Bhāratamañjarī 6-19 · Chapter 15

iti śrīkṣemendraviracitāyāṃ bhāratamañjaryāmāśvamedhikaṃ parva
Āśramavāsikaṃ parvan
nārāyaṇaṃ namaskṛtya naraṃ caiva narottamam /
devīṃ sarasvatīṃ vyāsaṃ tato jayamudīrayet

ekacchatrāṃ mahīṃ rājñi praśāsati yudhiṣṭhire /
nāśrūyatārtijaḥ śabdo na cādṛśyata yācakaḥ

yaśasā dharmavīrasya tasya vyāpte jagattraye /
rāghavādikathābandheṣvabhūnmandācaro janaḥ

dhṛtarāṣṭraḥ saviduro gāndhārī ca pativratā /
satataṃ daivataṃ tasya babhūvuḥ pratimāṃ vinā

rāja(jñaḥ) ṣaḍrasavaicitryaveśavāravidhāyinaḥ /
bhojane dhṛtarāṣṭrasya sa sūdānsvayamaikṣata

tacchāsanānnāpriyāṇi kuruvṛddhasya pāṇḍavāḥ /
aślīlaṃ dadataḥ sarve prativādaṃ pracakrire

rājārhaṃ bhojanaṃ bhuṅkte sarvamevāmbikāsutaḥ /
iti viśrāvya gūḍhaṃ tu so 'bhavatphalabhojanaḥ

aho vratavatastasya jāpinaḥ kṣitiśāyinaḥ /
jāyāsakhasya vairāgyaṃ bubudhe na yudhiṣṭhiraḥ

evaṃ nivasatāṃ teṣāṃ mithaḥ praṇayaśālinām /
kāle pravāhini yayuḥ samaḥ pañcādhikā daśa

kadācidatha saṃsmṛtya bhīmaḥ kauravadurnayān /
cakāra tadvadhakathāṃ bahuśabdaṃ ca durmadaḥ

dhṛtarāṣṭro jitakrodhastadākarṇya vadhūsakhaḥ /
vidhāyāśrutavatsarvamabhūtsaṃnyāsalālasaḥ

tatastasyātinirvedādbhāvabhramaparāṅbhukham /
babhuva śamakāmasya vairāgyābharaṇaṃ manaḥ

viyogaśatadagdhānāmavamānaviṣāśinām /
sarvatyāgaḥ sukhāyaiva nirvāṇāmṛtanirjharaḥ

sa yudhiṣṭhiramabhyetya vanavāsasamutsukaḥ /
uvāca niyamakṣāmo damopaśamamanthanam

varṇāśramaguro rājannanujānīhi pārtha mām /
daśāṃ vṛddhocitāṃ labdhuṃ vrajāmyeṣa tapovanam

iyaṃ bhavasukhāsvādaratistatparacetasām /
nṛṇāmajīrṇatṛṣṇeva satataṃ parivardhate

spṛśa māṃ puṇyagandhena vapuṣā dharmanandana /
svasti te pāhi pṛthivīṃ putravatpaśya ca prajāḥ

kośadurgabalādāne kurvīthā yatnamuttamam /
gūḍhamantraḥ prajāpāla unmūlā hi nṛpaśriyaḥ

ityuktvā mūrdhnyupāghrāya nirāhāraḥ kṛśo nṛpam /
kampamānatanurvṛddho babhūva gamanotsukaḥ

taṃ sāśrulocano rājā yayāce racitāñjaliḥ /
māmutsṛjya kathaṃ nāma gantumarhasi kānanam

tvatpādasevāsaṃtoṣaṃ tyuktuṃ nāhamihotsahe /
vītarāgasya te tāta gṛheṣveva tapovanam

iti tenārthyamāno 'pi bubudhe na yadā sa tat /
tadā satyavatīsūnurmuniḥ svayamupāyayau

sa dharmarājamabhyetya babhāṣe jñānalocanaḥ /
tyajyatāmeṣa bhūpāla vṛddho yātu tapovanam

