Bhagavata Purana · Chapter 12.02

BhP_12.02.001/0 śrī-śuka uvāca
tataś cānu-dinaṃ dharmaḥ satyaṃ śaucaṃ kṣamā dayā /
kālena balinā rājan naṅkṣyaty āyur balaṃ smṛtiḥ

vittam eva kalau nṝṇāṃ janmācāra-guṇodayaḥ /
dharma-nyāya-vyavasthāyāṃ kāraṇaṃ balam eva hi

dāmpatye 'bhirucir hetur māyaiva vyāvahārike /
strītve puṃstve ca hi ratir vipratve sūtram eva hi

liṅgaṃ evāśrama-khyātāv anyonyāpatti-kāraṇam /
avṛttyā nyāya-daurbalyaṃ pāṇḍitye cāpalaṃ vacaḥ

anāḍhyataivāsādhutve sādhutve dambha eva tu /
svīkāra eva codvāhe snānam eva prasādhanam

dūre vāry-ayanaṃ tīrthaṃ lāvaṇyaṃ keśa-dhāraṇam /
udaraṃ-bharatā svārthaḥ satyatve dhārṣṭyam eva hi

dākṣyaṃ kuṭumba-bharaṇaṃ yaśo 'rthe dharma-sevanam /
evaṃ prajābhir duṣṭābhir ākīrṇe kṣiti-maṇḍale

brahma-viṭ-kṣatra-śūdrāṇāṃ yo balī bhavitā nṛpaḥ /
prajā hi lubdhai rājanyair nirghṛṇair dasyu-dharmabhiḥ

ācchinna-dāra-draviṇā yāsyanti giri-kānanam /
śāka-mūlāmiṣa-kṣaudra- phala-puṣpāṣṭi-bhojanāḥ

anāvṛṣṭyā vinaṅkṣyanti durbhikṣa-kara-pīḍitāḥ /
śīta-vātātapa-prāvṛḍ- himair anyonyataḥ prajāḥ

kṣut-tṛḍbhyāṃ vyādhibhiś caiva santapsyante ca cintayā /
triṃśad viṃśati varṣāṇi paramāyuḥ kalau nṛṇām

kṣīyamāṇeṣu deheṣu dehināṃ kali-doṣataḥ /
varṇāśramavatāṃ dharme naṣṭe veda-pathe nṛṇām

pāṣaṇḍa-pracure dharme dasyu-prāyeṣu rājasu /
cauryānṛta-vṛthā-hiṃsā- nānā-vṛttiṣu vai nṛṣu

śūdra-prāyeṣu varṇeṣu cchāga-prāyāsu dhenuṣu /
gṛha-prāyeṣv āśrameṣu yauna-prāyeṣu bandhuṣu

aṇu-prāyāsv oṣadhīṣu śamī-prāyeṣu sthāsnuṣu /
vidyut-prāyeṣu megheṣu śūnya-prāyeṣu sadmasu

itthaṃ kalau gata-prāye janeṣu khara-dharmiṣu /
dharma-trāṇāya sattvena bhagavān avatariṣyati

carācara-guror viṣṇor īśvarasyākhilātmanaḥ /
dharma-trāṇāya sādhūnāṃ janma karmāpanuttaye

śambhala-grāma-mukhyasya brāhmaṇasya mahātmanaḥ /
bhavane viṣṇuyaśasaḥ kalkiḥ prādurbhaviṣyati

aśvam āśu-gam āruhya devadattaṃ jagat-patiḥ /
asināsādhu-damanam aṣṭaiśvarya-guṇānvitaḥ

vicarann āśunā kṣauṇyāṃ hayenāpratima-dyutiḥ /
nṛpa-liṅga-cchado dasyūn koṭiśo nihaniṣyati

atha teṣāṃ bhaviṣyanti manāṃsi viśadāni vai /
vāsudevāṅga-rāgāti- puṇya-gandhānila-spṛśām /
paura-jānapadānāṃ vai hateṣv akhila-dasyuṣu

