Bhagavata Purana · Chapter 12.07

BhP_12.07.001/0 sūta uvāca
atharva-vit sumantuś ca śiṣyam adhyāpayat svakām /
saṃhitāṃ so 'pi pathyāya vedadarśāya coktavān

śauklāyanir brahmabalir modoṣaḥ pippalāyaniḥ /
vedadarśasya śiṣyās te pathya-śiṣyān atho śṛṇu /
kumudaḥ śunako brahman jājaliś cāpy atharva-vit

babhruḥ śiṣyo 'thāngirasaḥ saindhavāyana eva ca /
adhīyetāṃ saṃhite dve sāvarṇādyās tathāpare

nakṣatrakalpaḥ śāntiś ca kaśyapāṅgirasādayaḥ /
ete ātharvaṇācāryāḥ śṛṇu paurāṇikān mune

trayyāruṇiḥ kaśyapaś ca sāvarṇir akṛtavranaḥ /
vaiśampāyana-hārītau ṣaḍ vai paurāṇikā ime

adhīyanta vyāsa-śiṣyāt saṃhitāṃ mat-pitur mukhāt /
ekaikām aham eteṣāṃ śiṣyaḥ sarvāḥ samadhyagām

kaśyapo 'haṃ ca sāvarṇī rāma-śiṣyo 'kṛtavranaḥ /
adhīmahi vyāsa-śiṣyāc catvāro mūla-saṃhitāḥ

purāṇa-lakṣaṇaṃ brahman brahmarṣibhir nirūpitam /
śṛṇuṣva buddhim āśritya veda-śāstrānusārataḥ

sargo 'syātha visargaś ca vṛtti-rakṣāntarāṇi ca /
vaṃśo vaṃśānucarītaṃ saṃsthā hetur apāśrayaḥ

daśabhir lakṣaṇair yuktaṃ purāṇaṃ tad-vido viduḥ /
kecit pañca-vidhaṃ brahman mahad-alpa-vyavasthayā

avyākṛta-guṇa-kṣobhān mahatas tri-vṛto 'hamaḥ /
bhūta-sūkṣmendriyārthānāṃ sambhavaḥ sarga ucyate

puruṣānugṛhītānām eteṣāṃ vāsanā-mayaḥ /
visargo 'yaṃ samāhāro bījād bījaṃ carācaram

vṛttir bhūtāni bhūtānāṃ carāṇām acarāṇi ca /
kṛtā svena nṛṇāṃ tatra kāmāc codanayāpi vā

rakṣācyutāvatārehā viśvasyānu yuge yuge /
tiryaṅ-martyarṣi-deveṣu hanyante yais trayī-dviṣaḥ

manvantaraṃ manur devā manu-putrāḥ sureśvarāḥ /
rṣayo 'ṃśāvatārāś ca hareḥ ṣaḍ-vidham ucyate

rājñāṃ brahma-prasūtānāṃ vaṃśas trai-kāliko 'nvayaḥ /
vaṃśānucaritaṃ teṣām vṛttaṃ vaṃśa-dharās ca ye

naimittikaḥ prākṛtiko nitya ātyantiko layaḥ /
saṃstheti kavibhiḥ proktaś caturdhāsya svabhāvataḥ

hetur jīvo 'sya sargāder avidyā-karma-kārakaḥ /
yaṃ cānuśāyinaṃ prāhur avyākṛtam utāpare

vyatirekānvayo yasya jāgrat-svapna-suṣuptiṣu /
māyā-mayeṣu tad brahma jīva-vṛttiṣv apāśrayaḥ

padārtheṣu yathā dravyaṃ san-mātraṃ rūpa-nāmasu /
bījādi-pañcatāntāsu hy avasthāsu yutāyutam

virameta yadā cittaṃ hitvā vṛtti-trayaṃ svayam /
yogerla vā tadātmānaṃ vedehāyā nivartate

evaṃ lakṣaṇa-lakṣyāṇi purāṇāni purā-vidaḥ /
munayo 'ṣṭādaśa prāhuḥ kṣullakāni mahānti ca

brāhmaṃ pādmaṃ vaiṣṇavaṃ ca śaivaṃ laiṅgaṃ sa-gāruḍaṃ /
nāradīyaṃ bhāgavatam āgneyaṃ skānda-saṃjñitam

bhaviṣyaṃ brahma-vaivartaṃ mārkaṇḍeyaṃ sa-vāmanam /
vārāhaṃ mātsyaṃ kaurmaṃ ca brahmāṇḍākhyam iti tri-ṣaṭ

brahmann idaṃ samākhyātaṃ śākhā-praṇayanaṃ muneḥ /
śiṣya-śiṣya-praśiṣyāṇāṃ brahma-tejo-vivardhanam