śrutasya vayaso buddhervivekasya kulasya ca /
supakvamanasāṃ kāle vairāgyaṃ paramaṃ phalam

jarāśubhreṣu keśeṣu praśānte viṣayādare /
tapovanātparaṃ manye bhūṣaṇaṃ na śarīriṇām

ityuktvāntarhite vyāse viṣaṇṇena mahībhujā /
kṛcchrādiva tathetyukto jaharṣa kurupuṃgavaḥ

sa kṛtvā bhīṣmamukhyānāṃ gurūṇāṃ śrāddhamuttamam /
mahārhaḥ vipulaṃ dānaṃ dadau brāhmaṇasaṃmatam

dadatastasya no vighnaṃ cakrire pāṇḍunandanāḥ /
bhamastu kopatāmrākṣo dhanaṃjayamabhāṣata

kilbiṣaṃ yaiḥ kṛtaṃ ghoraṃ purāsmāsu bahucchalam /
kauravāṇāṃ kathaṃ śrāddhe teṣāṃ vittavyayaṃ sahe

yātu duryodhanaḥ pāpo narakaṃ sahito 'nujaiḥ /
vayaṃ śrāddhaṃ kariṣyāmaḥ svayaṃ śaṃtanunandane

iti bruvāṇamasakṛnnivārya pavanātmajam /
naitadvācyaṃ punariti provāca śvetavāhanaḥ

atha pratasthe gāndhāryā saha rājāmbikāsutaḥ /
gāvalganisakhaḥ paurānāmantrya vidurānugaḥ

putrairudaśrunayanaiḥ snuṣābhiścārthitā bhṛśam /
kuntī tapovanaruciṃ nātyajaddevarānugā

athāgre sahitaḥ kuntyā dhṛtarāṣṭraḥ sahānujaḥ /
rājarṣijuṣṭaṃ vipinaṃ viveśa viśadāśayaḥ

tatra rājarṣivaryeṇa śatayūpena saṃgataḥ /
jaṭāvalkalabhṛccakre sānujaḥ suciraṃ tapaḥ

taṃ tīvraniyamakṣāmaṃ nāradādyā maharṣayaḥ /
kṛtakṛtyatayā prāptaṃ draṣṭavyā draṣṭumāyayuḥ

sarvābhirbharatastrībhiḥ sahitāste mahārathāḥ /
nidhāya kānanopānte caturaṅge mahadbalam

apanītasitacchattracāmarāḥ pādacāriṇaḥ /
tapovanaṃ praviviśurdhṛtarāṣṭreṇa sevitam

te praṇamyāmbikāsūnuṃ jananīṃ saṃjayaṃ tathā /
viṣaṇṇāḥ prayayurmūrcchāṃ snāyuśeṣānvilokya tān

dhṛtarāṣṭro 'pi rājānaṃ saṃjayena niveditam /
papraccha kuśalaṃ kośe paure janapade tathā

tapovṛddhiṃ tataḥ pṛṣṭvā kuruvṛddhaṃ yudhiṣṭhiraḥ /
viduraḥ kveti papraccha sa ca pṛṣṭastamabravīt

vāyubhakṣo 'sthiśeṣāṅgaḥ svecchācārī nirambaraḥ /
viduro 'sminvane putra dṛśyate na ca dṛśyate

ityukte dhṛtarāṣṭreṇa samabhyāyādyadṛcchayā /
viduro dhūlidigdhāṅgo bilvamātramukhaḥ kṛśaḥ

