Bhagavata Purana · Chapter 11.14

BhP_11.14.001/0 śrī-uddhava uvāca
vadanti kṛṣṇa śreyāṃsi bahūni brahma-vādinaḥ /
teṣāṃ vikalpa-prādhānyam utāho eka-mukhyatā

bhavatodāhṛtaḥ svāmin bhakti-yogo 'napekṣitaḥ /
nirasya sarvataḥ saṅgaṃ yena tvayy āviśen manaḥ

BhP_11.14.003/0 śrī-bhagavān uvāca
kālena naṣṭā pralaye vāṇīyaṃ veda-saṃjñitā /
mayādau brahmaṇe proktā dharmo yasyāṃ mad-ātmakaḥ

tena proktā sva-putrāya manave pūrva-jāya sā /
tato bhṛgv-ādayo 'gṛhṇan sapta brahma-maharṣayaḥ

tebhyaḥ pitṛbhyas tat-putrā deva-dānava-guhyakāḥ /
manuṣyāḥ siddha-gandharvāḥ sa-vidyādhara-cāraṇāḥ

kindevāḥ kinnarā nāgā rakṣaḥ-kimpuruṣādayaḥ /
bahvyas teṣāṃ prakṛtayo rajaḥ-sattva-tamo-bhuvaḥ

yābhir bhūtāni bhidyante bhūtānāṃ patayas tathā /
yathā-prakṛti sarveṣāṃ citrā vācaḥ sravanti hi

evaṃ prakṛti-vaicitryād bhidyante matayo nṛṇām /
pāramparyeṇa keṣāñcit pāṣaṇḍa-matayo 'pare

man-māyā-mohita-dhiyaḥ puruṣāḥ puruṣarṣabha /
śreyo vadanty anekāntaṃ yathā-karma yathā-ruci

dharmam eke yaśaś cānye kāmaṃ satyaṃ damaṃ śamam /
anye vadanti svārthaṃ vā aiśvaryaṃ tyāga-bhojanam /
kecid yajñaṃ tapo dānaṃ vratāni niyamān yamān

ādy-anta-vanta evaiṣāṃ lokāḥ karma-vinirmitāḥ /
duḥkhodarkās tamo-niṣṭhāḥ kṣudrā mandāḥ śucārpitāḥ

mayy arpitātmanaḥ sabhya nirapekṣasya sarvataḥ /
mayātmanā sukhaṃ yat tat kutaḥ syād viṣayātmanām

akiñcanasya dāntasya śāntasya sama-cetasaḥ /
mayā santuṣṭa-manasaḥ sarvāḥ sukha-mayā diśaḥ

na pārameṣṭhyaṃ na mahendra-dhiṣṇyaṃ $ na sārvabhaumaṃ na rasādhipatyam &
na yoga-siddhīr apunar-bhavaṃ vā % mayy arpitātmecchati mad vinānyat // BhP_11.14.014* //
na tathā me priyatama ātma-yonir na śaṅkaraḥ /
na ca saṅkarṣaṇo na śrīr naivātmā ca yathā bhavān

nirapekṣaṃ muniṃ śāntaṃ nirvairaṃ sama-darśanam /
anuvrajāmy ahaṃ nityaṃ pūyeyety aṅghri-reṇubhiḥ

niṣkiñcanā mayy anurakta-cetasaḥ śāntā mahānto 'khila-jīva-vatsalāḥ /
kāmair anālabdha-dhiyo juṣanti te yan nairapekṣyaṃ na viduḥ sukhaṃ mama

bādhyamāno 'pi mad-bhakto viṣayair ajitendriyaḥ /
prāyaḥ pragalbhayā bhaktyā viṣayair nābhibhūyate

yathāgniḥ su-samṛddhārciḥ karoty edhāṃsi bhasmasāt /
tathā mad-viṣayā bhaktir uddhavaināṃsi kṛtsnaśaḥ

na sādhayati māṃ yogo na sāṅkhyaṃ dharma uddhava /
na svādhyāyas tapas tyāgo yathā bhaktir mamorjitā

bhaktyāham ekayā grāhyaḥ śraddhayātmā priyaḥ satām /
bhaktiḥ punāti man-niṣṭhā śva-pākān api sambhavāt

dharmaḥ satya-dayopeto vidyā vā tapasānvitā /
mad-bhaktyāpetam ātmānaṃ na samyak prapunāti hi

kathaṃ vinā roma-harṣaṃ dravatā cetasā vinā /
vinānandāśru-kalayā śudhyed bhaktyā vināśayaḥ

