Bhagavata Purana · Chapter 11.20

BhP_11.20.001/0 śrī-uddhava uvāca
vidhiś ca pratiṣedhaś ca nigamo hīśvarasya te /
avekṣate 'raviṇḍākṣa guṇaṃ doṣaṃ ca karmaṇām

varṇāśrama-vikalpaṃ ca pratilomānulomajam /
dravya-deśa-vayaḥ-kālān svargaṃ narakam eva ca

guṇa-doṣa-bhidā-dṛṣṭim antareṇa vacas tava /
niḥśreyasaṃ kathaṃ nṝṇāṃ niṣedha-vidhi-lakṣaṇam

pitṛ-deva-manuṣyānāṃ vedaś cakṣus taveśvara /
śreyas tv anupalabdhe 'rthe sādhya-sādhanayor api

guṇa-doṣa-bhidā-dṛṣṭir nigamāt te na hi svataḥ /
nigamenāpavādaś ca bhidāyā iti ha bhramaḥ

BhP_11.20.006/0 śrī-bhagavān uvāca
yogās trayo mayā proktā nṝṇāṃ śreyo-vidhitsayā /
jñānaṃ karma ca bhaktiś ca nopāyo 'nyo 'sti kutracit

nirviṇṇānāṃ jñāna-yogo nyāsinām iha karmasu /
teṣv anirviṇṇa-cittānāṃ karma-yogas tu kāminām

yadṛcchayā mat-kathādau jāta-śraddhas tu yaḥ pumān /
na nirviṇṇo nāti-sakto bhakti-yogo 'sya siddhi-daḥ

tāvat karmāṇi kurvīta na nirvidyeta yāvatā /
mat-kathā-śravaṇādau vā śraddhā yāvan na jāyate

sva-dharma-stho yajan yajñair anāśīḥ-kāma uddhava /
na yāti svarga-narakau yady anyan na samācaret

asmiṃl loke vartamānaḥ sva-dharma-stho 'naghaḥ śuciḥ /
jñānaṃ viśuddham āpnoti mad-bhaktiṃ vā yadṛcchayā

svargiṇo 'py etam icchanti lokaṃ nirayiṇas tathā /
sādhakaṃ jñāna-bhaktibhyām ubhayaṃ tad-asādhakam

na naraḥ svar-gatiṃ kāṅkṣen nārakīṃ vā vicakṣaṇaḥ /
nemaṃ lokaṃ ca kāṅkṣeta dehāveśāt pramādyati

etad vidvān purā mṛtyor abhavāya ghaṭeta saḥ /
apramatta idaṃ jñātvā martyam apy artha-siddhi-dam

chidyamānaṃ yamair etaiḥ kṛta-nīḍaṃ vanaspatim /
khagaḥ sva-ketam utsṛjya kṣemaṃ yāti hy alampaṭaḥ

aho-rātraiś chidyamānaṃ buddhvāyur bhaya-vepathuḥ /
mukta-saṅgaḥ paraṃ buddhvā nirīha upaśāmyati

nṛ-deham ādyaṃ su-labhaṃ su-durlabhaṃ $ plavaṃ su-kalpaṃ guru-karṇadhāram &
mayānukūlena nabhasvateritaṃ % pumān bhavābdhiṃ na taret sa ātma-hā // BhP_11.20.017* //
yadārambheṣu nirviṇṇo viraktaḥ saṃyatendriyaḥ /
abhyāsenātmano yogī dhārayed acalaṃ manaḥ

dhāryamāṇaṃ mano yarhi bhrāmyad aśv anavasthitam /
atandrito 'nurodhena mārgeṇātma-vaśaṃ nayet

mano-gatiṃ na visṛjej jita-prāṇo jitendriyaḥ /
sattva-sampannayā buddhyā mana ātma-vaśaṃ nayet

eṣa vai paramo yogo manasaḥ saṅgrahaḥ smṛtaḥ /
hṛdaya-jñatvam anvicchan damyasyevārvato muhuḥ

sāṅkhyena sarva-bhāvānāṃ pratilomānulomataḥ /
bhavāpyayāv anudhyāyen mano yāvat prasīdati

nirviṇṇasya viraktasya puruṣasyokta-vedinaḥ /
manas tyajati daurātmyaṃ cintitasyānucintayā

yamādibhir yoga-pathair ānvīkṣikyā ca vidyayā /
mamārcopāsanābhir vā nānyair yogyaṃ smaren manaḥ

yadi kuryāt pramādena yogī karma vigarhitam /
yogenaiva dahed aṃho nānyat tatra kadācana

sve sve 'dhikāre yā niṣṭhā sa guṇaḥ parikīrtitaḥ /
karmaṇāṃ jāty-aśuddhānām anena niyamaḥ kṛtaḥ /
guṇa-doṣa-vidhānena saṅgānāṃ tyājanecchayā

jāta-śraddho mat-kathāsu nirviṇṇaḥ sarva-karmasu /
veda duḥkhātmakān kāmān parityāge 'py anīśvaraḥ

tato bhajeta māṃ prītaḥ śraddhālur dṛḍha-niścayaḥ /
juṣamāṇaś ca tān kāmān duḥkhodarkāṃś ca garhayan

proktena bhakti-yogena bhajato māsakṛn muneḥ /
kāmā hṛdayyā naśyanti sarve mayi hṛdi sthite

bhidyate hṛdaya-granthiś chidyante sarva-saṃśayāḥ /
kṣīyante cāsya karmāṇi mayi dṛṣṭe 'khilātmani

tasmān mad-bhakti-yuktasya yogino vai mad-ātmanaḥ /
na jñānaṃ na ca vairāgyaṃ prāyaḥ śreyo bhaved iha

yat karmabhir yat tapasā jñāna-vairāgyataś ca yat /
yogena dāna-dharmeṇa śreyobhir itarair api

sarvaṃ mad-bhakti-yogena mad-bhakto labhate 'ñjasā /
svargāpavargaṃ mad-dhāma kathañcid yadi vāñchati

na kiñcit sādhavo dhīrā bhaktā hy ekāntino mama /
vāñchanty api mayā dattaṃ kaivalyam apunar-bhavam

nairapekṣyaṃ paraṃ prāhur niḥśreyasam analpakam /
tasmān nirāśiṣo bhaktir nirapekṣasya me bhavet

na mayy ekānta-bhaktānāṃ guṇa-doṣodbhavā guṇāḥ /
sādhūnāṃ sama-cittānāṃ buddheḥ param upeyuṣām

evam etān mayā diṣṭān anutiṣṭhanti me pathaḥ /
kṣemaṃ vindanti mat-sthānaṃ yad brahma paramaṃ viduḥ