ભાગવત પુરાણ · અધ્યાય 12.05

ભ્પ્_12.05.001।0 શ્રી-શુક ઉવાચ
અત્રાનુવર્ણ્યતે ઽભીક્ષ્ણં વિશ્વાત્મા ભગવાન્ હરિઃ ।
યસ્ય પ્રસાદ-જો બ્રહ્મા રુદ્રઃ ક્રોધ-સમુદ્ભવઃ

ત્વં તુ રાજન્ મરિષ્યેતિ પશુ-બુદ્ધિમ્ ઇમાં જહિ ।
ન જાતઃ પ્રાગ્ અભૂતો ઽદ્ય દેહ-વત્ ત્વં ન નઙ્ક્ષ્યસિ

ન ભવિષ્યસિ ભૂત્વા ત્વં પુત્ર-પૌત્રાદિ-રૂપવાન્ ।
બીજાઙ્કુર-વદ્ દેહાદેર્ વ્યતિરિક્તો યથાનલઃ

સ્વપ્ને યથા શિરશ્-છેદં પઞ્ચત્વાદ્ય્ આત્મનઃ સ્વયમ્ ।
યસ્માત્ પશ્યતિ દેહસ્ય તત આત્મા હ્ય્ અજો ઽમરઃ

ઘટે ભિન્ને ઘટાકાશ આકાશઃ સ્યાદ્ યથા પુરા ।
એવં દેહે મૃતે જીવો બ્રહ્મ સમ્પદ્યતે પુનઃ

મનઃ સૃજતિ વૈ દેહાન્ ગુણાન્ કર્માણિ ચાત્મનઃ ।
તન્ મનઃ સૃજતે માયા તતો જીવસ્ય સંસૃતિઃ

સ્નેહાધિષ્ઠાન-વર્ત્ય્-અગ્નિ- સંયોગો યાવદ્ ઈયતે ।
તાવદ્ દીપસ્ય દીપત્વમ્ એવં દેહ-કૃતો ભવઃ ।
રજઃ-સત્ત્વ-તમો-વૃત્ત્યા જાયતે ઽથ વિનશ્યતિ

ન તત્રાત્મા સ્વયં-જ્યોતિર્ યો વ્યક્તાવ્યક્તયોઃ પરઃ ।
આકાશ ઇવ ચાધારો ધ્રુવો ઽનન્તોપમસ્ તતઃ

એવમ્ આત્માનમ્ આત્મ-સ્થમ્ આત્મનૈવામૃશ પ્રભો ।
બુદ્ધ્યાનુમાન-ગર્ભિણ્યા વાસુદેવાનુચિન્તયા

ચોદિતો વિપ્ર-વાક્યેન ન ત્વાં ધક્ષ્યતિ તક્ષકઃ ।
મૃત્યવો નોપધક્ષ્યન્તિ મૃત્યૂનાં મૃત્યુમ્ ઈશ્વરમ્

અહં બ્રહ્મ પરં ધામ બ્રહ્માહં પરમં પદમ્ ।
એવં સમીક્ષ્ય ચાત્માનમ્ આત્મન્ય્ આધાય નિષ્કલે

દશન્તં તક્ષકં પાદે લેલિહાનં વિષાનનૈઃ ।
ન દ્રક્ષ્યસિ શરીરં ચ વિશ્વં ચ પૃથગ્ આત્મનઃ

એતત્ તે કથિતં તાત યદ્ આત્મા પૃષ્ટવાન્ નૃપ ।
હરેર્ વિશ્વાત્મનશ્ ચેષ્ટાં કિં ભૂયઃ શ્રોતુમ્ ઇચ્છસિ