Bhagavata Purana · Chapter 12.10

BhP_12.10.001/0 sūta uvāca
sa evam anubhūyedaṃ nārāyaṇa-vinirmitam /
vaibhavaṃ yoga-māyāyās tam eva śaraṇaṃ yayau

BhP_12.10.002/0 śrī-mārkaṇḍeya uvāca
prapanno 'smy aṅghri-mūlaṃ te prapannābhaya-daṃ hare /
yan-māyayāpi vibudhā muhyanti jñāna-kāśayā

BhP_12.10.003/0 sūta uvāca
tam evaṃ nibhṛtātmānaṃ vṛṣeṇa divi paryaṭan /
rudrāṇyā bhagavān rudro dadarśa sva-gaṇair vṛtaḥ

athomā tam ṛṣiṃ vīkṣya giriśaṃ samabhāṣata /
paśyemaṃ bhagavan vipraṃ nibhṛtātmendriyāśayam

nibhṛtoda-jhaṣa-vrāto vātāpāye yathārṇavaḥ /
kurv asya tapasaḥ sākṣāt saṃsiddhiṃ siddhi-do bhavān

BhP_12.10.006/0 śrī-bhagavān uvāca
naivecchaty āśiṣaḥ kvāpi brahmarṣir mokṣam apy uta /
bhaktiṃ parāṃ bhagavati labdhavān puruṣe 'vyaye

athāpi saṃvadiṣyāmo bhavāny etena sādhunā /
ayaṃ hi paramo lābho nṛṇāṃ sādhu-samāgamaḥ

BhP_12.10.008/0 sūta uvāca
ity uktvā tam upeyāya bhagavān sa satāṃ gatiḥ /
īśānaḥ sarva-vidyānām īśvaraḥ sarva-dehinām

tayor āgamanaṃ sākṣād īśayor jagad-ātmanoḥ /
na veda ruddha-dhī-vṛttir ātmānaṃ viśvam eva ca

bhagavāṃs tad abhijñāya giriśo yoga-māyayā /
āviśat tad-guhākāśaṃ vāyuś chidram iveśvaraḥ

ātmany api śivaṃ prāptaṃ taḍit-piṅga-jaṭā-dharam /
try-akṣaṃ daśa-bhujaṃ prāṃśum udyantam iva bhāskaram

vyāghra-carmāmbaraṃ śūla- dhanur-iṣv-asi-carmabhiḥ /
akṣa-mālā-ḍamaruka- kapālaṃ paraśuṃ saha

bibhrāṇaṃ sahasā bhātaṃ vicakṣya hṛdi vismitaḥ /
kim idaṃ kuta eveti samādher virato muniḥ

netre unmīlya dadṛśe sa-gaṇaṃ somayāgatam /
rudraṃ tri-lokaika-guruṃ nanāma śirasā muniḥ

tasmai saparyāṃ vyadadhāt sa-gaṇāya sahomayā /
svāgatāsana-pādyārghya- gandha-srag-dhūpa-dīpakaiḥ

āha tv ātmānubhāvena pūrṇa-kāmasya te vibho /
karavāma kim īśāna yenedaṃ nirvṛtaṃ jagat

namaḥ śivāya śāntāya sattvāya pramṛḍāya ca /
rajo-juṣe 'tha ghorāya namas tubhyaṃ tamo-juṣe

BhP_12.10.018/0 sūta uvāca
evaṃ stutaḥ sa bhagavān ādi-devaḥ satāṃ gatiḥ /
parituṣṭaḥ prasannātmā prahasaṃs tam abhāṣata