āśrame sa janaṃ dṛṣṭvā palāyanaparo 'bhavat /
tamanvadhāvadekākī sāśrunetro yudhiṣṭhiraḥ

dṛśyaḥ kvacidadṛśyaśca vidurastamanādarāt /
apaśyadvītarāgāṇāṃ tṛṇe rājñi ca tulyatā

sa vṛkṣamūlamāśritya jñānadeho jvalanniva /
ukto yudhiṣṭhiro 'smīti rājñā saṃbhāṣaṇārthinā

nirnimeṣekṣaṇo maunī taṃ vīkṣya kṣapitāśayaḥ /
netrapāṇendriyaiḥ kṣipraṃ tameva sahasāviśat

dehaṃ nirmokavattyaktvā praviṣṭe vidure nṛpaḥ /
vihāya rājasaṃ bhāvaṃ babhūva jñānanirbharaḥ

dagdhumabhyudyataṃ kṣatturatha tatra kalevaram /
yudhiṣṭhiraṃ vyomacarā jñānasiddhā nyavārayan

tataḥ sametya tatsarvaṃ dhṛtarāṣṭrāya bhūpatiḥ /
nivedya tasthau nirduḥkhaḥ sānujo māturantike

phalāhāraḥ kṣamāśāyī kṣapayitvātha śarvarīm /
prātardatvā yathākāmaṃ dvijebhyo ratnakāñcanam

rājarṣibhiḥ sahāsīnaṃ praṇamya kurupuṃgavam /
dadarśa tejasāṃ rāśiṃ prāptaṃ satyavatīsutam

vyāso 'pi dharmatanayaṃ saṃbhāvya racitāñjalim /
yatidharmeṇa tāṃ siddhiṃ ślāghyāṃ kṣatturapūjayat

arthitaḥ kṣatravṛddhena gāndhāryā pṛthayā tayā /
paralokagatānsarvānbhūpālānsaha kauravaiḥ

adarśayatkurustrīṇāṃ vyāsaḥ svarganadījale /
sādhvyo 'pi tānanuyayurvimānaistyaktavigrahāḥ

atha dharmātmajo rājā tatra saptarṣisevite /
māsaṃ sthitvā puraṃ prāyātkuruvṛddhena coditaḥ

rathāśvakuñjarānīkaiḥ sa gatvā niḥśvasanmuhuḥ /
akāma iva kṛcchreṇa rājadhānīṃ samāviśat

atha dharmeṇa vasudhāṃ dharmarājasya śāsataḥ /
yāti kāle suramunirnāradaḥ samupāyayau

dhṛtarāṣṭrakathāṃ pṛṣṭaḥ pūjitaḥ sa mahībhujā /
uvāca rājanyāto 'sau rājarṣiḥ paramāṃ gatim

saṃvatsaraṃ vāyubhakṣo varṣaṃ ca tyaktabhojanaḥ /
kandukākāravadano durlakṣyaḥ so 'bhavatkṛśaḥ

tataḥ sa vahnīṃstatyāja mumukṣurniṣkriyo muniḥ /
kānane te 'pyavartanta jarattarunirantare

tatra priyāsakho rājā kuntyā saha mahāmatiḥ /
vanaṃ prajvalitaṃ dṛṣṭvā samādhi vidadhe param

avyāptā vyāpakāḥ svacchāḥ svayaṃ galitavṛttayaḥ /
sphucabrahmāṇḍavivarāste dhāma paramaṃ yayuḥ

evaṃ śamāṅkurasteṣāṃ sarvasaṃnyāsapallavaḥ /
svāntaprakāśakusumaḥ phalito jñānapādapaḥ

tato dāvāgninā tena dagdhāste bandhunā yathā /
saṃjayastu vratakṣāmo yātastuhinabhūdharam

śrutvaitatpāṇḍutanayo vyāptaḥ śokakṛṣāṇu(śānu)nā /
śuśoca sānujaḥ kuntīṃ sasutaṃ ca kurūdvaham

tataḥ prayāte devarṣau rājā kṛtvā jalakriyām /
tānevoddiśya vipulaṃ dadau draviṇamakṣayam

so 'tha dhairyaṃ samālambya śokamutsārya dehajam /
saṃsārāsāratāṃ dhyāyanvivekaśaraṇo 'bhavat

bhāvāḥ svabhāvaviśarārava eva teṣu saktaṃ mano na virahe sahate 'nutāpam /
tatsarvathā priyaviyogaviṣāhatānāṃ śāntyai sudhā tanubhṛtāṃ vipulo vivekaḥ