Bhāratamañjarī 6-19 · Chapter 16

iti śrīkṣemendraviracitāyāṃ bhāratamañjaryāmāśramavāsikaṃ parva
Mausalaṃ parvan
nārāyaṇaṃ namaskṛtya naraṃ caiva narottamam /
devīṃ sarasvatīṃ vyāsaṃ tato jayamudīrayet

mahīṃ mahībhṛtāṃ dhurye dharmarāje praśāsati /
ṣaḍviṃśe 'bde mahābhāgā dvārakāṃ munayo yayuḥ

tāndṛṣṭvā kauśikamukhānpraharṣanmadaviplutāḥ /
sāmbaṃ kṛtvā vadhūveśaṃ papracchurvṛṣṇipuṃgavāḥ

api putraḥ sutā vāsyā bhaviṣyati munīśvarāḥ /
tacchrutvā te 'vadannasyāḥ kulamṛtyurbhaviṣyati

musalaṃ brahmadaṇḍākhyamityuktvādarśanaṃ yayuḥ /
lauhaṃ sāmbastato 'sūta musalaṃ vajrasaṃhatam

tadāhvako bhayātpiṣṭvā tūrṇaṃ tatyāja sāgare /
sarvajño jñātavṛttānto vṛṣṇikṣayamupasthitam

vijñāya kaiṭabhārātistīrthayātrārasādyayau /
caṇḍāṃśumaṇḍaloccaṇḍaṃ tataścakraṃ suradviṣaḥ

ratho dhvajaśca sauvarṇaḥ sahasāntaradhīyata /
atha mārjāravicchāye kabandhāvṛtamaṇḍale

sūrye vighaṭṭitāśeṣadiktaṭe vāti mārute /
muṇḍo viṭaṅkavadano yādavānāṃ gṛhe gṛhe

saṃdarśya vadanaṃ prāyādvācānviṣṭo 'pyadṛśyata /
cītkārapuruṣaḥ śabdaḥ śārikānāṃ gṛheṣvabhūt

gṛdhragomāyunādena rājamārgau'pyapūryata /
viparītā prasūtiśca paśūnāmabhavattadā

kośeṣu kanakābandhe ratnāni svayamasphuṭan /
teṣu ghoranimitteṣu jāteṣvapyaviśaṅkitāḥ

babhūvurvṛṣṇayo bhānti na hi nāśeṣu buddhayaḥ /
prabhāsamatha saṃprāpte kṛṣṇe yādavavṛṣṇayaḥ

tameva deśamabhyetya cakrire vipulotsavam /
udyāneṣu vicitreṣu vijahnustatra te sukham

gītanṛtyarasāsaktāḥ kalitāḥ kālacakṣuṣā /
āpānakelisaṃsakte tato vṛṣṇikule 'bhavat

vivāde yuddhasaṃbaddhaḥ śaineyakṛtavarmaṇoḥ /
hārdikyaṃ sātyākiḥ prāha suptahā sauptiko bhavān

sa tamūce tvayā prāyagato bhūriśravā hataḥ /
evaṃ vivādātsaṃgrāmasteṣāmāsītsudāruṇaḥ

prāktasmādvajramusalātprajātairvallarīcayaiḥ /
tṛṇamapyabhavattatra brahmadaṇḍamadotkaṭam

kṣayāya musalībhūtaṃ sahasāndhakavṛṣṇiṣu /
yā bhūdāpānabhūsteṣāṃ lalanānayanotsavaḥ

saiva mṛtyorabhūddhorasaṃhārāhāramaṇḍapaḥ /
sāmbe gade cārudoṣṇi pradyumne kṛtavarmaṇi

aniruddhe ca śaineye nihate paśyato hareḥ /
vṛtte vṛṣṇikṣaye ghore strīśeṣā yādave kule

dvārakā prarurodeva cchinnahārāśrunirjharaiḥ /
tataḥ śaurirhaladharaṃ draṣṭuṃ duḥkhākulo vrajan

dārukaṃ tatkathayituṃ prāhiṇotsavyasācine /
yoṣitāṃ dasturakṣāyai babhrumādāya keśavaḥ

