Bhagavata Purana · Chapter 11.15

BhP_11.15.001/0 śrī-bhagavān uvāca
jitendriyasya yuktasya jita-śvāsasya yoginaḥ /
mayi dhārayataś ceta upatiṣṭhanti siddhayaḥ

BhP_11.15.002/0 śrī-uddhava uvāca
kayā dhāraṇayā kā svit kathaṃ vā siddhir acyuta /
kati vā siddhayo brūhi yogināṃ siddhi-do bhavān

BhP_11.15.003/0 śrī-bhagavān uvāca
siddhayo 'ṣṭādaśa proktā dhāraṇā yoga-pāra-gaiḥ /
tāsām aṣṭau mat-pradhānā daśaiva guṇa-hetavaḥ

aṇimā mahimā mūrter laghimā prāptir indriyaiḥ /
prākāmyaṃ śruta-dṛṣṭeṣu śakti-preraṇam īśitā

guṇeṣv asaṅgo vaśitā yat-kāmas tad avasyati /
etā me siddhayaḥ saumya aṣṭāv autpattikā matāḥ

anūrmimattvaṃ dehe 'smin dūra-śravaṇa-darśanam /
mano-javaḥ kāma-rūpaṃ para-kāya-praveśanam

svacchanda-mṛtyur devānāṃ saha-krīḍānudarśanam /
yathā-saṅkalpa-saṃsiddhir ājñāpratihatā gatiḥ

tri-kāla-jñatvam advandvaṃ para-cittādy-abhijñatā /
agny-arkāmbu-viṣādīnāṃ pratiṣṭambho 'parājayaḥ

etāś coddeśataḥ proktā yoga-dhāraṇa-siddhayaḥ /
yayā dhāraṇayā yā syād yathā vā syān nibodha me

bhūta-sūkṣmātmani mayi tan-mātraṃ dhārayen manaḥ /
aṇimānam avāpnoti tan-mātropāsako mama

mahat-tattvātmani mayi yathā-saṃsthaṃ mano dadhat /
mahimānam avāpnoti bhūtānāṃ ca pṛthak pṛthak

paramāṇu-maye cittaṃ bhūtānāṃ mayi rañjayan /
kāla-sūkṣmārthatāṃ yogī laghimānam avāpnuyāt

dhārayan mayy ahaṃ-tattve mano vaikārike 'khilam /
sarvendriyāṇām ātmatvaṃ prāptiṃ prāpnoti man-manāḥ

mahaty ātmani yaḥ sūtre dhārayen mayi mānasam /
prākāmyaṃ pārameṣṭhyaṃ me vindate 'vyakta-janmanaḥ

viṣṇau try-adhīśvare cittaṃ dhārayet kāla-vigrahe /
sa īśitvam avāpnoti kṣetrajña-kṣetra-codanām

nārāyaṇe turīyākhye bhagavac-chabda-śabdite /
mano mayy ādadhad yogī mad-dharmā vaśitām iyāt

nirguṇe brahmaṇi mayi dhārayan viśadaṃ manaḥ /
paramānandam āpnoti yatra kāmo 'vasīyate

śvetadvīpa-patau cittaṃ śuddhe dharma-maye mayi /
dhārayañ chvetatāṃ yāti ṣaḍ-ūrmi-rahito naraḥ

mayy ākāśātmani prāṇe manasā ghoṣam udvahan /
tatropalabdhā bhūtānāṃ haṃso vācaḥ śṛṇoty asau

cakṣus tvaṣṭari saṃyojya tvaṣṭāram api cakṣuṣi /
māṃ tatra manasā dhyāyan viśvaṃ paśyati dūrataḥ

mano mayi su-saṃyojya dehaṃ tad-anuvāyunā /
mad-dhāraṇānubhāvena tatrātmā yatra vai manaḥ

yadā mana upādāya yad yad rūpaṃ bubhūṣati /
tat tad bhaven mano-rūpaṃ mad-yoga-balam āśrayaḥ

para-kāyaṃ viśan siddha ātmānaṃ tatra bhāvayet /
piṇḍaṃ hitvā viśet prāṇo vāyu-bhūtaḥ ṣaḍaṅghri-vat

pārṣṇyāpīḍya gudaṃ prāṇaṃ hṛd-uraḥ-kaṇṭha-mūrdhasu /
āropya brahma-randhreṇa brahma nītvotsṛjet tanum

vihariṣyan surākrīḍe mat-sthaṃ sattvaṃ vibhāvayet /
vimānenopatiṣṭhanti sattva-vṛttīḥ sura-striyaḥ

yathā saṅkalpayed buddhyā yadā vā mat-paraḥ pumān /
mayi satye mano yuñjaṃs tathā tat samupāśnute

yo vai mad-bhāvam āpanna īśitur vaśituḥ pumān /
kutaścin na vihanyeta tasya cājñā yathā mama

mad-bhaktyā śuddha-sattvasya yogino dhāraṇā-vidaḥ /
tasya trai-kālikī buddhir janma-mṛtyūpabṛṃhitā

agny-ādibhir na hanyeta muner yoga-mayaṃ vapuḥ /
mad-yoga-śānta-cittasya yādasām udakaṃ yathā

mad-vibhūtīr abhidhyāyan śrīvatsāstra-vibhūṣitāḥ /
dhvajātapatra-vyajanaiḥ sa bhaved aparājitaḥ

upāsakasya mām evaṃ yoga-dhāraṇayā muneḥ /
siddhayaḥ pūrva-kathitā upatiṣṭhanty aśeṣataḥ

jitendriyasya dāntasya jita-śvāsātmano muneḥ /
mad-dhāraṇāṃ dhārayataḥ kā sā siddhiḥ su-durlabhā

antarāyān vadanty etā yuñjato yogam uttamam /
mayā sampadyamānasya kāla-kṣapaṇa-hetavaḥ

janmauṣadhi-tapo-mantrair yāvatīr iha siddhayaḥ /
yogenāpnoti tāḥ sarvā nānyair yoga-gatiṃ vrajet

sarvāsām api siddhīnāṃ hetuḥ patir ahaṃ prabhuḥ /
ahaṃ yogasya sāṅkhyasya dharmasya brahma-vādinām

aham ātmāntaro bāhyo 'nāvṛtaḥ sarva-dehinām /
yathā bhūtāni bhūteṣu bahir antaḥ svayaṃ tathā