Bhagavata Purana · Chapter 10.76

BhP_10.76.001/0 śrī-śuka uvāca
athānyad api kṛṣṇasya śṛṇu karmādbhutaṃ nṛpa /
krīḍā-nara-śarīrasya yathā saubha-patir hataḥ

śiśupāla-sakhaḥ śālvo rukmiṇy-udvāha āgataḥ /
yadubhir nirjitaḥ saṅkhye jarāsandhādayas tathā

śālvaḥ pratijñām akaroc chṛṇvatāṃ sarva-bhūbhujām /
ayādavāṃ kṣmāṃ kariṣye pauruṣaṃ mama paśyata

iti mūḍhaḥ pratijñāya devaṃ paśu-patiṃ prabhum /
ārādhayām āsa nṛpaḥ pāṃśu-muṣṭiṃ sakṛd grasan

saṃvatsarānte bhagavān āśu-toṣa umā-patiḥ /
vareṇa cchandayām āsa śālvaṃ śaraṇam āgatam

devāsura-manuṣyāṇāṃ gandharvoraga-rakṣasām /
abhedyaṃ kāma-gaṃ vavre sa yānaṃ vṛṣṇi-bhīṣaṇam

tatheti giriśādiṣṭo mayaḥ para-puraṃ-jayaḥ /
puraṃ nirmāya śālvāya prādāt saubham ayas-mayam

sa labdhvā kāma-gaṃ yānaṃ tamo-dhāma durāsadam /
yayas dvāravatīṃ śālvo vairaṃ vṛṣṇi-kṛtaṃ smaran

nirudhya senayā śālvo mahatyā bharatarṣabha /
purīṃ babhañjopavanān udyānāni ca sarvaśaḥ

sa-gopurāṇi dvārāṇi prāsādāṭṭāla-tolikāḥ /
vihārān sa vimānāgryān nipetuḥ śastra-vṛṣṭayaḥ

śilā-drumāś cāśanayaḥ sarpā āsāra-śarkarāḥ /
pracaṇḍaś cakravāto 'bhūd rajasācchāditā diśaḥ

ity ardyamānā saubhena kṛṣṇasya nagarī bhṛśam /
nābhyapadyata śaṃ rājaṃs tri-pureṇa yathā mahī

pradyumno bhagavān vīkṣya bādhyamānā nijāḥ prajāḥ /
ma bhaiṣṭety abhyadhād vīro rathārūḍho mahā-yaśāḥ

sātyakiś cārudeṣṇaś ca sāmbo 'krūraḥ sahānujaḥ /
hārdikyo bhānuvindaś ca gadaś ca śuka-sāraṇau

apare ca maheṣv-āsā ratha-yūthapa-yūthapāḥ /
niryayur daṃśitā guptā rathebhāśva-padātibhiḥ

tataḥ pravavṛte yuddhaṃ śālvānāṃ yadubhiḥ saha /
yathāsurāṇāṃ vibudhais tumulaṃ loma-harṣaṇam

tāś ca saubha-pater māyā divyāstrai rukmiṇī-sutaḥ /
kṣaṇena nāśayām āsa naiśaṃ tama ivoṣṇa-guḥ

vivyādha pañca-viṃśatyā svarṇa-puṅkhair ayo-mukhaiḥ /
śālvasya dhvajinī-pālaṃ śaraiḥ sannata-parvabhiḥ

śatenātāḍayac chālvam ekaikenāsya sainikān /
daśabhir daśabhir netṝn vāhanāni tribhis tribhiḥ

tad adbhutaṃ mahat karma pradyumnasya mahātmanaḥ /
dṛṣṭvā taṃ pūjayām āsuḥ sarve sva-para-sainikāḥ

bahu-rūpaika-rūpaṃ tad dṛśyate na ca dṛśyate /
māyā-mayaṃ maya-kṛtaṃ durvibhāvyaṃ parair abhūt

kvacid bhūmau kvacid vyomni giri-mūrdhni jale kvacit /
alāta-cakra-vad bhrāmyat saubhaṃ tad duravasthitam

yatra yatropalakṣyeta sa-saubhaḥ saha-sainikaḥ /
śālvas tatas tato 'muñcañ charān sātvata-yūthapāḥ

śarair agny-arka-saṃsparśair āśī-viṣa-durāsadaiḥ /
pīḍyamāna-purānīkaḥ śālvo 'muhyat pareritaiḥ

śālvānīkapa-śastraughair vṛṣṇi-vīrā bhṛśārditāḥ /
na tatyajū raṇaṃ svaṃ svaṃ loka-dvaya-jigīṣavaḥ

śālvāmātyo dyumān nāma pradyumnaṃ prak prapīḍitaḥ /
āsādya gadayā maurvyā vyāhatya vyanadad balī

pradyumnaṃ gadayā sīrṇa- vakṣaḥ-sthalam ariṃ-damam /
apovāha raṇāt sūto dharma-vid dārukātmajaḥ

labdha-samjño muhūrtena kārṣṇiḥ sārathim abravīt /
aho asādhv idaṃ sūta yad raṇān me 'pasarpaṇam

na yadūnāṃ kule jātaḥ śrūyate raṇa-vicyutaḥ /
vinā mat klība-cittena sūtena prāpta-kilbiṣāt

kiṃ nu vakṣye 'bhisaṅgamya pitarau rāma-keśavau /
yuddhāt samyag apakrāntaḥ pṛṣṭas tatrātmanaḥ kṣamam

vyaktaṃ me kathayiṣyanti hasantyo bhrātṛ-jāmayaḥ /
klaibyaṃ kathaṃ kathaṃ vīra tavānyaiḥ kathyatāṃ mṛdhe

BhP_10.76.032/0 sārathir uvāca
dharmaṃ vijānatāyuṣman kṛtam etan mayā vibho /
sūtaḥ kṛcchra-gataṃ rakṣed rathinaṃ sārathiṃ rathī

etad viditvā tu bhavān mayāpovāhito raṇāt /
upasṛṣṭaḥ pareṇeti mūrcchito gadayā hataḥ