Bhagavata Purana · Chapter 11.29

BhP_11.29.001/0 śrī-uddhava uvāca
su-dustarām imāṃ manye yoga-caryām anātmanaḥ /
yathāñjasā pumān siddhyet tan me brūhy añjasācyuta

prāyaśaḥ puṇdarīkākṣa yuñyanto yogino manaḥ /
viṣīdanty asamādhānān mano-nigraha-karśitāḥ

athāta ānanda-dughaṃ padāmbujaṃ haṃsāḥ śrayerann aravinda-locana /
sukhaṃ nu viśveśvara yoga-karmabhis tvan-māyayāmī vihatā na māninaḥ

kiṃ citram acyuta tavaitad aśeṣa-bandho dāseṣv ananya-śaraṇesu yad ātma-sāttvam /
yo 'rocayat saha mṛgaiḥ svayam īśvarāṇāṃ śrīmat-kirīṭa-taṭa-pīḍita-pāda-pīṭhaḥ

taṃ tvākhilātma-dayiteśvaram āśritānāṃ $ sarvārtha-daṃ sva-kṛta-vid visṛjeta ko nu &
ko vā bhajet kim api vismṛtaye 'nu bhūtyai % kiṃ vā bhaven na tava pāda-rajo-juṣāṃ naḥ // BhP_11.29.005* //
naivopayanty apacitiṃ kavayas taveśa $ brahmāyuṣāpi kṛtam ṛddha-mudaḥ smarantaḥ &
naivopayanty apacitiṃ kavayas taveśa $ brahmāyuṣāpi kṛtam ṛddha-mudaḥ smarantaḥ &
yo 'ntar bahis tanu-bhṛtām aśubhaṃ vidhunvann % ācārya-caittya-vapuṣā sva-gatiṃ vyanakti // BhP_11.29.006*
0 śrī-śuka uvāca
ity uddhavenāty-anurakta-cetasā pṛṣṭo jagat-krīḍanakaḥ sva-śaktibhiḥ /
gṛhīta-mūrti-traya īśvareśvaro jagāda sa-prema-manohara-smitaḥ

BhP_11.29.008/0 śrī-bhagavān uvāca
hanta te kathayiṣyāmi mama dharmān su-maṅgalān /
yān śraddhayācaran martyo mṛtyuṃ jayati durjayam

kuryāt sarvāṇi karmāṇi mad-arthaṃ śanakaiḥ smaran /
mayy arpita-manaś-citto mad-dharmātma-mano-ratiḥ

deśān puṇyān āśrayeta mad-bhaktaiḥ sādhubhiḥ śritān /
devāsura-manuṣyeṣu mad-bhaktācaritāni ca

pṛthak satreṇa vā mahyaṃ parva-yātrā-mahotsavān /
kārayed gīta-nṛtyādyair mahārāja-vibhūtibhiḥ

mām eva sarva-bhūteṣu bahir antar apāvṛtam /
īkṣetātmani cātmānaṃ yathā kham amalāśayaḥ

iti sarvāṇi bhūtāni mad-bhāvena mahā-dyute /
sabhājayan manyamāno jñānaṃ kevalam āśritaḥ

brāhmaṇe pukkase stene brahmaṇye 'rke sphuliṅgake /
akrūre krūrake caiva sama-dṛk paṇḍito mataḥ

nareṣv abhīkṣṇaṃ mad-bhāvaṃ puṃso bhāvayato 'cirāt /
spardhāsūyā-tiraskārāḥ sāhaṅkārā viyanti hi

visṛjya smayamānān svān dṛśaṃ vrīḍāṃ ca daihikīm /
praṇamed daṇḍa-vad bhūmāv ā-śva-cāṇḍāla-go-kharam

yāvat sarveṣu bhūteṣu mad-bhāvo nopajāyate /
tāvad evam upāsīta vāṅ-manaḥ-kāya-vṛttibhiḥ

sarvaṃ brahmātmakaṃ tasya vidyayātma-manīṣayā /
paripaśyann uparamet sarvato muita-saṃśayaḥ

ayaṃ hi sarva-kalpānāṃ sadhrīcīno mato mama /
mad-bhāvaḥ sarva-bhūteṣu mano-vāk-kāya-vṛttibhiḥ

na hy aṅgopakrame dhvaṃso mad-dharmasyoddhavāṇv api /
mayā vyavasitaḥ samyaṅ nirguṇatvād anāśiṣaḥ

yo yo mayi pare dharmaḥ kalpyate niṣphalāya cet /
tad-āyāso nirarthaḥ syād bhayāder iva sattama

eṣā buddhimatāṃ buddhir manīṣā ca manīṣiṇām /
yat satyam anṛteneha martyenāpnoti māmṛtam

eṣa te 'bhihitaḥ kṛtsno brahma-vādasya saṅgrahaḥ /
samāsa-vyāsa-vidhinā devānām api durgamaḥ

abhīkṣṇaśas te gaditaṃ jñānaṃ vispaṣṭa-yuktimat /
etad vijñāya mucyeta puruṣo naṣṭa-saṃśayaḥ

