Bhagavata Purana · Chapter 10.88

yo 'syotprekṣaka ādi-madhya-nidhane yo 'vyakta-jīveśvaro $ yaḥ sṛṣṭvedam anupraviśya ṛṣiṇā cakre puraḥ śāsti tāḥ &
yaṃ sampadya jahāty ajām anuśayī suptaḥ kulāyaṃ yathā % taṃ kaivalya-nirasta-yonim abhayaṃ dhyāyed ajasraṃ harim // BhP_10.87.050*
0 śrī-rājovāca
devāsura-manuṣyesu ye bhajanty aśivaṃ śivam /
prāyas te dhanino bhojā na tu lakṣmyāḥ patiṃ harim

etad veditum icchāmaḥ sandeho 'tra mahān hi naḥ /
viruddha-śīlayoḥ prabhvor viruddhā bhajatāṃ gatiḥ

BhP_10.88.003/0 śrī-śuka uvāca
śivaḥ śakti-yutaḥ śaśvat tri-liṅgo guṇa-saṃvṛtaḥ /
vaikārikas taijasaś ca tāmasaś cety ahaṃ tridhā

tato vikārā abhavan ṣoḍaśāmīṣu kañcana /
upadhāvan vibhūtīnāṃ sarvāsām aśnute gatim

harir hi nirguṇaḥ sākṣāt puruṣaḥ prakṛteḥ paraḥ /
sa sarva-dṛg upadraṣṭā taṃ bhajan nirguṇo bhavet

nivṛtteṣv aśva-medheṣu rājā yuṣmat-pitāmahaḥ /
śṛṇvan bhagavato dharmān apṛcchad idam acyutam

sa āha bhagavāṃs tasmai prītaḥ śuśrūṣave prabhuḥ /
nṛṇāṃ niḥśreyasārthāya yo 'vatīrṇo yadoḥ kule

BhP_10.88.008/0 śrī-bhagavān uvāca
yasyāham anugṛhṇāmi hariṣye tad-dhanaṃ śanaiḥ /
tato 'dhanaṃ tyajanty asya svajanā duḥkha-duḥkhitam

sa yadā vitathodyogo nirviṇṇaḥ syād dhanehayā /
mat-paraiḥ kṛta-maitrasya kariṣye mad-anugraham

tad brahma paramaṃ sūkṣmaṃ cin-mātraṃ sad anantakam /
vijñāyātmatayā dhīraḥ saṃsārāt parimucyate

ato māṃ su-durārādhyaṃ hitvānyān bhajate janaḥ /
tatas ta āśu-toṣebhyo labdha-rājya-śriyoddhatāḥ /
mattāḥ pramattā vara-dān vismayanty avajānate

BhP_10.88.012/0 śrī-śuka uvāca
śāpa-prasādayor īśā brahma-viṣṇu-śivādayaḥ /
sadyaḥ śāpa-prasādo 'ṅga śivo brahmā na cācyutaḥ

atra codāharantīmam itihāsaṃ purātanam /
vṛkāsurāya giriśo varaṃ dattvāpa saṅkaṭam

vṛko nāmāsuraḥ putraḥ śakuneḥ pathi nāradam /
dṛṣṭvāśu-toṣaṃ papraccha deveṣu triṣu durmatiḥ

sa āha devaṃ giriśam upādhāvāśu siddhyasi /
yo 'lpābhyāṃ guṇa-doṣābhyām āśu tuṣyati kupyati

daśāsya-bāṇayos tuṣṭaḥ stuvator vandinor iva /
aiśvaryam atulaṃ dattvā tata āpa su-saṅkaṭam

ity ādiṣṭas tam asura upādhāvat sva-gātrataḥ /
kedāra ātma-kravyeṇa juhvāno gni-mukhaṃ haram

devopalabdhim aprāpya nirvedāt saptame 'hani /
śiro 'vṛścat sudhitinā tat-tīrtha-klinna-mūrdhajam

tadā mahā-kāruṇiko sa dhūrjaṭir yathā vayaṃ cāgnir ivotthito 'nalāt /
nigṛhya dorbhyāṃ bhujayor nyavārayat tat-sparśanād bhūya upaskṛtākṛtiḥ

