Bhagavata Purana · Chapter 10.79

BhP_10.79.001/0 śrī-śuka uvāca
tataḥ parvaṇy upāvṛtte pracaṇḍaḥ pāṃśu-varṣaṇaḥ /
bhīmo vāyur abhūd rājan pūya-gandhas tu sarvaśaḥ

tato 'medhya-mayaṃ varṣaṃ balvalena vinirmitam /
abhavad yajña-śālāyāṃ so 'nvadṛśyata śūla-dhṛk

taṃ vilokya bṛhat-kāyaṃ bhinnāñjana-cayopamam /
tapta-tāmra-śikhā-śmaśruṃ daṃṣṭrogra-bhru-kuṭī-mukham

sasmāra mūṣalaṃ rāmaḥ para-sainya-vidāraṇam /
halaṃ ca daitya-damanaṃ te tūrṇam upatasthatuḥ

tam ākṛṣya halāgreṇa balvalaṃ gagane-caram /
mūṣalenāhanat kruddho mūrdhni brahma-druhaṃ balaḥ

so 'patad bhuvi nirbhinna- lalāṭo 'sṛk samutsṛjan /
muñcann ārta-svaraṃ śailo yathā vajra-hato 'ruṇaḥ

saṃstutya munayo rāmaṃ prayujyāvitathāśiṣaḥ /
abhyaṣiñcan mahā-bhāgā vṛtra-ghnaṃ vibudhā yathā

vaijayantīṃ dadur mālāṃ śrī-dhāmāmlāna-paṅkajāṃ /
rāmāya vāsasī divye divyāny ābharaṇāni ca

atha tair abhyanujñātaḥ kauśikīm etya brāhmaṇaiḥ /
snātvā sarovaram agād yataḥ sarayūr āsravat

anu-srotena sarayūṃ prayāgam upagamya saḥ /
snātvā santarpya devādīn jagāma pulahāśramam

gomatīṃ gaṇḍakīṃ snātvā vipāśāṃ śoṇa āplutaḥ /
gayāṃ gatvā pitṝn iṣṭvā gaṅgā-sāgara-saṅgame

upaspṛśya mahendrādrau rāmaṃ dṛṣṭvābhivādya ca /
sapta-godāvarīṃ veṇāṃ pampāṃ bhīmarathīṃ tataḥ

skandaṃ dṛṣṭvā yayau rāmaḥ śrī-śailaṃ giriśālayam /
draviḍeṣu mahā-puṇyaṃ dṛṣṭvādriṃ veṅkaṭaṃ prabhuḥ

kāma-koṣṇīṃ purīṃ kāñcīṃ kāverīṃ ca sarid-varām /
śrī-rangākhyaṃ mahā-puṇyaṃ yatra sannihito hariḥ

ṛṣabhādriṃ hareḥ kṣetraṃ dakṣiṇāṃ mathurāṃ tathā /
sāmudraṃ setum agamat mahā-pātaka-nāśanam

tatrāyutam adād dhenūr brāhmaṇebhyo halāyudhaḥ /
kṛtamālāṃ tāmraparṇīṃ malayaṃ ca kulācalam

tatrāgastyaṃ samāsīnaṃ namaskṛtyābhivādya ca /
yojitas tena cāśīrbhir anujñāto gato 'rṇavam /
dakṣiṇaṃ tatra kanyākhyāṃ durgāṃ devīṃ dadarśa saḥ

tataḥ phālgunam āsādya pañcāpsarasam uttamam /
viṣṇuḥ sannihito yatra snātvāsparśad gavāyutam

tato 'bhivrajya bhagavān keralāṃs tu trigartakān /
gokarṇākhyaṃ śiva-kṣetraṃ sānnidhyaṃ yatra dhūrjaṭeḥ

āryāṃ dvaipāyanīṃ dṛṣṭvā śūrpārakam agād balaḥ /
tāpīṃ payoṣṇīṃ nirvindhyām upaspṛśyātha daṇḍakam

praviśya revām agamad yatra māhiṣmatī purī /
manu-tīrtham upaspṛśya prabhāsaṃ punar āgamat

śrutvā dvijaiḥ kathyamānaṃ kuru-pāṇḍava-saṃyuge /
sarva-rājanya-nidhanaṃ bhāraṃ mene hṛtaṃ bhuvaḥ

sa bhīma-duryodhanayor gadābhyāṃ yudhyator mṛdhe /
vārayiṣyan vinaśanaṃ jagāma yadu-nandanaḥ

yudhiṣṭhiras tu taṃ dṛṣṭvā yamau kṛṣṇārjunāv api /
abhivādyābhavaṃs tuṣṇīṃ kiṃ vivakṣur ihāgataḥ

gadā-pāṇī ubhau dṛṣṭvā saṃrabdhau vijayaiṣiṇau /
maṇḍalāni vicitrāṇi carantāv idam abravīt

yuvāṃ tulya-balau vīrau he rājan he vṛkodara /
ekaṃ prāṇādhikaṃ manye utaikaṃ śikṣayādhikam

tasmād ekatarasyeha yuvayoḥ sama-vīryayoḥ /
na lakṣyate jayo 'nyo vā viramatv aphalo raṇaḥ

na tad-vākyaṃ jagṛhatur baddha-vairau nṛpārthavat /
anusmarantāv anyonyaṃ duruktaṃ duṣkṛtāni ca

diṣṭaṃ tad anumanvāno rāmo dvāravatīṃ yayau /
ugrasenādibhiḥ prītair jñātibhiḥ samupāgataḥ

taṃ punar naimiṣaṃ prāptam ṛṣayo 'yājayan mudā /
kratv-aṅgaṃ kratubhiḥ sarvair nivṛttākhila-vigraham

tebhyo viśuddhaṃ vijñānaṃ bhagavān vyatarad vibhuḥ /
yenaivātmany ado viśvam ātmānaṃ viśva-gaṃ viduḥ

sva-patyāvabhṛtha-snāto jñāti-bandhu-suhṛd-vṛtaḥ /
reje sva-jyotsnayevenduḥ su-vāsāḥ suṣṭhv alaṅkṛtaḥ

īdṛg-vidhāny asaṅkhyāni balasya bala-śālinaḥ /
anantasyāprameyasya māyā-martyasya santi hi

yo 'nusmareta rāmasya karmāṇy adbhuta-karmaṇaḥ /
sāyaṃ prātar anantasya viṣṇoḥ sa dayito bhavet