gatvā janakamāmantrya rauhiṇeyamupāyayau /
athāpaśyanmukhāttasya niḥsṛtaṃ madhusūdanaḥ

sahasraśīrṣaṃ bhujagaṃ śvetaṃ śvetācalopamam /
vāsukipramukhairnāgairatha pratyudyataiḥ saha

dṛṣṭvārṇavaṃ praviṣṭaṃ taṃ varuṇenārcitaṃ punaḥ /
gatijñaḥ sarvabhūtānāṃ na śuśoca janārdanaḥ

bhave hyabhāvasadbhāve bhāvānāṃ sthiratā kutaḥ /
anantadhāmni milite balabhadre sakānane

praviśya yogī suṣvāpa nibaddhaprāṇadhāraṇaḥ /
taṃ svajyotiṣi saṃsaktaṃ lubdhako mṛgaśaṅkayā

jaghāna niśitāgreṇa śareṇa caraṇodare /
kṛṣṇaśāradhiyā kṛṣṇo lubdhakeneṣuṇā hataḥ

nārāyaṇākhyamaviśatparaṃ dhāma sanātanam /
surasiddharṣigandharvaiḥ pūjyamāne saha śriyā

viṣṇuṃ praviṣṭe govinde babhūva kṣubhitaṃ jagat /
atrāntare dārukena kathite yādavakṣaye

śokaṃ trāsaṃ ca dainyaṃ ca bhejire pāṇḍavāḥ param /
tato yudhiṣṭhiragirā dvārakāṃ śvetavāhanaḥ

dārukenaiva sahitaḥ prayayau śokamūrcchitaḥ /
sa prāpa yādavapurīmapadmāmiva padminīm

vṛṣṇisiṃhairvirahitā guhāṃ haimavatīmiva /
kaṣṭairariṣṭanicayaiḥ spṛṣṭāṃ duḥkhādvilokya tām

draṣṭuṃ viveśa śokārtaṃ janakaṃ kaṃsavidviṣaḥ /
tārapralāpamukharairvṛtaṃ vṛṣṇivadhūjanaiḥ

ṣoḍaśastrīsahasrāṇi kalatraṃ kamalāpateḥ /
saubhadrajanako dṛṣṭvā mumoha bhayavihvalam

śayānaṃ bhuvi pārtho 'pi vasudevaṃ pralāpinam /
vilokya śokavivaśo vajrabhinna ivāpatat

kva rāmaḥ kva ca govindaḥ kva pradyumnaḥ kva sātyakiḥ /
aho vidherduranteyaṃ śaktirityarjuno 'vadat

maṇikaṅkaṇajhāṅkārinṛttagītaghanadhvaniḥ /
aviśrāntamabhūdyatra śravaṇānandanirjharaiḥ

tatraiva vṛṣṇinārīṇāṃ śṛṇvannārodanadhvanim /
niśāṃ nināya bībhatsurnirapāyamayīṃ śriyam

tataḥ prātaḥ priyasuto vasudevaḥ priyāṃ tanum /
tatyāja devakīmukhyairanuyāto vadhūjanaiḥ

tataḥ sāttvatamukhyānāṃ sarveṣāṃ śokavihvalaḥ /
pārthaḥ śarīraṃ saṃskṛtya cakāra salilakriyām

vajrābhidhānaṃ kṛṣṇasya pautraṃ kuntīsutastataḥ /
ādāya vṛṣṇikāntāśca pratasthe dārukānugaḥ

atha dvāravatīṃ sphārataraṅgabhujamaṇḍalaiḥ /
śaṅkhāṭṭahāsavikaṭo jahāra makarākaraḥ

hate vṛṣṇipure kṣipraṃ ratnalobhādivābdhinā /
puruṣānugataṃ sarvamityūce duḥkhito janaḥ

kalatraṃ vṛṣṇisiṃhānāmādāya śvetavāhanaḥ /
indraprasthaṃ vrajanprāpa durgamāṃ vikaṭāṭavīm

