Bhagavata Purana · Chapter 12.11

BhP_12.11.001/0 śrī-śaunaka uvāca
athemam arthaṃ pṛcchāmo bhavantaṃ bahu-vittamam /
samasta-tantra-rāddhānte bhavān bhāgavata tattva-vit

tāntrikāḥ paricaryāyāṃ kevalasya śriyaḥ pateḥ /
aṅgopāṅgāyudhākalpaṃ kalpayanti yathā ca yaiḥ

tan no varṇaya bhadraṃ te kriyā-yogaṃ bubhutsatām /
yena kriyā-naipuṇena martyo yāyād amartyatām

BhP_12.11.004/0 sūta uvāca
namaskṛtya gurūn vakṣye vibhūtīr vaiṣṇavīr api /
yāḥ proktā veda-tantrābhyām ācāryaiḥ padmajādibhiḥ

māyādyair navabhis tattvaiḥ sa vikāra-mayo virāṭ /
nirmito dṛśyate yatra sa-citke bhuvana-trayam

etad vai pauruṣaṃ rūpaṃ bhūḥ pādau dyauḥ śiro nabhaḥ /
nābhiḥ sūryo 'kṣiṇī nāse vāyuḥ karṇau diśaḥ prabhoḥ

prajāpatiḥ prajananam apāno mṛtyur īśituḥ /
tad-bāhavo loka-pālā manaś candro bhruvau yamaḥ

lajjottaro 'dharo lobho dantā jyotsnā smayo bhramaḥ /
romāṇi bhūruhā bhūmno meghāḥ puruṣa-mūrdhajāḥ

yāvān ayaṃ vai puruṣo yāvatyā saṃsthayā mitaḥ /
tāvān asāv api mahā- puruṣo loka-saṃsthayā

kaustubha-vyapadeśena svātma-jyotir bibharty ajaḥ /
tat-prabhā vyāpinī sākṣāt śrīvatsam urasā vibhuḥ

sva-māyāṃ vana-mālākhyāṃ nānā-guṇa-mayīṃ dadhat /
vāsaś chando-mayaṃ pītaṃ brahma-sūtraṃ tri-vṛt svaram

bibharti sāṅkhyaṃ yogaṃ ca devo makara-kuṇḍale /
mauliṃ padaṃ pārameṣṭhyaṃ sarva-lokābhayaṅ-karam

avyākṛtam anantākhyam āsanaṃ yad-adhiṣṭhitaḥ /
dharma-jñānādibhir yuktaṃ sattvaṃ padmam ihocyate

ojaḥ-saho-bala-yutaṃ mukhya-tattvaṃ gadāṃ dadhat /
apāṃ tattvaṃ dara-varaṃ tejas-tattvaṃ sudarśanam

nabho-nibhaṃ nabhas-tattvam asiṃ carma tamo-mayam /
kāla-rūpaṃ dhanuḥ śārṅgaṃ tathā karma-mayeṣudhim

indriyāṇi śarān āhur ākūtīr asya syandanam /
tan-mātrāṇy asyābhivyaktiṃ mudrayārtha-kriyātmatām

maṇḍalaṃ deva-yajanaṃ dīkṣā saṃskāra ātmanaḥ /
paricaryā bhagavata ātmano durita-kṣayaḥ

bhagavān bhaga-śabdārthaṃ līlā-kamalam udvahan /
dharmaṃ yaśaś ca bhagavāṃś cāmara-vyajane 'bhajat

ātapatraṃ tu vaikuṇṭhaṃ dvijā dhāmākuto-bhayam /
tri-vṛd vedaḥ suparṇākhyo yajñaṃ vahati pūruṣam

anapāyinī bhagavatī śṛīḥ sākṣād ātmano hareḥ /
viṣvakṣenas tantra-mūrtir viditaḥ pārṣadādhipaḥ /
nandādayo 'ṣṭau dvāḥ-sthāś ca te 'ṇimādyā harer guṇāḥ

vāsudevaḥ saṅkarṣaṇaḥ pradyumnaḥ puruṣaḥ svayam /
aniruddha iti brahman mūrti-vyūho 'bhidhīyate

sa viśvas taijasaḥ prājñas turīya iti vṛttibhiḥ /
arthendriyāśaya-jñānair bhagavān paribhāvyate

aṅgopāṅgāyudhākalpair bhagavāṃs tac catuṣṭayam /
bibharti sma catur-mūrtir bhagavān harir īśvaraḥ

dvija-ṛṣabha sa eṣa brahma-yoniḥ svayaṃ-dṛk $ sva-mahima-paripūrṇo māyayā ca svayaitat &
sṛjati harati pātīty ākhyayānāvṛtākṣo % vivṛta iva niruktas tat-parair ātma-labhyaḥ // BhP_12.11.024* //
śrī-kṛṣṇa kṛṣṇa-sakha vṛṣṇy-ṛṣabhāvani-dhrug- $ rājanya-vaṃśa-dahanānapavarga-vīrya &
śrī-kṛṣṇa kṛṣṇa-sakha vṛṣṇy-ṛṣabhāvani-dhrug- $ rājanya-vaṃśa-dahanānapavarga-vīrya &
govinda gopa-vanitā-vraja-bhṛtya-gīta % tīrtha-śravaḥ śravaṇa-maṅgala pāhi bhṛtyān // BhP_12.11.025* //
ya idaṃ kalya utthāya mahā-puruṣa-lakṣaṇam /
tac-cittaḥ prayato japtvā brahma veda guhāśayam

