārācavarṣiṇaḥ /
maṇikāñcanajhāṅkāratāramaurvīravairmuhuḥ

duryodhane yudhyamāne labdhalakṣyairarātibhiḥ /
āyayurdraiṇihārdikyasuśarmakṛpasaubalāḥ

ghore raṇavyatikare teṣāṃ nibiḍapātinām /
nirāloko 'bhavalloko rajasā saṃvṛte ravau

kuñjarendrataṭāghātakṣame rajasi duḥsahe /
vibhāgo nābhavatkaścitkalpāpāya ivāgate

kva drauṇiḥ kva ca gāndhāraḥ kva ca rājā suyodhanaḥ /
ityabhūdvipulaḥ śabdaḥ pāṇḍusenāsu sarvataḥ

tasminmuhūrte pralayāvartasaṃkrāntagocare /
jaghāna mārutasutaḥ śeṣānduryodhanānujān

mahābāhuṃ bhūribalaṃ jaitraṃ durdarśanaṃ śalam /
sunādaṃ ca sa hatvā tānunnanāda kṣayocitān

tato māmagrahīdvīraḥ sātyakirvinarale raṇe /
saṃjayo 'yaṃ mayā labdho nigadyeti sasaṃbhramam

athārjunaḥ suśarmāṇaṃ saputraṃ sapadānugam /
hatvā saṃśaptakānīkaṃ niḥśeṣaṃ viśikhairvyadhāt

dyūte raṇābhidhe tasminsāyakākṣānkṣipanmuhuḥ /
sahadevor'dhacandreṇa jahāra śakuneḥ śiraḥ

***** śakunivadhaḥ || 2 || *****
ulūkaṃ tatsutaṃ hatvā gāndhārāṇāmanīkinīm /
jaghāna mādrītanayo vanavāsadaśāṃ smaran

atha niḥśeṣite sainye śrānto nihatavāhanaḥ /
apasṛtya raṇātprāyātpadbhyāṃ rājā suyodhanaḥ

kṛtavarmakṛpadrauṇiśeṣe tasminmahāraṇe /
kṣaṇādaśeṣatāṃ yāte bhūtavetālamaṇḍale

dhṛṣṭadyumnasya vacasā māṃ nihantuṃ samudyate /
śaineye bhagavānvyāso rarakṣa karuṇānidhiḥ

tato dinānte śokārtaḥ prasthito 'haṃ suyodhanam /
apaśyaṃ vajrahṛdayaṃ prayāntaṃ cakravartinam

sa pādacārī māṃ dṛṣṭvā lajjākuṭilakandharaḥ /
ūce saṃjayarājānaṃ brūyāstvaṃ janakaṃ mama

tena karṇena suhṛdā taiśca vīrairvinā kṛtaḥ /
hradaṃ praviṣṭaḥ putraste hīno duḥśāsanādibhiḥ

māmityuktvā sa saṃstambhya salilaṃ daityamāyayā /
hradaṃ viveśa vipulaṃ prauḍhaśokānalākulaḥ

taṃ stambhitorusalile sarasi praviṣṭaṃ jñātvā girā mama gurostanayaḥ kṛpaśca /
bhojaśca bhūpatiśikhāmaṇilīḍhapādaṃ lakṣmīvilāsasadanaṃ śuśucustametya

akṣauhiṇīparivṛto 'tha visṛjya gehaṃ rātrau yuyutsumakhilaiḥ saha rājadāraiḥ /
dharmātmajastamṛṇaśeṣamiva pradadhyau duryodhanaṃ saha dhanaṃjayabhīmamukhyaiḥ

yatpādapadmanakhacandramarīcimālā mālā iva kṣitibhṛtāṃ babhuruttamāṅge /
so 'pyeka eva kururājasutaḥ padātiryāto dhigāsthiravilāsavikāsi daivam

yasyā vaśādbata natonnatabhāñji bhāvacakrāṇi hanta viśarārudaśāṃ viśanti /
saṃkrandanāni yativibhramamudritāni tasyai namo 'stu satataṃ bhavitavyatāyai