Bhagavata Purana · Chapter 12.05

BhP_12.05.001/0 śrī-śuka uvāca
atrānuvarṇyate 'bhīkṣṇaṃ viśvātmā bhagavān hariḥ /
yasya prasāda-jo brahmā rudraḥ krodha-samudbhavaḥ

tvaṃ tu rājan mariṣyeti paśu-buddhim imāṃ jahi /
na jātaḥ prāg abhūto 'dya deha-vat tvaṃ na naṅkṣyasi

na bhaviṣyasi bhūtvā tvaṃ putra-pautrādi-rūpavān /
bījāṅkura-vad dehāder vyatirikto yathānalaḥ

svapne yathā śiraś-chedaṃ pañcatvādy ātmanaḥ svayam /
yasmāt paśyati dehasya tata ātmā hy ajo 'maraḥ

ghaṭe bhinne ghaṭākāśa ākāśaḥ syād yathā purā /
evaṃ dehe mṛte jīvo brahma sampadyate punaḥ

manaḥ sṛjati vai dehān guṇān karmāṇi cātmanaḥ /
tan manaḥ sṛjate māyā tato jīvasya saṃsṛtiḥ

snehādhiṣṭhāna-varty-agni- saṃyogo yāvad īyate /
tāvad dīpasya dīpatvam evaṃ deha-kṛto bhavaḥ /
rajaḥ-sattva-tamo-vṛttyā jāyate 'tha vinaśyati

na tatrātmā svayaṃ-jyotir yo vyaktāvyaktayoḥ paraḥ /
ākāśa iva cādhāro dhruvo 'nantopamas tataḥ

evam ātmānam ātma-stham ātmanaivāmṛśa prabho /
buddhyānumāna-garbhiṇyā vāsudevānucintayā

codito vipra-vākyena na tvāṃ dhakṣyati takṣakaḥ /
mṛtyavo nopadhakṣyanti mṛtyūnāṃ mṛtyum īśvaram

ahaṃ brahma paraṃ dhāma brahmāhaṃ paramaṃ padam /
evaṃ samīkṣya cātmānam ātmany ādhāya niṣkale

daśantaṃ takṣakaṃ pāde lelihānaṃ viṣānanaiḥ /
na drakṣyasi śarīraṃ ca viśvaṃ ca pṛthag ātmanaḥ

etat te kathitaṃ tāta yad ātmā pṛṣṭavān nṛpa /
harer viśvātmanaś ceṣṭāṃ kiṃ bhūyaḥ śrotum icchasi