Bhagavata Purana · Chapter 10.74

BhP_10.74.001/0 śrī-śuka uvāca
evaṃ yudhiṣṭhiro rājā jarāsandha-vadhaṃ vibhoḥ /
kṛṣṇasya cānubhāvaṃ taṃ śrutvā prītas tam abravīt

BhP_10.74.002/0 śrī-yudhiṣṭhira uvāca
ye syus trai-lokya-guravaḥ sarve lokā maheśvarāḥ /
vahanti durlabhaṃ labdvā śirasaivānuśāsanam

sa bhavān aravindākṣo dīnānām īśa-māninām /
dhatte 'nuśāsanaṃ bhūmaṃs tad atyanta-viḍambanam

na hy ekasyādvitīyasya brahmaṇaḥ paramātmanaḥ /
karmabhir vardhate tejo hrasate ca yathā raveḥ

na vai te 'jita bhaktānāṃ mamāham iti mādhava /
tvaṃ taveti ca nānā-dhīḥ paśūnām iva vaikṛtī

BhP_10.74.006/0 śrī-śuka uvāca
ity uktvā yajñiye kāle vavre yuktān sa ṛtvijaḥ /
kṛṣṇānumoditaḥ pārtho brāhmaṇān brahma-vādinaḥ

dvaipāyano bharadvājaḥ sumantur gotamo 'sitaḥ /
vasiṣṭhaś cyavanaḥ kaṇvo maitreyaḥ kavaṣas tritaḥ

viśvāmitro vāmadevaḥ sumatir jaiminiḥ kratuḥ /
pailaḥ parāśaro gargo vaiśampāyana eva ca

atharvā kaśyapo dhaumyo rāmo bhārgava āsuriḥ /
vītihotro madhucchandā vīraseno 'kṛtavraṇaḥ

upahūtās tathā cānye droṇa-bhīṣma-kṛpādayaḥ /
dhṛtarāṣṭraḥ saha-suto viduraś ca mahā-matiḥ

brāhmaṇāḥ kṣatriyā vaiśyāḥ śūdrā yajña-didṛkṣavaḥ /
tatreyuḥ sarva-rājāno rājñāṃ prakṛtayo nṛpa

tatas te deva-yajanaṃ brāhmaṇāḥ svarṇa-lāṅgalaiḥ /
kṛṣṭvā tatra yathāmnāyaṃ dīkṣayāṃ cakrire nṛpam

haimāḥ kilopakaraṇā varuṇasya yathā purā /
indrādayo loka-pālā viriñci-bhava-saṃyutāḥ

sa-gaṇāḥ siddha-gandharvā vidyādhara-mahoragāḥ /
munayo yakṣa-rakṣāṃsi khaga-kinnara-cāraṇāḥ

rājānaś ca samāhūtā rāja-patnyaś ca sarvaśaḥ /
rājasūyaṃ samīyuḥ sma rājñaḥ pāṇḍu-sutasya vai /
menire kṛṣṇa-bhaktasya sūpapannam avismitāḥ

ayājayan mahā-rājaṃ yājakā deva-varcasaḥ /
rājasūyena vidhi-vat pracetasam ivāmarāḥ

sūtye 'hany avanī-pālo yājakān sadasas-patīn /
apūjayan mahā-bhāgān yathā-vat su-samāhitaḥ

sadasyāgryārhaṇārhaṃ vai vimṛśantaḥ sabhā-sadaḥ /
nādhyagacchann anaikāntyāt sahadevas tadābravīt

arhati hy acyutaḥ śraiṣṭhyaṃ bhagavān sātvatāṃ patiḥ /
eṣa vai devatāḥ sarvā deśa-kāla-dhanādayaḥ

yad-ātmakam idaṃ viśvaṃ kratavaś ca yad-ātmakāḥ /
agnir āhutayo mantrā sāṅkhyaṃ yogaś ca yat-paraḥ

eka evādvitīyo 'sāv aitad-ātmyam idaṃ jagat /
ātmanātmāśrayaḥ sabhyāḥ sṛjaty avati hanty ajaḥ

vividhānīha karmāṇi janayan yad-avekṣayā /
īhate yad ayaṃ sarvaḥ śreyo dharmādi-lakṣaṇam

tasmāt kṛṣṇāya mahate dīyatāṃ paramārhaṇam /
evaṃ cet sarva-bhūtānām ātmanaś cārhaṇaṃ bhavet

sarva-bhūtātma-bhūtāya kṛṣṇāyānanya-darśine /
deyaṃ śāntāya pūrṇāya dattasyānantyam icchatā

ity uktvā sahadevo 'bhūt tūṣṇīṃ kṛṣṇānubhāva-vit /
tac chrutvā tuṣṭuvuḥ sarve sādhu sādhv iti sattamāḥ

