Bhāratamañjarī 6-19 · Chapter 18

iti śrīkṣemendraviracitāyāṃ bhāratamañjaryāṃ mahāprasthānikaṃ parva
Svargaparvan
nārāyaṇaṃ namaskṛtya naraṃ caiva narottamam /
devīṃ sarasvatīṃ vyāsaṃ tato jayamudīrayet

tataḥ svargaśriyā juṣṭaṃ bhrājiṣṇumukuṭāṅgadam /
dadarśa śakrasaṃkāśaṃ kururājaṃ yudhiṣṭhiraḥ

taṃ vīkṣya sānujaṃ tatra jātamanyuḥ śatakratum /
uvāca svasti devebhyaḥ svargāyāstvayamañjaliḥ

yatra duryodhanaḥ pāpaḥ pṛthivīkṣayakāraṇam /
sumerukūṭavikaṭe vibhāti paramāsane

na tatra mama vāso 'sti vrajāmyeṣa namo 'stu te /
yatra me bhrātaraḥ śūrāstatra vāso mamādhunā

iti rājño bruvāṇasya devadūtaṃ surāstataḥ /
bhrātṝnprati prayāhīti prāhurvāyumanojavam

sa devadūtādiṣṭena vrajansapadi vartmanā /
dadarśa puruṣānghorānnarakāntaravartinaḥ

keśaśoṇitamāṃsāsṛgvasāsaṃghātapicchile /
praklinnānekakuṇapavyākīrṇakṛmisaṃkule

kākakaṅkabakolūkavadanairabhito vṛte /
śavadurgandhanīrandhrasaṃghaṭṭaśatasaṃkule

karapattraśilāpākasaṃtaptasikatātaṭe /
lohitailavasākumbhakūṭaśalmalidāruṇe

kṣurakaṇṭakakīlograjvālāstambhavibhīṣaṇe /
taptavaitaraṇīvisrapūyapūritasaikate

asipatravanotkṛttanaranārīkṛtasvane /
ghorāndhakāragahane tatra śuśrāva dharmajaḥ

pāpināṃ kvāthyamānānāmākrandaṃ dhṛtidāruṇam /
kṣaṇamekamito rājanmā nivartasva śītalaiḥ

tvatpuṇyavātaiḥ spṛṣṭānāmasmākaṃ bādhate tamaḥ /
vayaṃ bhīmaprabhṛtayaḥ pāṇḍavā bhrātarastava

kṛṣṇā ceyaṃ varārohā mahiṣī vallabhā satī /
śrutvaitatkaruṇaṃ rājā vajreṇeva vidāritaḥ

tatraiva tasthau nirdvandvo nindandurlalitaṃ vidheḥ /
so 'vadadbata devānāmavicārahataiva dhīḥ

yaireta dharmaniratāḥ kleśe 'sminsamupekṣitāḥ /
ayaṃ mohaḥ prasādo vā viveko nāyamīdṛśaḥ

vibudhānāṃ na jānanti ye dharmasya vyatikramam /
bhramaḥ svapno 'tha māyeyaṃ kimetaditi cintayan

devadūta na jānāmi kasyedaṃ durviceṣṭate /
ihaivāhaṃ sthito gaccha na me svargeṇa kāraṇam

pūjyante yatra durvṛttā viśasyante nu sādhavaḥ /
ityukto dharmarājena devadūtaḥ surādhipam

gatvā vyajijñapatsarvaṃ sa ca tūṣṇīṃ samāyayau /
prāpte surādhipe tatra saha dharmādibhiḥ suraiḥ

nādṛśyatāśubhaṃ kiṃcidvavau puṇyaśca mārutaḥ /
tato 'bravītsurapatirviṣṇaṃ dharmanandanam

asatyametannāyeyaṃ mayaiveha pradarśitā /
etadālokanaṃ rājñāmavaśyaṃ miśrakarmaṇām

asatyaleśasaṃsparśādetaddroṇavadhāttava /
ehi paśya nijānbhrātṝndivyaṃ svapadamāśritān

svargaśriyaṃ ca pāñcālīṃ putrāṃścāmaratāṃ gatān /
ityukte devarājena vītaśokī yudhiṣṭhiraḥ

snātvā dharmagirā svargagaṅgāmbhasi nabhaḥprabhe /
utsṛjya mānuṣaṃ bhāvaṃ puṇyāṃ surasabhāṃ yayau

apsaronṛttalalitāngāyangandharvakiṃnarān /
tatra svapadamārūḍhānapaśyadanujānnijān

maṇḍale ca raveḥ karṇaṃ svayamindreṇa darśitam /
abhibhanyuṃ ca rucirākāranirjitamanmatham

varcobhidhānaṃ somasya taṃ sutaṃ somamaṇḍale /
gandharvarājaṃ sākṣācca dhṛtarāṣṭraṃ janeśvaram

vasuṃ śāntanavaṃ bhīṣmaṃ guruṃ droṇaṃ bṛhaspatim /
nārāyaṇaṃ ca viśveśaṃ śaṅkhacakragadādharam

yadaṃśā bhuvi ye jātāstāṃśca dṛṣṭvā tadāśrayān /
āsasāda sadānandaṃ vandyaṃ nandanavāsinām /
dharmasūnurnidhirdhāmnāṃ hariścandrocitaṃ padam

atha nahuṣadilīpadhundhumārasagarabhagīratharāmakārtavīryaiḥ /
nṛpatibhirabhito 'bhivandyamānaḥ sitacaritaḥ sa rarāja rājacandraḥ

śrutveti bhāratakathāṃ vaiśampāyanakīrtitām /
saṃpannasarpasatro 'bhūnnirvṛtto janamejayaḥ

etatsūtena kathitaṃ naimiṣāraṇyavāsinaḥ /
niśamya śaunakamukhāstasthurānandanirbharāḥ