Bhagavata Purana · Chapter 11.26

BhP_11.26.001/0 śrī-bhagavān uvāca
mal-lakṣaṇam imaṃ kāyaṃ labdhvā mad-dharma āsthitaḥ /
ānandaṃ paramātmānam ātma-sthaṃ samupaiti mām

guṇa-mayyā jīva-yonyā vimukto jñāna-niṣṭhayā /
guṇeṣu māyā-mātreṣu dṛśyamāneṣv avastutaḥ /
vartamāno 'pi na pumān yujyate 'vastubhir guṇaiḥ

saṅgaṃ na kuryād asatāṃ śiśnodara-tṛpāṃ kvacit /
tasyānugas tamasy andhe pataty andhānugāndha-vat

ailaḥ samrāḍ imāṃ gāthām agāyata bṛhac-chravāḥ /
urvaśī-virahān muhyan nirviṇṇaḥ śoka-saṃyame

tyaktvātmānaṃ vrayantīṃ tāṃ nagna unmatta-van nṛpaḥ /
vilapann anvagāj jāye ghore tiṣṭheti viklavaḥ

kāmān atṛpto 'nujuṣan kṣullakān varṣa-yāminīḥ /
na veda yāntīr nāyāntīr urvaśy-ākṛṣṭa-cetanaḥ

BhP_11.26.007/0 aila uvāca
aho me moha-vistāraḥ kāma-kaśmala-cetasaḥ /
devyā gṛhīta-kaṇṭhasya nāyuḥ-khaṇḍā ime smṛtāḥ

nāhaṃ vedābhinirmuktaḥ sūryo vābhyudito 'muyā /
mūṣito varṣa-pūgānāṃ batāhāni gatāny uta

aho me ātma-sammoho yenātmā yoṣitāṃ kṛtaḥ /
krīḍā-mṛgaś cakravartī naradeva-śikhāmaṇiḥ

sa-paricchadam ātmānaṃ hitvā tṛṇam iveśvaram /
yāntīṃ striyaṃ cānvagamaṃ nagna unmatta-vad rudan

kutas tasyānubhāvaḥ syāt teja īśatvam eva vā /
yo 'nvagacchaṃ striyaṃ yāntīṃ khara-vat pāda-tāḍitaḥ

kiṃ vidyayā kiṃ tapasā kiṃ tyāgena śrutena vā /
kiṃ viviktena maunena strībhir yasya mano hṛtam

svārthasyākovidaṃ dhiṅ māṃ mūrkhaṃ paṇḍita-māninam /
yo 'ham īśvaratāṃ prāpya strībhir go-khara-vaj jitaḥ

sevato varṣa-pūgān me urvaśyā adharāsavam /
na tṛpyaty ātma-bhūḥ kāmo vahnir āhutibhir yathā

puṃścalyāpahṛtaṃ cittaṃ ko nv anyo mocituṃ prabhuḥ /
ātmārāmeśvaram ṛte bhagavantam adhokṣajam

bodhitasyāpi devyā me sūkta-vākyena durmateḥ /
mano-gato mahā-moho nāpayāty ajitātmanaḥ

kim etayā no 'pakṛtaṃ rajjvā vā sarpa-cetasaḥ /
draṣṭuḥ svarūpāviduṣo yo 'haṃ yad ajitendriyaḥ

kvāyaṃ malīmasaḥ kāyo daurgandhyādy-ātmako 'śuciḥ /
kva guṇāḥ saumanasyādyā hy adhyāso 'vidyayā kṛtaḥ

pitroḥ kiṃ svaṃ nu bhāryāyāḥ svāmino 'gneḥ śva-gṛdhrayoḥ /
kim ātmanaḥ kiṃ suhṛdām iti yo nāvasīyate

tasmin kalevare 'medhye tuccha-niṣṭhe viṣajjate /
aho su-bhadraṃ su-nasaṃ su-smitaṃ ca mukhaṃ striyaḥ

tvaṅ-māṃsa-rudhira-snāyu- medo-majjāsthi-saṃhatau /
viṇ-mūtra-pūye ramatāṃ kṛmīṇāṃ kiyad antaram

athāpi nopasajjeta strīṣu straiṇeṣu cārtha-vit /
viṣayendriya-saṃyogān manaḥ kṣubhyati nānyathā

adṛṣṭād aśrutād bhāvān na bhāva upajāyate /
asamprayuñjataḥ prāṇān śāmyati stimitaṃ manaḥ

tasmāt saṅgo na kartavyaḥ strīṣu straiṇeṣu cendriyaiḥ /
viduṣāṃ cāpy avisrabdhaḥ ṣaḍ-vargaḥ kim u mādṛśām

BhP_11.26.025/0 śrī-bhagavān uvāca
evaṃ pragāyan nṛpa-deva-devaḥ sa urvaśī-lokam atho vihāya /
ātmānam ātmany avagamya māṃ vai upāramaj jñāana-vidhūta-mohaḥ

tato duḥsaṅgam utsṛjya satsu sajjeta buddhimān /
santa evāsya chindanti mano-vyāsaṅgam uktibhiḥ

santo 'napekṣā mac-cittāḥ praśāntāḥ sama-darśinaḥ /
nirmamā nirahaṅkārā nirdvandvā niṣparigrahāḥ

teṣu nityaṃ mahā-bhāga mahā-bhāgeṣu mat-kathāḥ /
sambhavanti hi tā nṝṇāṃ juṣatāṃ prapunanty agham

tā ye śṛṇvanti gāyanti hy anumodanti cādṛtāḥ /
mat-parāḥ śraddadhānāś ca bhaktiṃ vindanti te mayi

bhaktiṃ labdhavataḥ sādhoḥ kim anyad avaśiṣyate /
mayy ananta-guṇe brahmaṇy ānandānubhavātmani

yathopaśrayamāṇasya bhagavantaṃ vibhāvasum /
śītaṃ bhayaṃ tamo 'pyeti sādhūn saṃsevatas tathā

nimajjyonmajjatāṃ ghore bhavābdhau paramāyaṇam /
santo brahma-vidaḥ śāntā naur dṛḍhevāpsu majjatām

annaṃ hi prāṇināṃ prāṇa ārtānāṃ śaraṇaṃ tv aham /
dharmo vittaṃ nṛṇāṃ pretya santo 'rvāg bibhyato 'raṇam

santo diśanti cakṣūṃsi bahir arkaḥ samutthitaḥ /
devatā bāndhavāḥ santaḥ santa ātmāham eva ca

vaitasenas tato 'py evam urvaśyā loka-niṣpṛhaḥ /
mukta-saṅgo mahīm etām ātmārāmaś cacāra ha