ભાગવત પુરાણ · અધ્યાય 10.79

ભ્પ્_10.79.001।0 શ્રી-શુક ઉવાચ
તતઃ પર્વણ્ય્ ઉપાવૃત્તે પ્રચણ્ડઃ પાંશુ-વર્ષણઃ ।
ભીમો વાયુર્ અભૂદ્ રાજન્ પૂય-ગન્ધસ્ તુ સર્વશઃ

તતો ઽમેધ્ય-મયં વર્ષં બલ્વલેન વિનિર્મિતમ્ ।
અભવદ્ યજ્ઞ-શાલાયાં સો ઽન્વદૃશ્યત શૂલ-ધૃક્

તં વિલોક્ય બૃહત્-કાયં ભિન્નાઞ્જન-ચયોપમમ્ ।
તપ્ત-તામ્ર-શિખા-શ્મશ્રું દંષ્ટ્રોગ્ર-ભ્રુ-કુટી-મુખમ્

સસ્માર મૂષલં રામઃ પર-સૈન્ય-વિદારણમ્ ।
હલં ચ દૈત્ય-દમનં તે તૂર્ણમ્ ઉપતસ્થતુઃ

તમ્ આકૃષ્ય હલાગ્રેણ બલ્વલં ગગને-ચરમ્ ।
મૂષલેનાહનત્ ક્રુદ્ધો મૂર્ધ્નિ બ્રહ્મ-દ્રુહં બલઃ

સો ઽપતદ્ ભુવિ નિર્ભિન્ન- લલાટો ઽસૃક્ સમુત્સૃજન્ ।
મુઞ્ચન્ન્ આર્ત-સ્વરં શૈલો યથા વજ્ર-હતો ઽરુણઃ

સંસ્તુત્ય મુનયો રામં પ્રયુજ્યાવિતથાશિષઃ ।
અભ્યષિઞ્ચન્ મહા-ભાગા વૃત્ર-ઘ્નં વિબુધા યથા

વૈજયન્તીં દદુર્ માલાં શ્રી-ધામામ્લાન-પઙ્કજાં ।
રામાય વાસસી દિવ્યે દિવ્યાન્ય્ આભરણાનિ ચ

અથ તૈર્ અભ્યનુજ્ઞાતઃ કૌશિકીમ્ એત્ય બ્રાહ્મણૈઃ ।
સ્નાત્વા સરોવરમ્ અગાદ્ યતઃ સરયૂર્ આસ્રવત્

અનુ-સ્રોતેન સરયૂં પ્રયાગમ્ ઉપગમ્ય સઃ ।
સ્નાત્વા સન્તર્પ્ય દેવાદીન્ જગામ પુલહાશ્રમમ્

ગોમતીં ગણ્ડકીં સ્નાત્વા વિપાશાં શોણ આપ્લુતઃ ।
ગયાં ગત્વા પિતૄન્ ઇષ્ટ્વા ગઙ્ગા-સાગર-સઙ્ગમે

ઉપસ્પૃશ્ય મહેન્દ્રાદ્રૌ રામં દૃષ્ટ્વાભિવાદ્ય ચ ।
સપ્ત-ગોદાવરીં વેણાં પમ્પાં ભીમરથીં તતઃ

સ્કન્દં દૃષ્ટ્વા યયૌ રામઃ શ્રી-શૈલં ગિરિશાલયમ્ ।
દ્રવિડેષુ મહા-પુણ્યં દૃષ્ટ્વાદ્રિં વેઙ્કટં પ્રભુઃ

કામ-કોષ્ણીં પુરીં કાઞ્ચીં કાવેરીં ચ સરિદ્-વરામ્ ।
શ્રી-રન્ગાખ્યં મહા-પુણ્યં યત્ર સન્નિહિતો હરિઃ

ઋષભાદ્રિં હરેઃ ક્ષેત્રં દક્ષિણાં મથુરાં તથા ।
સામુદ્રં સેતુમ્ અગમત્ મહા-પાતક-નાશનમ્

તત્રાયુતમ્ અદાદ્ ધેનૂર્ બ્રાહ્મણેભ્યો હલાયુધઃ ।
કૃતમાલાં તામ્રપર્ણીં મલયં ચ કુલાચલમ્

તત્રાગસ્ત્યં સમાસીનં નમસ્કૃત્યાભિવાદ્ય ચ ।
યોજિતસ્ તેન ચાશીર્ભિર્ અનુજ્ઞાતો ગતો ઽર્ણવમ્ ।
દક્ષિણં તત્ર કન્યાખ્યાં દુર્ગાં દેવીં દદર્શ સઃ