vāg gadgadā dravate yasya cittaṃ rudaty abhīkṣṇaṃ hasati kvacic ca /
vilajja udgāyati nṛtyate ca mad-bhakti-yukto bhuvanaṃ punāti

yathāgninā hema malaṃ jahāti dhmātaṃ punaḥ svaṃ bhajate ca rūpam /
ātmā ca karmānuśayaṃ vidhūya mad-bhakti-yogena bhajaty atho mām

yathā yathātmā parimṛjyate 'sau mat-puṇya-gāthā-śravaṇābhidhānaiḥ /
tathā tathā paśyati vastu sūkṣmaṃ cakṣur yathaivāñjana-samprayuktam

viṣayān dhyāyataś cittaṃ viṣayeṣu viṣajjate /
mām anusmarataś cittaṃ mayy eva pravilīyate

tasmād asad-abhidhyānaṃ yathā svapna-manoratham /
hitvā mayi samādhatsva mano mad-bhāva-bhāvitam

strīṇāṃ strī-saṅgināṃ saṅgaṃ tyaktvā dūrata ātmavān /
kṣeme vivikta āsīnaś cintayen mām atandritaḥ

na tathāsya bhavet kleśo bandhaś cānya-prasaṅgataḥ /
yoṣit-saṅgād yathā puṃso yathā tat-saṅgi-saṅgataḥ

BhP_11.14.031/0 śrī-uddhava uvāca
yathā tvām aravindākṣa yādṛśaṃ vā yad-ātmakam /
dhyāyen mumukṣur etan me dhyānaṃ tvaṃ vaktum arhasi

BhP_11.14.032/0 śrī-bhagavān uvāca
sama āsana āsīnaḥ sama-kāyo yathā-sukham /
hastāv utsaṅga ādhāya sva-nāsāgra-kṛtekṣaṇaḥ

prāṇasya śodhayen mārgaṃ pūra-kumbhaka-recakaiḥ /
viparyayeṇāpi śanair abhyasen nirjitendriyaḥ

hṛdy avicchinam oṃkāraṃ ghaṇṭā-nādaṃ bisorṇa-vat /
prāṇenodīrya tatrātha punaḥ saṃveśayet svaram

evaṃ praṇava-saṃyuktaṃ prāṇam eva samabhyaset /
daśa-kṛtvas tri-ṣavaṇaṃ māsād arvāg jitānilaḥ

hṛt-puṇḍarīkam antaḥ-stham ūrdhva-nālam adho-mukham /
dhyātvordhva-mukham unnidram aṣṭa-patraṃ sa-karṇikam

karṇikāyāṃ nyaset sūrya- somāgnīn uttarottaram /
vahni-madhye smared rūpaṃ mamaitad dhyāna-maṅgalam

samaṃ praśāntaṃ su-mukhaṃ dīrgha-cāru-catur-bhujam /
su-cāru-sundara-grīvaṃ su-kapolaṃ śuci-smitam

samāna-karṇa-vinyasta- sphuran-makara-kuṇḍalam /
hemāmbaraṃ ghana-śyāmaṃ śrīvatsa-śrī-niketanam

śaṅkha-cakra-gadā-padma- vanamālā-vibhūṣitam /
nūpurair vilasat-pādaṃ kaustubha-prabhayā yutam

dyumat-kirīṭa-kaṭaka- kaṭi-sūtrāṅgadāyutam /
sarvāṅga-sundaraṃ hṛdyaṃ prasāda-sumukhekṣanam

su-kumāram abhidhyāyet sarvāṅgeṣu mano dadhat /
indriyāṇīndriyārthebhyo manasākṛṣya tan manaḥ /
buddhyā sārathinā dhīraḥ praṇayen mayi sarvataḥ

tat sarva-vyāpakaṃ cittam ākṛṣyaikatra dhārayet /
nānyāni cintayed bhūyaḥ su-smitaṃ bhāvayen mukham

tatra labdha-padaṃ cittam ākṛṣya vyomni dhārayet /
tac ca tyaktvā mad-āroho na kiñcid api cintayet

evaṃ samāhita-matir mām evātmānam ātmani /
vicaṣṭe mayi sarvātman jyotir jyotiṣi saṃyutam

dhyānenetthaṃ su-tīvreṇa yuñjato yogino manaḥ /
saṃyāsyaty āśu nirvāṇaṃ dravya jñāna-kriyā-bhramaḥ