teṣāṃ prajā-visargaś ca sthaviṣṭhaḥ sambhaviṣyati /
vāsudeve bhagavati sattva-mūrtau hṛdi sthite

yadāvatīrṇo bhagavān kalkir dharma-patir hariḥ /
kṛtaṃ bhaviṣyati tadā prajā-sūtiś ca sāttvikī

yadā candraś ca sūryaś ca tathā tiṣya-bṛhaspatī /
eka-rāśau sameṣyanti bhaviṣyati tadā kṛtam

ye 'tītā vartamānā ye bhaviṣyanti ca pārthivāḥ /
te ta uddeśataḥ proktā vaṃśīyāḥ soma-sūryayoḥ

ārabhya bhavato janma yāvan nandābhiṣecanam /
etad varṣa-sahasraṃ tu śataṃ pañcadaśottaram

saptarṣīṇāṃ tu yau pūrvau dṛśyete uditau divi /
tayos tu madhye nakṣatraṃ dṛśyate yat samaṃ niśi

tenaiva ṛṣayo yuktās tiṣṭhanty abda-śataṃ nṛṇām /
te tvadīye dvijāḥ kāla adhunā cāśritā maghāḥ

viṣṇor bhagavato bhānuḥ kṛṣṇākhyo 'sau divaṃ gataḥ /
tadāviśat kalir lokaṃ pāpe yad ramate janaḥ

yāvat sa pāda-padmābhyāṃ spṛśan āste ramā-patiḥ /
tāvat kalir vai pṛthivīṃ parākrantuṃ na cāśakat

yadā devarṣayaḥ sapta maghāsu vicaranti hi /
tadā pravṛttas tu kalir dvādaśābda-śatātmakaḥ

yadā maghābhyo yāsyanti pūrvāṣāḍhāṃ maharṣayaḥ /
tadā nandāt prabhṛty eṣa kalir vṛddhiṃ gamiṣyati

yasmin kṛṣṇo divaṃ yātas tasminn eva tadāhani /
pratipannaṃ kali-yugam iti prāhuḥ purā-vidaḥ

divyābdānāṃ sahasrānte caturthe tu punaḥ kṛtam /
bhaviṣyati tadā nṝṇāṃ mana ātma-prakāśakam

ity eṣa mānavo vaṃśo yathā saṅkhyāyate bhuvi /
tathā viṭ-śūdra-viprāṇāṃ tās tā jñeyā yuge yuge

eteṣāṃ nāma-liṅgānāṃ puruṣāṇāṃ mahātmanām /
kathā-mātrāvaśiṣṭānāṃ kīrtir eva sthitā bhuvi

devāpiḥ śāntanor bhrātā maruś cekṣvāku-vaṃśa-jaḥ /
kalāpa-grāma āsāte mahā-yoga-balānvitau

tāv ihaitya kaler ante vāsudevānuśikṣitau /
varṇāśrama-yutaṃ dharmaṃ pūrva-vat prathayiṣyataḥ

kṛtaṃ tretā dvāparaṃ ca kaliś ceti catur-yugam /
anena krama-yogena bhuvi prāṇiṣu vartate

rājann ete mayā proktā nara-devās tathāpare /
bhūmau mamatvaṃ kṛtvānte hitvemāṃ nidhanaṃ gatāḥ

kṛmi-viḍ-bhasma-saṃjñānte rāja-nāmno 'pi yasya ca /
bhūta-dhruk tat-kṛte svārthaṃ kiṃ veda nirayo yataḥ

kathaṃ seyam akhaṇḍā bhūḥ pūrvair me puruṣair dhṛtā /
mat-putrasya ca pautrasya mat-pūrvā vaṃśa-jasya vā

tejo-'b-anna-mayaṃ kāyaṃ gṛhītvātmatayābudhāḥ /
mahīṃ mamatayā cobhau hitvānte 'darśanaṃ gatāḥ

ye ye bhū-patayo rājan bhuñjate bhuvam ojasā /
kālena te kṛtāḥ sarve kathā-mātrāḥ kathāsu ca