Bhagavata Purana · Chapter 12.03

BhP_12.03.001/0 śrī-śuka uvāca
dṛṣṭvātmani jaye vyagrān nṛpān hasati bhūr iyam /
aho mā vijigīṣanti mṛtyoḥ krīḍanakā nṛpāḥ

kāma eṣa narendrāṇāṃ moghaḥ syād viduṣām api /
yena phenopame piṇḍe ye 'ti-viśrambhitā nṛpāḥ

pūrvaṃ nirjitya ṣaḍ-vargaṃ jeṣyāmo rāja-mantriṇaḥ /
tataḥ saciva-paurāpta- karīndrān asya kaṇṭakān

evaṃ krameṇa jeṣyāmaḥ pṛthvīṃ sāgara-mekhalām /
ity āśā-baddha-hṛdayā na paśyanty antike 'ntakam

samudrāvaraṇāṃ jitvā māṃ viśanty abdhim ojasā /
kiyad ātma-jayasyaitan muktir ātma-jaye phalam

yāṃ visṛjyaiva manavas tat-sutāś ca kurūdvaha /
gatā yathāgataṃ yuddhe tāṃ māṃ jeṣyanty abuddhayaḥ

mat-kṛte pitṛ-putrāṇāṃ bhrātṛṇāṃ cāpi vigrahaḥ /
jāyate hy asatāṃ rājye mamatā-baddha-cetasām

mamaiveyaṃ mahī kṛtsnā na te mūḍheti vādinaḥ /
spardhamānā mitho ghnanti mriyante mat-kṛte nṛpāḥ

pṛthuḥ purūravā gādhir nahuṣo bharato 'rjunaḥ /
māndhātā sagaro rāmaḥ khaṭvāṅgo dhundhuhā raghuḥ

tṛṇabindur yayātiś ca śaryātiḥ śantanur gayaḥ /
bhagīrathaḥ kuvalayāśvaḥ kakutstho naiṣadho nṛgaḥ

hiraṇyakaśipur vṛtro rāvaṇo loka-rāvaṇaḥ /
namuciḥ śambaro bhaumo hiraṇyākṣo 'tha tārakaḥ

anye ca bahavo daityā rājāno ye maheśvarāḥ /
sarve sarva-vidaḥ śūrāḥ sarve sarva-jito 'jitāḥ

mamatāṃ mayy avartanta kṛtvoccair martya-dharmiṇaḥ /
kathāvaśeṣāḥ kālena hy akṛtārthāḥ kṛtā vibho

kathā imās te kathitā mahīyasāṃ vitāya lokeṣu yaśaḥ pareyuṣām /
vijñāna-vairāgya-vivakṣayā vibho vaco-vibhūtīr na tu pāramārthyam

yas tūttamaḥ-śloka-guṇānuvādaḥ saṅgīyate 'bhīkṣṇam amaṅgala-ghnaḥ /
tam eva nityaṃ śṛṇuyād abhīkṣṇaṃ kṛṣṇe 'malāṃ bhaktim abhīpsamānaḥ

BhP_12.03.016/0 śrī-rājovāca
kenopāyena bhagavan kaler doṣān kalau janāḥ /
vidhamiṣyanty upacitāṃs tan me brūhi yathā mune

yugāni yuga-dharmāṃś ca mānaṃ pralaya-kalpayoḥ /
kālasyeśvara-rūpasya gatiṃ viṣṇor mahātmanaḥ

BhP_12.03.018/0 śrī-śuka uvāca
kṛte pravartate dharmaś catuṣ-pāt taj-janair dhṛtaḥ /
satyaṃ dayā tapo dānam iti pādā vibhor nṛpa

santuṣṭāḥ karuṇā maitrāḥ śāntā dāntās titikṣavaḥ /
ātmārāmāḥ sama-dṛśaḥ prāyaśaḥ śramaṇā janāḥ

tretāyāṃ dharma-pādānāṃ turyāṃśo hīyate śanaiḥ /
adharma-pādair anṛta- hiṃṣāsantoṣa-vigrahaiḥ

tadā kriyā-tapo-niṣṭhā nāti-hiṃsrā na lampaṭāḥ /
trai-vargikās trayī-vṛddhā varṇā brahmottarā nṛpa

tapaḥ-satya-dayā-dāneṣv ardhaṃ hrasvati dvāpare /
hiṃsātuṣṭy-anṛta-dveṣair dharmasyādharma-lakṣaṇaiḥ

yaśasvino mahā-śīlāḥ svādhyāyādhyayane ratāḥ /
ādhyāḥ kuṭumbino hṛṣṭā varṇāḥ kṣatra-dvijottarāḥ

kalau tu dharma-pādānāṃ turyāṃśo 'dharma-hetubhiḥ /
edhamānaiḥ kṣīyamāṇo hy ante so 'pi vinaṅkṣyati

tasmin lubdhā durācārā nirdayāḥ śuṣka-vairiṇaḥ /
durbhagā bhūri-tarṣāś ca śūdra-dāsottarāḥ prajāḥ

