Bhagavata Purana · Chapter 10.77

BhP_10.77.001/0 śrī-śuka uvāca
sa upaspṛśya salilaṃ daṃśito dhṛta-kārmukaḥ /
naya māṃ dyumataḥ pārśvaṃ vīrasyety āha sārathim

vidhamantaṃ sva-sainyāni dyumantaṃ rukmiṇī-sutaḥ /
pratihatya pratyavidhyān nārācair aṣṭabhiḥ smayan

caturbhiś caturo vāhān sūtam ekena cāhanat /
dvābhyaṃ dhanuś ca ketuṃ ca śareṇānyena vai śiraḥ

gada-sātyaki-sāmbādyā jaghnuḥ saubha-pater balam /
petuḥ samudre saubheyāḥ sarve sañchinna-kandharāḥ

evaṃ yadūnāṃ śālvānāṃ nighnatām itaretaram /
yuddhaṃ tri-nava-rātraṃ tad abhūt tumulam ulbaṇam

indraprasthaṃ gataḥ kṛṣṇa āhūto dharma-sūnunā /
rājasūye 'tha nivṛtte śiśupāle ca saṃsthite

kuru-vṛddhān anujñāpya munīṃś ca sa-sutāṃ pṛthām /
nimittāny ati-ghorāṇi paśyan dvāravatīṃ yayau

āha cāham ihāyāta ārya-miśrābhisaṅgataḥ /
rājanyāś caidya-pakṣīyā nūnaṃ hanyuḥ purīṃ mama

vīkṣya tat kadanaṃ svānāṃ nirūpya pura-rakṣaṇam /
saubhaṃ ca śālva-rājaṃ ca dārukaṃ prāha keśavaḥ

rathaṃ prāpaya me sūta śālvasyāntikam āśu vai /
sambhramas te na kartavyo māyāvī saubha-rāḍ ayam

ity uktaś codayām āsa ratham āsthāya dārukaḥ /
viśantaṃ dadṛśuḥ sarve sve pare cāruṇānujam

śālvaś ca kṛṣṇam ālokya hata-prāya-baleśvaraḥ /
prāharat kṛṣṇa-sūtaya śaktiṃ bhīma-ravāṃ mṛdhe

tām āpatantīṃ nabhasi maholkām iva raṃhasā /
bhāsayantīṃ diśaḥ śauriḥ sāyakaiḥ śatadhācchinat

taṃ ca ṣoḍaśabhir viddhvā bānaiḥ saubhaṃ ca khe bhramat /
avidhyac chara-sandohaiḥ khaṃ sūrya iva raśmibhiḥ

śālvaḥ śaures tu doḥ savyaṃ sa-śārṅgaṃ śārṅga-dhanvanaḥ /
bibheda nyapatad dhastāc chārṅgam āsīt tad adbhutam

hāhā-kāro mahān āsīd bhūtānāṃ tatra paśyatām /
ninadya saubha-rāḍ uccair idam āha janārdanam

yat tvayā mūḍha naḥ sakhyur bhrātur bhāryā hṛtekṣatām /
pramattaḥ sa sabhā-madhye tvayā vyāpāditaḥ sakhā

taṃ tvādya niśitair bāṇair aparājita-māninam /
nayāmy apunar-āvṛttiṃ yadi tiṣṭher mamāgrataḥ

BhP_10.77.019/0 śrī-bhagavān uvāca
vṛthā tvaṃ katthase manda na paśyasy antike 'ntakam /
paurusaṃ darśayanti sma śūrā na bahu-bhāṣiṇaḥ

ity uktvā bhagavāñ chālvaṃ gadayā bhīma-vegayā /
tatāḍa jatrau saṃrabdhaḥ sa cakampe vamann asṛk

gadāyāṃ sannivṛttāyāṃ śālvas tv antaradhīyata /
tato muhūrta āgatya puruṣaḥ śirasācyutam /
devakyā prahito 'smīti natvā prāha vaco rudan

kṛṣṇa kṛṣṇa mahā-bāho pitā te pitṛ-vatsala /
baddhvāpanītaḥ śālvena saunikena yathā paśuḥ

niśamya vipriyaṃ kṛṣṇo mānusīṃ prakṛtiṃ gataḥ /
vimanasko ghṛṇī snehād babhāṣe prākṛto yathā

kathaṃ rāmam asambhrāntaṃ jitvājeyaṃ surāsuraiḥ /
śālvenālpīyasā nītaḥ pitā me balavān vidhiḥ

iti bruvāṇe govinde saubha-rāṭ pratyupasthitaḥ /
vasudevam ivānīya kṛṣṇaṃ cedam uvāca saḥ

eṣa te janitā tāto yad-artham iha jīvasi /
vadhiṣye vīkṣatas te 'mum īśaś cet pāhi bāliśa

evaṃ nirbhartsya māyāvī khaḍgenānakadundubheḥ /
utkṛtya śira ādāya kha-sthaṃ saubhaṃ samāviśat

tato muhūrtaṃ prakṛtāv upaplutaḥ sva-bodha āste sva-janānuṣaṅgataḥ /
mahānubhāvas tad abudhyad āsurīṃ māyāṃ sa śālva-prasṛtāṃ mayoditām

na tatra dūtaṃ na pituḥ kalevaraṃ prabuddha ājau samapaśyad acyutaḥ /
svāpnaṃ yathā cāmbara-cāriṇaṃ ripuṃ saubha-stham ālokya nihantum udyataḥ

evaṃ vadanti rājarṣe ṛṣayaḥ ke ca nānvitāḥ /
yat sva-vāco virudhyeta nūnaṃ te na smaranty uta

kva śoka-mohau sneho vā bhayaṃ vā ye 'jña-sambhavāḥ /
kva cākhaṇḍita-vijñāna- jñānaiśvaryas tv akhaṇḍitaḥ

yat-pāda-sevorjitayātma-vidyayā hinvanty anādyātma-viparyaya-graham /
labhanta ātmīyam anantam aiśvaraṃ kuto nu mohaḥ paramasya sad-gateḥ

taṃ śastra-pūgaiḥ praharantam ojasā $ śālvaṃ śaraiḥ śaurir amogha-vikramaḥ &
viddhvācchinad varma dhanuḥ śiro-maṇiṃ % saubhaṃ ca śatror gadayā ruroja ha // BhP_10.77.033* //
tat kṛṣṇa-hasteritayā vicūrṇitaṃ papāta toye gadayā sahasradhā /
visṛjya tad bhū-talam āsthito gadām udyamya śālvo 'cyutam abhyagād drutam

ādhāvataḥ sa-gadaṃ tasya bāhuṃ bhallena chittvātha rathāṅgam adbhutam /
vadhāya śālvasya layārka-sannibhaṃ bibhrad babhau sārka ivodayācalaḥ

jahāra tenaiva śiraḥ sa-kuṇḍalaṃ kirīṭa-yuktaṃ puru-māyino hariḥ /
vajreṇa vṛtrasya yathā purandaro babhūva hāheti vacas tadā nṛṇām

tasmin nipatite pāpe saubhe ca gadayā hate /
nedur dundubhayo rājan divi deva-gaṇeritāḥ /
sakhīnām apacitiṃ kurvan dantavakro ruṣābhyagāt