su-viviktaṃ tava praśnaṃ mayaitad api dhārayet /
sanātanaṃ brahma-guhyaṃ paraṃ brahmādhigacchati

ya etan mama bhakteṣu sampradadyāt su-puṣkalam /
tasyāhaṃ brahma-dāyasya dadāmy ātmānam ātmanā

ya etat samadhīyīta pavitraṃ paramaṃ śuci /
sa pūyetāhar ahar māṃ jñāna-dīpena darśayan

ya etac chraddhayā nityam avyagraḥ śṛṇuyān naraḥ /
mayi bhaktiṃ parāṃ kurvan karmabhir na sa badhyate

apy uddhava tvayā brahma sakhe samavadhāritam /
api te vigato mohaḥ śokaś cāsau mano-bhavaḥ

naitat tvayā dāmbhikāya nāstikāya śaṭhāya ca /
aśuśrūṣor abhaktāya durvinītāya dīyatām

etair doṣair vihīnāya brahmaṇyāya priyāya ca /
sādhave śucaye brūyād bhaktiḥ syāc chūdra-yoṣitām

naitad vijñāya jijñāsor jñātavyam avaśiṣyate /
pītvā pīyūṣam amṛtaṃ pātavyaṃ nāvaśiṣyate

jñāne karmaṇi yoge ca vārtāyāṃ daṇḍa-dhāraṇe /
yāvān artho nṛṇāṃ tāta tāvāṃs te 'haṃ catur-vidhaḥ

martyo yadā tyakta-samasta-karmā niveditātmā vicikīrṣito me /
tadāmṛtatvaṃ pratipadyamāno mayātma-bhūyāya ca kalpate vai

BhP_11.29.035/0 śrī-śuka uvāca
sa evam ādarśita-yoga-mārgas tadottamaḥśloka-vaco niśamya /
baddhāñjaliḥ prīty-uparuddha-kaṇṭho na kiñcid ūce 'śru-pariplutākṣaḥ

viṣṭabhya cittaṃ praṇayāvaghūrṇaṃ dhairyeṇa rājan bahu-manyamānaḥ /
kṛtāñjaliḥ prāha yadu-pravīraṃ śīrṣṇā spṛśaṃs tac-caraṇāravindam

BhP_11.29.037/0 śrī-uddhava uvāca
vidrāvito moha-mahāndhakāro ya āśrito me tava sannidhānāt /
vibhāvasoḥ kiṃ nu samīpa-gasya śītaṃ tamo bhīḥ prabhavanty ajādya

pratyarpito me bhavatānukampinā bhṛtyāya vijñāna-mayaḥ pradīpaḥ /
hitvā kṛta-jñas tava pāda-mūlaṃ ko 'nyaṃ samīyāc charaṇaṃ tvadīyam

vṛkṇaś ca me su-dṛḍhaḥ sneha-pāśo dāśārha-vṛṣṇy-andhaka-sātvateṣu /
prasāritaḥ sṛṣṭi-vivṛddhaye tvayā sva-māyayā hy ātma-subodha-hetinā

namo 'stu te mahā-yogin prapannam anuśādhi mām /
yathā tvac-caraṇāmbhoje ratiḥ syād anapāyinī

BhP_11.29.041/0 śrī-bhagavān uvāca
gacchoddhava mayādiṣṭo badary-ākhyaṃ mamāśramam /
tatra mat-pāda-tīrthode snānopasparśanaiḥ śuciḥ

īkṣayālakanandāyā vidhūtāśeṣa-kalmaṣaḥ /
vasāno valkalāny aṅga vanya-bhuk sukha-niḥspṛhaḥ

titikṣur dvandva-mātrāṇāṃ suśīlaḥ saṃyatendriyaḥ /
śāntaḥ samāhita-dhiyā jñāna-vijñāna-saṃyutaḥ

matto 'nuśikṣitaṃ yat te viviktam anubhāvayan /
mayy āveśita-vāk-citto mad-dharma-nirato bhava /
ativrajya gatīs tisro mām eṣyasi tataḥ param

BhP_11.29.045/0 śrī-śuka uvāca
sa evam ukto hari-medhasoddhavaḥ pradakṣiṇaṃ taṃ parisṛtya pādayoḥ /
śiro nidhāyāśru-kalābhir ārdra-dhīr nyaṣiñcad advandva-paro 'py apakrame

su-dustyaja-sneha-viyoga-kātaro na śaknuvaṃs taṃ parihātum āturaḥ /
kṛcchraṃ yayau mūrdhani bhartṛ-pāduke bibhran namaskṛtya yayau punaḥ punaḥ

tatas tam antar hṛdi sanniveśya gato mahā-bhāgavato viśālām /
yathopadiṣṭāṃ jagad-eka-bandhunā tapaḥ samāsthāya harer agād gatim

ya etad ānanda-samudra-sambhṛtaṃ jñānāmṛtaṃ bhāgavatāya bhāṣitam /
kṛṣṇena yogeśvara-sevitāṅghriṇā sac-chraddhayāsevya jagad vimucyate