તતઃ ફાલ્ગુનમ્ આસાદ્ય પઞ્ચાપ્સરસમ્ ઉત્તમમ્ ।
વિષ્ણુઃ સન્નિહિતો યત્ર સ્નાત્વાસ્પર્શદ્ ગવાયુતમ્

તતો ઽભિવ્રજ્ય ભગવાન્ કેરલાંસ્ તુ ત્રિગર્તકાન્ ।
ગોકર્ણાખ્યં શિવ-ક્ષેત્રં સાન્નિધ્યં યત્ર ધૂર્જટેઃ

આર્યાં દ્વૈપાયનીં દૃષ્ટ્વા શૂર્પારકમ્ અગાદ્ બલઃ ।
તાપીં પયોષ્ણીં નિર્વિન્ધ્યામ્ ઉપસ્પૃશ્યાથ દણ્ડકમ્

પ્રવિશ્ય રેવામ્ અગમદ્ યત્ર માહિષ્મતી પુરી ।
મનુ-તીર્થમ્ ઉપસ્પૃશ્ય પ્રભાસં પુનર્ આગમત્

શ્રુત્વા દ્વિજૈઃ કથ્યમાનં કુરુ-પાણ્ડવ-સંયુગે ।
સર્વ-રાજન્ય-નિધનં ભારં મેને હૃતં ભુવઃ

સ ભીમ-દુર્યોધનયોર્ ગદાભ્યાં યુધ્યતોર્ મૃધે ।
વારયિષ્યન્ વિનશનં જગામ યદુ-નન્દનઃ

યુધિષ્ઠિરસ્ તુ તં દૃષ્ટ્વા યમૌ કૃષ્ણાર્જુનાવ્ અપિ ।
અભિવાદ્યાભવંસ્ તુષ્ણીં કિં વિવક્ષુર્ ઇહાગતઃ

ગદા-પાણી ઉભૌ દૃષ્ટ્વા સંરબ્ધૌ વિજયૈષિણૌ ।
મણ્ડલાનિ વિચિત્રાણિ ચરન્તાવ્ ઇદમ્ અબ્રવીત્

યુવાં તુલ્ય-બલૌ વીરૌ હે રાજન્ હે વૃકોદર ।
એકં પ્રાણાધિકં મન્યે ઉતૈકં શિક્ષયાધિકમ્

તસ્માદ્ એકતરસ્યેહ યુવયોઃ સમ-વીર્યયોઃ ।
ન લક્ષ્યતે જયો ઽન્યો વા વિરમત્વ્ અફલો રણઃ

ન તદ્-વાક્યં જગૃહતુર્ બદ્ધ-વૈરૌ નૃપાર્થવત્ ।
અનુસ્મરન્તાવ્ અન્યોન્યં દુરુક્તં દુષ્કૃતાનિ ચ

દિષ્ટં તદ્ અનુમન્વાનો રામો દ્વારવતીં યયૌ ।
ઉગ્રસેનાદિભિઃ પ્રીતૈર્ જ્ઞાતિભિઃ સમુપાગતઃ

તં પુનર્ નૈમિષં પ્રાપ્તમ્ ઋષયો ઽયાજયન્ મુદા ।
ક્રત્વ્-અઙ્ગં ક્રતુભિઃ સર્વૈર્ નિવૃત્તાખિલ-વિગ્રહમ્

તેભ્યો વિશુદ્ધં વિજ્ઞાનં ભગવાન્ વ્યતરદ્ વિભુઃ ।
યેનૈવાત્મન્ય્ અદો વિશ્વમ્ આત્માનં વિશ્વ-ગં વિદુઃ

સ્વ-પત્યાવભૃથ-સ્નાતો જ્ઞાતિ-બન્ધુ-સુહૃદ્-વૃતઃ ।
રેજે સ્વ-જ્યોત્સ્નયેવેન્દુઃ સુ-વાસાઃ સુષ્ઠ્વ્ અલઙ્કૃતઃ

ઈદૃગ્-વિધાન્ય્ અસઙ્ખ્યાનિ બલસ્ય બલ-શાલિનઃ ।
અનન્તસ્યાપ્રમેયસ્ય માયા-મર્ત્યસ્ય સન્તિ હિ

યો ઽનુસ્મરેત રામસ્ય કર્માણ્ય્ અદ્ભુત-કર્મણઃ ।
સાયં પ્રાતર્ અનન્તસ્ય વિષ્ણોઃ સ દયિતો ભવેત્