dasyavastatra gopālā balinaḥ paśujīvinaḥ /
adṛṣṭapūrvāḥ svaryoṣitsubhagāḥ sāttvatāṅganāḥ

taḍittaralaratnāṃśupuñjaritāmbarāḥ /
vilokya lobhavaśagā hartumabhyudyayurbalāt

gopānāpatitāndṛṣṭā tānugralaguḍāyudhān /
gāṇḍīvadhanvā gāṇḍīpamadhijyamakarotkrudhā

kālaśaktihatasyāpi tasyāpi kṣapitadviṣaḥ /
na śaktirabhavatkācitkṣīṇeṣorjyāvikarṣaṇe

cāpayaṣṭiranāyattā tasyābhūdatiduḥkhagā /
vṛddhasyeva daridrasya taruṇī rūpiṇī vadhūḥ

tasya kopāgnitaptasya vṛthā bhrūbhaṅgakāriṇaḥ /
bhṛtyā ivāvinītasya babhūvuravaśāḥ śarāḥ

te divyāstragaṇāḥ kvāpi jagmurutsṛjya taṃ mṛdhe /
guṇasaṅgāmanādṛtya dhūrtā mitramivādhanam

sa niḥśaśvāsa vipulairmārgaṇaiḥ parivarjitaḥ /
kṣīṇakośa iva tyāgī vailakṣyavinatānanaḥ

tato niṣpratibhe tatra pārthe sarvāyudhakṣayāt /
vṛṣṇipaurāṅganā jahrurnirvivekā vanecarāḥ

na tu pradhānanārīṣu teṣāmāsītpragalbhatā /
anarhasya mahārheṣu nīcasyojasvitā katham

taiḥ prasahya hṛte straiṇe bhagnamāno dhanaṃjayaḥ /
pratasthe nijadordaṇḍe sāsūyāḥ pātayandṛśaḥ

aho balavatī devī saṃsāre 'sminnanityatā /
aho niḥsāraparyantā bhāvānāṃ prabhaviṣṇutā

aho sarvakaṣaḥ kālaścitrapākamaho jagat /
vijite vijayo gopairduḥkhādityavadajjanaḥ

dhiganityavilāsasya vibhramabhrāntikāriṇaḥ /
dhāturadbhutanirmāṇavinodaviśarārutām

ākhaṇḍalaprabhṛtayaḥ khāṇḍave yena khaṇḍitāḥ /
kairāte tripurārātiḥ samare yena toṣitaḥ

jitvā tamapi gopālā varākāḥ suhṛdaṃ hareḥ /
jahrurviṣṇukalatrāṇi dhikkālasya durantatām

revatīṃ rukmiṇīṃ satyabhāmāṃ jāmbavatīṃ tathā /
vajraṃ pautraṃ ca kaṃsāreranyāśca yaduyoṣitaḥ

ādāya phalguṇaḥ śocannindraprasthaṃ samāviśat /
sabāṣpaṃ paurasaṃghātairabhitaḥ parivāritaḥ

rājye nidhāya tatraiva vajraṃ yāte dhanaṃjaye /
satyabhāmānugā devyaḥ pāvakaṃ viviśuḥ śucā

vrajanvṛṣṇiviyogārtaḥ kirīṭi hastināpuram /
parāvarajñaṃ bhāvānāṃ vane vyāsaṃ vyalokayat

duḥkhānnyavedayattasmai ghoraṃ vṛṣṇikulakṣayam /
ātmanaścāttacāpasya gopaiḥ pathi parābhavam

tamabravījjñānanidhirmunirāśvāsya mūrcchitam /
putra kālavilāsānāṃ sarvametadvijṛmbhitam

matirvibhūtayo bhogāḥ prabhāvāḥ śaktayo guṇāḥ /
sarvathā kālakalayā nīyate smṛtiśeṣatām

dhruvaṃ sarvaparityāge na kuryurmunayo matim /
avasānaikavirasā yadi na syādbhavasthitiḥ

ityukto muninā pārthaḥ prayayau hastināpuram /
prabhāvaṃ vṛṣṇisiṃhasya kalayanbhṛśavihvalaḥ