Bhagavata Purana · Chapter 10.73

BhP_10.73.001/0 śrī-śuka uvāca
ayute dve śatāny aṣṭau niruddhā yudhi nirjitāḥ /
te nirgatā giridroṇyāṃ malinā mala-vāsasaḥ

kṣut-kṣāmāḥ śuṣka-vadanāḥ saṃrodha-parikarśitāḥ /
dadṛśus te ghana-śyāmaṃ pīta-kauśeya-vāsasam

śrīvatsāṅkaṃ catur-bāhuṃ padma-garbhāruṇekṣaṇam /
cāru-prasanna-vadanaṃ sphuran-makara-kuṇḍalam

padma-hastaṃ gadā-śaṅkha rathāṅgair upalakṣitam /
kirīṭa-hāra-kaṭaka- kaṭi-sūtrāṅgadāñcitam

bhrājad-vara-maṇi-grīvaṃ nivītaṃ vana-mālayā /
pibanta iva cakṣurbhyāṃ lihanta iva jihvayā

jighranta iva nāsābhyāṃ rambhanta iva bāhubhiḥ /
praṇemur hata-pāpmāno mūrdhabhiḥ pādayor hareḥ

kṛṣṇa-sandarśanāhlāda dhvasta-saṃrodhana-klamāḥ /
praśaśaṃsur hṛṣīkeśaṃ gīrbhiḥ prāñjalayo nṛpāḥ

BhP_10.73.008/0 rājāna ūcuḥ
namas te deva-deveśa prapannārti-harāvyaya /
prapannān pāhi naḥ kṛṣṇa nirviṇṇān ghora-saṃsṛteḥ

nainaṃ nāthānusūyāmo māgadhaṃ madhusūdana /
anugraho yad bhavato rājñāṃ rājya-cyutir vibho

rājyaiśvarya-madonnaddho na śreyo vindate nṛpaḥ /
tvan-māyā-mohito 'nityā manyate sampado 'calāḥ

mṛga-tṛṣṇāṃ yathā bālā manyanta udakāśayam /
evaṃ vaikārikīṃ māyām ayuktā vastu cakṣate

vayaṃ purā śrī-mada-naṣṭa-dṛṣṭayo jigīṣayāsyā itaretara-spṛdhaḥ /
ghnantaḥ prajāḥ svā ati-nirghṛṇāḥ prabho mṛtyuṃ puras tvāvigaṇayya durmadāḥ

ta eva kṛṣṇādya gabhīra-raṃhasā durante-vīryeṇa vicālitāḥ śriyaḥ /
kālena tanvā bhavato 'nukampayā vinaṣṭa-darpāś caraṇau smarāma te

atho na rājyam mṛga-tṛṣṇi-rūpitaṃ dehena śaśvat patatā rujāṃ bhuvā /
upāsitavyaṃ spṛhayāmahe vibho kriyā-phalaṃ pretya ca karṇa-rocanam

taṃ naḥ samādiśopāyaṃ yena te caraṇābjayoḥ /
smṛtir yathā na viramed api saṃsaratām iha

kṛṣṇāya vāsudevāya haraye paramātmane /
praṇata-kleśa-nāśāya govindāya namo namaḥ

BhP_10.73.017/0 śrī-śuka uvāca
saṃstūyamāno bhagavān rājabhir mukta-bandhanaiḥ /
tān āha karuṇas tāta śaraṇyaḥ ślakṣṇayā girā

BhP_10.73.018/0 śrī-bhagavān uvāca
adya prabhṛti vo bhūpā mayy ātmany akhileśvare /
su-dṛḍhā jāyate bhaktir bāḍham āśaṃsitaṃ tathā

diṣṭyā vyavasitaṃ bhūpā bhavanta ṛta-bhāṣiṇaḥ /
śrīy-aiśvarya-madonnāhaṃ paśya unmādakaṃ nṛṇām

haihayo nahuṣo veṇo rāvaṇo narako 'pare /
śrī-madād bhraṃśitāḥ sthānād deva-daitya-nareśvarāḥ

bhavanta etad vijñāya dehādy utpādyam anta-vat /
māṃ yajanto 'dhvarair yuktāḥ prajā dharmeṇa rakṣyatha

santanvantaḥ prajā-tantūn sukhaṃ duḥkhaṃ bhavābhavau /
prāptaṃ prāptaṃ ca sevanto mac-cittā vicariṣyatha

udāsīnāś ca dehādāv ātmārāmā dhṛta-vratāḥ /
mayy āveśya manaḥ samyaṅ mām ante brahma yāsyatha

BhP_10.73.024/0 śrī-śuka uvāca
ity ādiśya nṛpān kṛṣṇo bhagavān bhuvaneśvaraḥ /
teṣāṃ nyayuṅkta puruṣān striyo majjana-karmaṇi

saparyāṃ kārayām āsa sahadevena bhārata /
naradevocitair vastrair bhūṣaṇaiḥ srag-vilepanaiḥ

bhojayitvā varānnena su-snātān samalaṅkṛtān /
bhogaiś ca vividhair yuktāṃs tāmbūlādyair nṛpocitaiḥ

te pūjitā mukundena rājāno mṛṣṭa-kuṇḍalāḥ /
virejur mocitāḥ kleśāt prāvṛḍ-ante yathā grahāḥ

rathān sad-aśvān āropya maṇi-kāñcana-bhūṣitān /
prīṇayya sunṛtair vākyaiḥ sva-deśān pratyayāpayat

ta evaṃ mocitāḥ kṛcchrāt kṛṣṇena su-mahātmanā /
yayus tam eva dhyāyantaḥ kṛtāni ca jagat-pateḥ

jagaduḥ prakṛtibhyas te mahā-puruṣa-ceṣṭitam /
yathānvaśāsad bhagavāṃs tathā cakrur atandritāḥ

jarāsandhaṃ ghātayitvā bhīmasenena keśavaḥ /
pārthābhyāṃ saṃyutaḥ prāyāt sahadevena pūjitaḥ

gatvā te khāṇḍava-prasthaṃ śaṅkhān dadhmur jitārayaḥ /
harṣayantaḥ sva-suhṛdo durhṛdāṃ cāsukhāvahāḥ

tac chrutvā prīta-manasa indraprastha-nivāsinaḥ /
menire māgadhaṃ śāntaṃ rājā cāpta-manorathaḥ

abhivandyātha rājānaṃ bhīmārjuna-janārdanāḥ /
sarvam āśrāvayāṃ cakrur ātmanā yad anuṣṭhitam

niśamya dharma-rājas tat keśavenānukampitam /
ānandāśru-kalāṃ muñcan premṇā novāca kiñcana