BhP_12.11.027/0 śrī-śaunaka uvāca
śuko yad āha bhagavān viṣṇu-rātāya śṛṇvate /
sauro gaṇo māsi māsi nānā vasati saptakaḥ

teṣāṃ nāmāni karmāṇi niyuktānām adhīśvaraiḥ /
brūhi naḥ śraddadhānānāṃ vyūhaṃ sūryātmano hareḥ

BhP_12.11.029/0 sūta uvāca
anādy-avidyayā viṣṇor ātmanaḥ sarva-dehinām /
nirmito loka-tantro 'yaṃ lokeṣu parivartate

eka eva hi lokānāṃ sūrya ātmādi-kṛd dhariḥ /
sarva-veda-kriyā-mūlam ṛṣibhir bahudhoditaḥ

kālo deśaḥ kriyā kartā karaṇaṃ kāryam āgamaḥ /
dravyaṃ phalam iti brahman navadhokto 'jayā hariḥ

madhv-ādiṣu dvādaśasu bhagavān kāla-rūpa-dhṛk /
loka-tantrāya carati pṛthag dvādaśabhir gaṇaiḥ

dhātā kṛtasthalī hetir vāsukī rathakṛn mune /
pulastyas tumburur iti madhu-māsaṃ nayanty amī

aryamā pulaho 'thaujāḥ prahetiḥ puñjikasthalī /
nāradaḥ kacchanīraś ca nayanty ete sma mādhavam

mitro 'triḥ pauruṣeyo 'tha takṣako menakā hahāḥ /
rathasvana iti hy ete śukra-māsaṃ nayanty amī

vasiṣṭho varuṇo rambhā sahajanyas tathā huhūḥ /
śukraś citrasvanaś caiva śuci-māsaṃ nayanty amī

indro viśvāvasuḥ śrotā elāpatras tathāṅgirāḥ /
pramlocā rākṣaso varyo nabho-māsaṃ nayanty amī

vivasvān ugrasenaś ca vyāghra āsāraṇo bhṛguḥ /
anumlocā śaṅkhapālo nabhasyākhyaṃ nayanty amī

pūṣā dhanañjayo vātaḥ suṣeṇaḥ surucis tathā /
ghṛtācī gautamaś ceti tapo-māsaṃ nayanty amī

ṛtur varcā bharadvājaḥ parjanyaḥ senajit tathā /
viśva airāvataś caiva tapasyākhyaṃ nayanty amī

athāṃśuḥ kaśyapas tārkṣya ṛtasenas tathorvaśī /
vidyucchatrur mahāśaṅkhaḥ saho-māsaṃ nayanty amī

bhagaḥ sphūrjo 'riṣṭanemir ūrṇa āyuś ca pañcamaḥ /
karkoṭakaḥ pūrvacittiḥ puṣya-māsaṃ nayanty amī

tvaṣṭā ṛcīka-tanayaḥ kambalaś ca tilottamā /
brahmāpeto 'tha satajid dhṛtarāṣṭra iṣam-bharāḥ

viṣṇur aśvataro rambhā sūryavarcāś ca satyajit /
viśvāmitro makhāpeta ūrja-māsaṃ nayanty amī

etā bhagavato viṣṇor ādityasya vibhūtayaḥ /
smaratāṃ sandhyayor nṝṇāṃ haranty aṃho dine dine

dvādaśasv api māseṣu devo 'sau ṣaḍbhir asya vai /
caran samantāt tanute paratreha ca san-matim

sāmarg-yajurbhis tal-liṅgair ṛṣayaḥ saṃstuvanty amum /
gandharvās taṃ pragāyanti nṛtyanty apsaraso 'grataḥ

unnahyanti rathaṃ nāgā grāmaṇyo ratha-yojakāḥ /
codayanti rathaṃ pṛṣṭhe nairṛtā bala-śālinaḥ

vālakhilyāḥ sahasrāṇi ṣaṣṭir brahmarṣayo 'malāḥ /
purato 'bhimukhaṃ yānti stuvanti stutibhir vibhum

evaṃ hy anādi-nidhano bhagavān harir īśvaraḥ /
kalpe kalpe svam ātmānaṃ vyūhya lokān avaty ajaḥ