Bhagavata Purana · Chapter 10.78

BhP_10.78.001/0 śrī-śuka uvāca
śiśupālasya śālvasya pauṇḍrakasyāpi durmatiḥ /
para-loka-gatānāṃ ca kurvan pārokṣya-sauhṛdam

ekaḥ padātiḥ saṅkruddho gadā-pāṇiḥ prakampayan /
padbhyām imāṃ mahā-rāja mahā-sattvo vyadṛśyata

taṃ tathāyāntam ālokya gadām ādāya satvaraḥ /
avaplutya rathāt kṛṣṇaḥ sindhuṃ veleva pratyadhāt

gadām udyamya kārūṣo mukundaṃ prāha durmadaḥ /
diṣṭyā diṣṭyā bhavān adya mama dṛṣṭi-pathaṃ gataḥ

tvaṃ mātuleyo naḥ kṛṣṇa mitra-dhruṅ māṃ jighāṃsasi /
atas tvāṃ gadayā manda haniṣye vajra-kalpayā

tarhy ānṛṇyam upaimy ajña mitrāṇāṃ mitra-vatsalaḥ /
bandhu-rūpam ariṃ hatvā vyādhiṃ deha-caraṃ yathā

evaṃ rūkṣais tudan vākyaiḥ kṛṣṇaṃ totrair iva dvipam /
gadayātāḍayan mūrdhni siṃha-vad vyanadac ca saḥ

gadayābhihato 'py ājau na cacāla yadūdvahaḥ /
kṛṣṇo 'pi tam ahan gurvyā kaumodakyā stanāntare

gadā-nirbhinna-hṛdaya udvaman rudhiraṃ mukhāt /
prasārya keśa-bāhv-aṅghrīn dharaṇyāṃ nyapatad vyasuḥ

tataḥ sūkṣmataraṃ jyotiḥ kṛṣṇam āviśad adbhutam /
paśyatāṃ sarva-bhūtānāṃ yathā caidya-vadhe nṛpa

vidūrathas tu tad-bhrātā bhrātṛ-śoka-pariplutaḥ /
āgacchad asi-carmābhyām ucchvasaṃs taj-jighāṃsayā

tasya cāpatataḥ kṛṣṇaś cakreṇa kṣura-neminā /
śiro jahāra rājendra sa-kirīṭaṃ sa-kuṇḍalam

evaṃ saubhaṃ ca śālvaṃ ca dantavakraṃ sahānujam /
hatvā durviṣahān anyair īḍitaḥ sura-mānavaiḥ

munibhiḥ siddha-gandharvair vidyādhara-mahoragaiḥ /
apsarobhiḥ pitṛ-gaṇair yakṣaiḥ kinnara-cāraṇaiḥ

upagīyamāna-vijayaḥ kusumair abhivarṣitaḥ /
vṛtaś ca vṛṣṇi-pravarair viveśālaṅkṛtāṃ purīm

evaṃ yogeśvaraḥ kṛṣṇo bhagavān jagad-īśvaraḥ /
īyate paśu-dṛṣṭīnāṃ nirjito jayatīti saḥ

śrutvā yuddhodyamaṃ rāmaḥ kurūṇāṃ saha pāṇḍavaiḥ /
tīrthābhiṣeka-vyājena madhya-sthaḥ prayayau kila

snātvā prabhāse santarpya devarṣi-pitṛ-mānavān /
sarasvatīṃ prati-srotaṃ yayau brāhmaṇa-saṃvṛtaḥ

pṛthūdakaṃ bindu-saras tritakūpaṃ sudarśanam /
viśālaṃ brahma-tīrthaṃ ca cakraṃ prācīṃ sarasvatīm

yamunām anu yāny eva gaṅgām anu ca bhārata /
jagāma naimiṣaṃ yatra ṛṣayaḥ satram āsate

tam āgatam abhipretya munayo dīrgha-satriṇaḥ /
abhinandya yathā-nyāyaṃ praṇamyotthāya cārcayan

so 'rcitaḥ sa-parīvāraḥ kṛtāsana-parigrahaḥ /
romaharṣaṇam āsīnaṃ maharṣeḥ śiṣyam aikṣata

apratyutthāyinaṃ sūtam akṛta-prahvaṇāñjalim /
adhyāsīnaṃ ca tān viprāṃś cukopodvīkṣya mādhavaḥ

yasmād asāv imān viprān adhyāste pratiloma-jaḥ /
dharma-pālāṃs tathaivāsmān vadham arhati durmatiḥ

ṛṣer bhagavato bhūtvā śiṣyo 'dhītya bahūni ca /
setihāsa-purāṇāni dharma-śāstrāṇi sarvaśaḥ

adāntasyāvinītasya vṛthā paṇḍita-māninaḥ /
na guṇāya bhavanti sma naṭasyevājitātmanaḥ

etad-artho hi loke 'sminn avatāro mayā kṛtaḥ /
vadhyā me dharma-dhvajinas te hi pātakino 'dhikāḥ

etāvad uktvā bhagavān nivṛtto 'sad-vadhād api /
bhāvitvāt taṃ kuśāgreṇa kara-sthenāhanat prabhuḥ

hāheti-vādinaḥ sarve munayaḥ khinna-mānasāḥ /
ūcuḥ saṅkarṣaṇaṃ devam adharmas te kṛtaḥ prabho

asya brahmāsanaṃ dattam asmābhir yadu-nandana /
āyuś cātmāklamaṃ tāvad yāvat satraṃ samāpyate

ajānataivācaritas tvayā brahma-vadho yathā /
yogeśvarasya bhavato nāmnāyo 'pi niyāmakaḥ

yady etad-brahma-hatyāyāḥ pāvanaṃ loka-pāvana /
cariṣyati bhavāṃl loka- saṅgraho 'nanya-coditaḥ

BhP_10.78.033/0 śrī-bhagavān uvāca
cariṣye vadha-nirveśaṃ lokānugraha-kāmyayā /
niyamaḥ prathame kalpe yāvān sa tu vidhīyatām

dīrgham āyur bataitasya sattvam indriyam eva ca /
āśāsitaṃ yat tad brūte sādhaye yoga-māyayā

BhP_10.78.035/0 ṛṣaya ūcuḥ
astrasya tava vīryasya mṛtyor asmākam eva ca /
yathā bhaved vacaḥ satyaṃ tathā rāma vidhīyatām

BhP_10.78.036/0 śrī-bhagavān uvāca
ātmā vai putra utpanna iti vedānuśāsanam /
tasmād asya bhaved vaktā āyur-indriya-sattva-vān

kiṃ vaḥ kāmo muni-śreṣṭhā brūtāhaṃ karavāṇy atha /
ajānatas tv apacitiṃ yathā me cintyatāṃ budhāḥ

BhP_10.78.038/0 ṛṣaya ūcuḥ
ilvalasya suto ghoro balvalo nāma dānavaḥ /
sa dūṣayati naḥ satram etya parvaṇi parvaṇi

taṃ pāpaṃ jahi dāśārha tan naḥ śuśrūṣaṇaṃ param /
pūya-śoṇita-vin-mūtra- surā-māṃsābhivarṣiṇam

tataś ca bhārataṃ varṣaṃ parītya su-samāhitaḥ /
caritvā dvādaśa-māsāṃs tīrtha-snāyī viśudhyasi