BhP_12.10.019/0 śrī-bhagavān uvāca
varaṃ vṛṇīṣva naḥ kāmaṃ vara-deśā vayaṃ trayaḥ /
amoghaṃ darśanaṃ yeṣāṃ martyo yad vindate 'mṛtam

brāhmaṇāḥ sādhavaḥ śāntā niḥsaṅgā bhūta-vatsalāḥ /
ekānta-bhaktā asmāsu nirvairāḥ sama-darśinaḥ

sa-lokā loka-pālās tān vandanty arcanty upāsate /
ahaṃ ca bhagavān brahmā svayaṃ ca harir īśvaraḥ

na te mayy acyute 'je ca bhidām aṇv api cakṣate /
nātmanaś ca janasyāpi tad yuṣmān vayam īmahi

na hy am-mayāni tīrthāni na devāś cetanojjhitāḥ /
te punanty uru-kālena yūyaṃ darśana-mātrataḥ

brāhmaṇebhyo namasyāmo ye 'smad-rūpaṃ trayī-mayam /
bibhraty ātma-samādhāna- tapaḥ-svādhyāya-saṃyamaiḥ

śravaṇād darśanād vāpi mahā-pātakino 'pi vaḥ /
śudhyerann antya-jāś cāpi kim u sambhāṣaṇādibhiḥ

BhP_12.10.026/0 sūta uvāca
iti candra-lalāmasya dharma-gahyopabṛṃhitam /
vaco 'mṛtāyanam ṛṣir nātṛpyat karṇayoḥ piban

sa ciraṃ māyayā viṣṇor bhrāmitaḥ karśito bhṛśam /
śiva-vāg-amṛta-dhvasta- kleśa-puñjas tam abravīt

BhP_12.10.028/0 śrī-mārkaṇḍeya uvāca
aho īśvara-līleyaṃ durvibhāvyā śarīriṇām /
yan namantīśitavyāni stuvanti jagad-īśvarāḥ

dharmaṃ grāhayituṃ prāyaḥ pravaktāraś ca dehinām /
ācaranty anumodante kriyamāṇaṃ stuvanti ca

naitāvatā bhagavataḥ sva-māyā-maya-vṛttibhiḥ /
na duṣyetānubhāvas tair māyinaḥ kuhakaṃ yathā

sṛṣṭvedaṃ manasā viśvam ātmanānupraviśya yaḥ /
guṇaiḥ kurvadbhir ābhāti karteva svapna-dṛg yathā

tasmai namo bhagavate tri-guṇāya guṇātmane /
kevalāyādvitīyāya gurave brahma-mūrtaye

kaṃ vṛṇe nu paraṃ bhūman varaṃ tvad vara-darśanāt /
yad-darśanāt pūrṇa-kāmaḥ satya-kāmaḥ pumān bhavet

varam ekaṃ vṛṇe 'thāpi pūrṇāt kāmābhivarṣaṇāt /
bhagavaty acyutāṃ bhaktiṃ tat-pareṣu tathā tvayi

BhP_12.10.035/0 sūta uvāca
ity arcito 'bhiṣṭutaś ca muninā sūktayā girā /
tam āha bhagavāñ charvaḥ śarvayā cābhinanditaḥ

kāmo maharṣe sarvo 'yaṃ bhaktimāṃs tvam adhokṣaje /
ā-kalpāntād yaśaḥ puṇyam ajarāmaratā tathā

jñānaṃ trai-kālikaṃ brahman vijñānaṃ ca viraktimat /
brahma-varcasvino bhūyāt purāṇācāryatāstu te

BhP_12.10.038/0 sūta uvāca
evaṃ varān sa munaye dattvāgāt try-akṣa īśvaraḥ /
devyai tat-karma kathayann anubhūtaṃ purāmunā

so 'py avāpta-mahā-yoga- mahimā bhārgavottamaḥ /
vicaraty adhunāpy addhā harāv ekāntatāṃ gataḥ

anuvarṇitam etat te mārkaṇḍeyasya dhīmataḥ /
anubhūtaṃ bhagavato māyā-vaibhavam adbhutam

etat kecid avidvāṃso māyā-saṃsṛtir ātmanaḥ /
anādy-āvartitaṃ nṝṇāṃ kādācitkaṃ pracakṣate

ya evam etad bhṛgu-varya varṇitaṃ rathāṅga-pāṇer anubhāva-bhāvitam /
saṃśrāvayet saṃśṛṇuyād u tāv ubhau tayor na karmāśaya-saṃsṛtir bhavet