Bhagavata Purana · Chapter 12.08

BhP_12.08.001/0 śrī-śaunaka uvāca
sūta jīva ciraṃ sādho vada no vadatāṃ vara /
tamasy apāre bhramatāṃ nṝṇāṃ tvaṃ pāra-darśanaḥ

āhuś cirāyuṣam ṛṣiṃ mṛkaṇḍu-tanayaṃ janāḥ /
yaḥ kalpānte hy urvarito yena grastam idaṃ jagat

sa vā asmat-kulotpannaḥ kalpe 'smin bhārgavarṣabhaḥ /
naivādhunāpi bhūtānāṃ samplavaḥ ko 'pi jāyate

eka evārṇave bhrāmyan dadarśa puruṣaṃ kila /
vaṭa-patra-puṭe tokaṃ śayānaṃ tv ekam adbhutam

eṣa naḥ saṃśayo bhūyān sūta kautūhalaṃ yataḥ /
taṃ naś chindhi mahā-yogin purāṇeṣv api sammataḥ

BhP_12.08.006/0 sūta uvāca
praśnas tvayā maharṣe 'yaṃ kṛto loka-bhramāpahaḥ /
nārāyaṇa-kathā yatra gītā kali-malāpahā

prāpta-dvijāti-saṃskāro mārkaṇḍeyaḥ pituḥ kramāt /
chandāṃsy adhītya dharmeṇa tapaḥ-svādhyāya-saṃyutaḥ

bṛhad-vrata-dharaḥ śānto jaṭilo valkalāmbaraḥ /
bibhrat kamaṇḍaluṃ daṇḍam upavītaṃ sa-mekhalam

kṛṣṇājinaṃ sākṣa-sūtraṃ kuśāṃś ca niyamarddhaye /
agny-arka-guru-viprātmasv arcayan sandhyayor harim

sāyaṃ prātaḥ sa gurave bhaikṣyam āhṛtya vāg-yataḥ /
bubhuje gurv-anujñātaḥ sakṛn no ced upoṣitaḥ

evaṃ tapaḥ-svādhyāya-paro varṣāṇām ayutāyutam /
ārādhayan hṛṣīkeśaṃ jigye mṛtyuṃ su-durjayam

brahmā bhṛgur bhavo dakṣo brahma-putrāś ca ye 'pare /
nṛ-deva-pitṛ-bhūtāni tenāsann ati-vismitāḥ

itthaṃ bṛhad-vrata-dharas tapaḥ-svādhyāya-saṃyamaiḥ /
dadhyāv adhokṣajaṃ yogī dhvasta-kleśāntarātmanā

tasyaivaṃ yuñjataś cittaṃ mahā-yogena yoginaḥ /
vyatīyāya mahān kālo manvantara-ṣaḍ-ātmakaḥ

etat purandaro jñātvā saptame 'smin kilāntare /
tapo-viśaṅkito brahmann ārebhe tad-vighātanam

gandharvāpsarasaḥ kāmaṃ vasanta-malayānilau /
munaye preṣayām āsa rajas-toka-madau tathā

te vai tad-āśramaṃ jagmur himādreḥ pārśva uttare /
puṣpabhadrā nadī yatra citrākhyā ca śilā vibho

tad-āśrama-padaṃ puṇyaṃ puṇya-druma-latāñcitam /
puṇya-dvija-kulākīṛnaṃ puṇyāmala-jalāśayam

matta-bhramara-saṅgītaṃ matta-kokila-kūjitam /
matta-barhi-naṭāṭopaṃ matta-dvija-kulākulam

vāyuḥ praviṣṭa ādāya hima-nirjhara-śīkarān /
sumanobhiḥ pariṣvakto vavāv uttambhayan smaram

udyac-candra-niśā-vaktraḥ pravāla-stabakālibhiḥ /
gopa-druma-latā-jālais tatrāsīt kusumākaraḥ

anvīyamāno gandharvair gīta-vāditra-yūthakaiḥ /
adṛśyatātta-cāpeṣuḥ svaḥ-strī-yūtha-patiḥ smaraḥ

hutvāgniṃ samupāsīnaṃ dadṛśuḥ śakra-kiṅkarāḥ /
mīlitākṣaṃ durādharṣaṃ mūrtimantam ivānalam

nanṛtus tasya purataḥ striyo 'tho gāyakā jaguḥ /
mṛdaṅga-vīṇā-paṇavair vādyaṃ cakrur mano-ramam

sandadhe 'straṃ sva-dhanuṣi kāmaḥ pañca-mukhaṃ tadā /
madhur mano rajas-toka indra-bhṛtyā vyakampayan

krīḍantyāḥ puñjikasthalyāḥ kandukaiḥ stana-gauravāt /
bhṛśam udvigna-madhyāyāḥ keśa-visraṃsita-srajaḥ

itas tato bhramad-dṛṣṭeś calantyā anu kandukam /
vāyur jahāra tad-vāsaḥ sūkṣmaṃ truṭita-mekhalam

visasarja tadā bāṇaṃ matvā taṃ sva-jitaṃ smaraḥ /
sarvaṃ tatrābhavan mogham anīśasya yathodyamaḥ

ta ittham apakurvanto munes tat-tejasā mune /
dahyamānā nivavṛtuḥ prabodhyāhim ivārbhakāḥ

itīndrānucarair brahman dharṣito 'pi mahā-muniḥ /
yan nāgād ahamo bhāvaṃ na tac citraṃ mahatsu hi

dṛṣṭvā nistejasaṃ kāmaṃ sa-gaṇaṃ bhagavān svarāṭ /
śrutvānubhāvaṃ brahmarṣer vismayaṃ samagāt param

tasyaivaṃ yuñjataś cittaṃ tapaḥ-svādhyāya-saṃyamaiḥ /
anugrahāyāvirāsīn nara-nārāyaṇo hariḥ

tau śukla-kṛṣṇau nava-kañja-locanau $ catur-bhujau raurava-valkalāmbarau &
pavitra-pāṇī upavītakaṃ tri-vṛt % kamaṇḍaluṃ daṇḍam ṛjuṃ ca vaiṇavam // BhP_12.08.033* //
padmākṣa-mālām uta jantu-mārjanaṃ $ vedaṃ ca sākṣāt tapa eva rūpiṇau &
padmākṣa-mālām uta jantu-mārjanaṃ $ vedaṃ ca sākṣāt tapa eva rūpiṇau &
tapat-taḍid-varṇa-piśaṅga-rociṣā % prāṃśū dadhānau vibudharṣabhārcitau // BhP_12.08.034* //
te vai bhagavato rūpe nara-nārāyaṇāv ṛṣī /
dṛṣṭvotthāyādareṇoccair nanāmāṅgena daṇḍa-vat

sa tat-sandarśanānanda- nirvṛtātmendriyāśayaḥ /
hṛṣṭa-romāśru-pūrṇākṣo na sehe tāv udīkṣitum

utthāya prāñjaliḥ prahva autsukyād āśliṣann iva /
namo nama itīśānau babhāśe gadgadākṣaram

tayor āsanam ādāya pādayor avanijya ca /
arhaṇenānulepena dhūpa-mālyair apūjayat

sukham āsanam āsīnau prasādābhimukhau munī /
punar ānamya pādābhyāṃ gariṣṭhāv idam abravīt