sattvaṃ rajas tama iti dṛśyante puruṣe guṇāḥ /
kāla-sañcoditās te vai parivartanta ātmani

prabhavanti yadā sattve mano-buddhīndriyāṇi ca /
tadā kṛta-yugaṃ vidyāj jñāne tapasi yad ruciḥ

yadā karmasu kāmyeṣu bhaktir yaśasi dehinām /
tadā tretā rajo-vṛttir iti jānīhi buddhiman

yadā lobhas tv asantoṣo māno dambho 'tha matsaraḥ /
karmaṇāṃ cāpi kāmyānāṃ dvāparaṃ tad rajas-tamaḥ

yadā māyānṛtaṃ tandrā nidrā hiṃsā viṣādanam /
śoka-mohau bhayaṃ dainyaṃ sa kalis tāmasaḥ smṛtaḥ

tasmāt kṣudra-dṛśo martyāḥ kṣudra-bhāgyā mahāśanāḥ /
kāmino vitta-hīnāś ca svairiṇyaś ca striyo 'satīḥ

dasyūtkṛṣṭā janapadā vedāḥ pāṣaṇḍa-dūṣitāḥ /
rājānaś ca prajā-bhakṣāḥ śiśnodara-parā dvijāḥ

avratā baṭavo 'śaucā bhikṣavaś ca kuṭumbinaḥ /
tapasvino grāma-vāsā nyāsino 'tyartha-lolupāḥ

hrasva-kāyā mahāhārā bhūry-apatyā gata-hriyaḥ /
śaśvat kaṭuka-bhāṣiṇyaś caurya-māyoru-sāhasāḥ

paṇayiṣyanti vai kṣudrāḥ kirāṭāḥ kūṭa-kāriṇaḥ /
anāpady api maṃsyante vārtāṃ sādhu jugupsitām

patiṃ tyakṣyanti nirdravyaṃ bhṛtyā apy akhilottamam /
bhṛtyaṃ vipannaṃ patayaḥ kaulaṃ gāś cāpayasvinīḥ

pitṛ-bhrātṛ-suhṛj-jñātīn hitvā saurata-sauhṛdāḥ /
nanāndṛ-śyāla-saṃvādā dīnāḥ straiṇāḥ kalau narāḥ

śūdrāḥ pratigrahīṣyanti tapo-veṣopajīvinaḥ /
dharmaṃ vakṣyanty adharma-jñā adhiruhyottamāsanam

nityaṃ udvigna-manaso durbhikṣa-kara-karśitāḥ /
niranne bhū-tale rājan anāvṛṣṭi-bhayāturāḥ

vāso-'nna-pāna-śayana- vyavāya-snāna-bhūṣaṇaiḥ /
hīnāḥ piśāca-sandarśā bhaviṣyanti kalau prajāḥ

kalau kākiṇike 'py arthe vigṛhya tyakta-sauhṛdāḥ /
tyakṣyanti ca priyān prāṇān haniṣyanti svakān api

na rakṣiṣyanti manujāḥ sthavirau pitarāv api /
putrān bhāryāṃ ca kula-jāṃ kṣudrāḥ śiśnodaraṃ-bharāḥ

kalau na rājan jagatāṃ paraṃ guruṃ tri-loka-nāthānata-pāda-paṅkajam /
prāyeṇa martyā bhagavantam acyutaṃ yakṣyanti pāṣaṇḍa-vibhinna-cetasaḥ

yan-nāmadheyaṃ mriyamāṇa āturaḥ patan skhalan vā vivaśo gṛṇan pumān /
vimukta-karmārgala uttamāṃ gatiṃ prāpnoti yakṣyanti na taṃ kalau janāḥ

puṃsāṃ kali-kṛtān doṣān dravya-deśātma-sambhavān /
sarvān harati citta-stho bhagavān puruṣottamaḥ

śrutaḥ saṅkīrtito dhyātaḥ pūjitaś cādṛto 'pi vā /
nṛṇāṃ dhunoti bhagavān hṛt-stho janmāyutāśubham

yathā hemni sthito vahnir durvarṇaṃ hanti dhātu-jam /
evam ātma-gato viṣṇur yoginām aśubhāśayam

vidyā-tapaḥ-prāṇa-nirodha-maitrī- tīrthābhiṣeka-vrata-dāna-japyaiḥ /
nātyanta-śuddhiṃ labhate 'ntarātmā yathā hṛdi-sthe bhagavaty anante

tasmāt sarvātmanā rājan hṛdi-sthaṃ kuru keśavam /
mriyamāṇo hy avahitas tato yāsi parāṃ gatim

mriyamāṇair abhidhyeyo bhagavān parameśvaraḥ /
ātma-bhāvaṃ nayaty aṅga sarvātmā sarva-saṃśrayaḥ

kaler doṣa-nidhe rājann asti hy eko mahān guṇaḥ /
kīrtanād eva kṛṣṇasya mukta-saṅgaḥ paraṃ vrajet

kṛte yad dhyāyato viṣṇuṃ tretāyāṃ yajato makhaiḥ /
dvāpare paricaryāyāṃ kalau tad dhari-kīrtanāt