tam āha cāṅgālam alaṃ vṛṇīṣva me yathābhikāmaṃ vitarāmi te varam /
prīyeya toyena nṛṇāṃ prapadyatām aho tvayātmā bhṛśam ardyate vṛthā

devaṃ sa vavre pāpīyān varaṃ bhūta-bhayāvaham /
yasya yasya karaṃ śīrṣṇi dhāsye sa mriyatām iti

tac chrutvā bhagavān rudro durmanā iva bhārata /
oṃ iti prahasaṃs tasmai dade 'her amṛtaṃ yathā

sa tad-vara-parīkṣārthaṃ śambhor mūrdhni kilāsuraḥ /
sva-hastaṃ dhātum ārebhe so 'bibhyat sva-kṛtāc chivaḥ

tenopasṛṣṭaḥ santrastaḥ parādhāvan sa-vepathuḥ /
yāvad antaṃ divo bhūmeḥ kaṣṭhānām udagād udak

ajānantaḥ prati-vidhiṃ tūṣṇīm āsan sureśvarāḥ /
tato vaikuṇṭham agamad bhāsvaraṃ tamasaḥ param

yatra nārāyaṇaḥ sākṣān nyāsināṃ paramo gatiḥ /
śāntānāṃ nyasta-daṇḍānāṃ yato nāvartate gataḥ

taṃ tathā vyasanaṃ dṛṣṭvā bhagavān vṛjinārdanaḥ /
dūrāt pratyudiyād bhūtvā baṭuko yoga-māyayā

mekhalājina-daṇḍākṣais tejasāgnir iva jvalan /
abhivādayām āsa ca taṃ kuśa-pāṇir vinīta-vat

BhP_10.88.029/0 śrī-bhagavān uvāca
śākuneya bhavān vyaktaṃ śrāntaḥ kiṃ dūram āgataḥ /
kṣaṇaṃ viśramyatāṃ puṃsa ātmāyaṃ sarva-kāma-dhuk

yadi naḥ śravaṇāyālaṃ yuṣmad-vyavasitaṃ vibho /
bhaṇyatāṃ prāyaśaḥ pumbhir dhṛtaiḥ svārthān samīhate

BhP_10.88.031/0 śrī-śuka uvāca
evaṃ bhagavatā pṛṣṭo vacasāmṛta-varṣiṇā /
gata-klamo 'bravīt tasmai yathā-pūrvam anuṣṭhitam

BhP_10.88.032/0 śrī-bhagavān uvāca
evaṃ cet tarhi tad-vākyaṃ na vayaṃ śraddadhīmahi /
yo dakṣa-śāpāt paiśācyaṃ prāptaḥ preta-piśāca-rāṭ

yadi vas tatra viśrambho dānavendra jagad-gurau /
tarhy aṅgāśu sva-śirasi hastaṃ nyasya pratīyatām

yady asatyaṃ vacaḥ śambhoḥ kathañcid dānavarṣabha /
tadainaṃ jahy asad-vācaṃ na yad vaktānṛtaṃ punaḥ

itthaṃ bhagavataś citrair vacobhiḥ sa su-peśalaiḥ /
bhinna-dhīr vismṛtaḥ śīrṣṇi sva-hastaṃ kumatir nyadhāt

athāpatad bhinna-śirāḥ vrajāhata iva kṣaṇāt /
jaya-śabdo namaḥ-śabdaḥ sādhu-śabdo 'bhavad divi

mumucuḥ puṣpa-varṣāṇi hate pāpe vṛkāsure /
devarṣi-pitṛ-gandharvā mocitaḥ saṅkaṭāc chivaḥ

muktaṃ giriśam abhyāha bhagavān puruṣottamaḥ /
aho deva mahā-deva pāpo 'yaṃ svena pāpmanā

hataḥ ko nu mahatsv īśa jantur vai kṛta-kilbiṣaḥ /
kṣemī syāt kim u viśveśe kṛtāgasko jagad-gurau

ya evam avyākṛta-śakty-udanvataḥ parasya sākṣāt paramātmano hareḥ /
giritra-mokṣaṃ kathayec chṛṇoti vā vimucyate saṃsṛtibhis tathāribhiḥ