śrutvā dvijeritaṃ rājā jñātvā hārdaṃ sabhā-sadām /
samarhayad dhṛṣīkeśaṃ prītaḥ praṇaya-vihvalaḥ

tat-pādāv avanijyāpaḥ śirasā loka-pāvanīḥ /
sa-bhāryaḥ sānujāmātyaḥ sa-kuṭumbo vahan mudā

vāsobhiḥ pīta-kauṣeyair bhūṣaṇaiś ca mahā-dhanaiḥ /
arhayitvāśru-pūrṇākṣo nāśakat samavekṣitum

itthaṃ sabhājitaṃ vīkṣya sarve prāñjalayo janāḥ /
namo jayeti nemus taṃ nipetuḥ puṣpa-vṛṣṭayaḥ

itthaṃ niśamya damaghoṣa-sutaḥ sva-pīṭhād $ utthāya kṛṣṇa-guṇa-varṇana-jāta-manyuḥ &
utkṣipya bāhum idam āha sadasy amarṣī % saṃśrāvayan bhagavate paruṣāṇy abhītaḥ // BhP_10.74.030* //
īśo duratyayaḥ kāla iti satyavatī srutiḥ /
vṛddhānām api yad buddhir bāla-vākyair vibhidyate

yūyaṃ pātra-vidāṃ śreṣṭhā mā mandhvaṃ bāla-bhāṣītam /
sadasas-patayaḥ sarve kṛṣṇo yat sammato 'rhaṇe

tapo-vidyā-vrata-dharān jñāna-vidhvasta-kalmaṣān /
paramaṛṣīn brahma-niṣṭhāṃl loka-pālaiś ca pūjitān

sadas-patīn atikramya gopālaḥ kula-pāṃsanaḥ /
yathā kākaḥ puroḍāśaṃ saparyāṃ katham arhati

varṇāśrama-kulāpetaḥ sarva-dharma-bahiṣ-kṛtaḥ /
svaira-vartī guṇair hīnaḥ saparyāṃ katham arhati

yayātinaiṣāṃ hi kulaṃ śaptaṃ sadbhir bahiṣ-kṛtam /
vṛthā-pāna-rataṃ śaśvat saparyāṃ katham arhati

brahmarṣi-sevitān deśān hitvaite 'brahma-varcasam /
samudraṃ durgam āśritya bādhante dasyavaḥ prajāḥ

evam-ādīny abhadrāṇi babhāṣe naṣṭa-maṅgalaḥ /
novāca kiñcid bhagavān yathā siṃhaḥ śivā-rutam

bhagavan-nindanaṃ śrutvā duḥsahaṃ tat sabhā-sadaḥ /
karṇau pidhāya nirjagmuḥ śapantaś cedi-paṃ ruṣā

nindāṃ bhagavataḥ śṛṇvaṃs tat-parasya janasya vā /
tato nāpaiti yaḥ so 'pi yāty adhaḥ sukṛtāc cyutaḥ

tataḥ pāṇḍu-sutāḥ kruddhā matsya-kaikaya-sṛñjayāḥ /
udāyudhāḥ samuttasthuḥ śiśupāla-jighāṃsavaḥ

tataś caidyas tv asambhrānto jagṛhe khaḍga-carmaṇī /
bhartsayan kṛṣṇa-pakṣīyān rājñaḥ sadasi bhārata

tāvad utthāya bhagavān svān nivārya svayaṃ ruṣā /
śiraḥ kṣurānta-cakreṇa jahāra patato ripoḥ

śabdaḥ kolāhalo 'thāsīc chiśupāle hate mahān /
tasyānuyāyino bhūpā dudruvur jīvitaiṣiṇaḥ

caidya-dehotthitaṃ jyotir vāsudevam upāviśat /
paśyatāṃ sarva-bhūtānām ulkeva bhuvi khāc cyutā

janma-trayānuguṇita- vaira-saṃrabdhayā dhiyā /
dhyāyaṃs tan-mayatāṃ yāto bhāvo hi bhava-kāraṇam

ṛtvigbhyaḥ sa-sadasyebhyo dakṣināṃ vipulām adāt /
sarvān sampūjya vidhi-vac cakre 'vabhṛtham eka-rāṭ

sādhayitvā kratuḥ rājñaḥ kṛṣṇo yogeśvareśvaraḥ /
uvāsa katicin māsān suhṛdbhir abhiyācitaḥ

tato 'nujñāpya rājānam anicchantam apīśvaraḥ /
yayau sa-bhāryaḥ sāmātyaḥ sva-puraṃ devakī-sutaḥ

varṇitaṃ tad upākhyānaṃ mayā te bahu-vistaram /
vaikuṇṭha-vāsinor janma vipra-śāpāt punaḥ punaḥ

rājasūyāvabhṛthyena snāto rājā yudhiṣṭhiraḥ /
brahma-kṣatra-sabhā-madhye śuśubhe sura-rāḍ iva

rājñā sabhājitāḥ sarve sura-mānava-khecarāḥ /
kṛṣṇaṃ kratuṃ ca śaṃsantaḥ sva-dhāmāni yayur mudā

duryodhanam ṛte pāpaṃ kaliṃ kuru-kulāmayam /
yo na sehe śrīyaṃ sphītāṃ dṛṣṭvā pāṇḍu-sutasya tām

ya idaṃ kīrtayed viṣṇoḥ karma caidya-vadhādikam /
rāja-mokṣaṃ vitānaṃ ca sarva-pāpaiḥ pramucyate