Bhagavata Purana · Chapter 10.68

BhP_10.68.001/0 śrī-śuka uvāca
duryodhana-sutāṃ rājan lakṣmaṇāṃ samitiṃ-jayaḥ /
svayaṃvara-sthām aharat sāmbo jāmbavatī-sutaḥ

kauravāḥ kupitā ūcur durvinīto 'yam arbhakaḥ /
kadarthī-kṛtya naḥ kanyām akāmām aharad balāt

badhnītemaṃ durvinītaṃ kiṃ kariṣyanti vṛṣṇayaḥ /
ye 'smat-prasādopacitāṃ dattāṃ no bhuñjate mahīm

nigṛhītaṃ sutaṃ śrutvā yady eṣyantīha vṛṣṇayaḥ /
bhagna-darpāḥ śamaṃ yānti prāṇā iva su-saṃyatāḥ

iti karṇaḥ śalo bhūrir yajñaketuḥ suyodhanaḥ /
sāmbam ārebhire yoddhuṃ kuru-vṛddhānumoditāḥ

dṛṣṭvānudhāvataḥ sāmbo dhārtarāṣṭrān mahā-rathaḥ /
pragṛhya ruciraṃ cāpaṃ tasthau siṃha ivaikalaḥ

taṃ te jighṛkṣavaḥ kruddhās tiṣṭha tiṣṭheti bhāṣiṇaḥ /
āsādya dhanvino bāṇaiḥ karṇāgraṇyaḥ samākiran

so 'paviddhaḥ kuru-śreṣṭha kurubhir yadu-nandanaḥ /
nāmṛṣyat tad acintyārbhaḥ siṃha kṣudra-mṛgair iva

visphūrjya ruciraṃ cāpaṃ sarvān vivyādha sāyakaiḥ /
karṇādīn ṣaḍ rathān vīras tāvadbhir yugapat pṛthak

caturbhiś caturo vāhān ekaikena ca sārathīn /
rathinaś ca maheṣvāsāṃs tasya tat te 'bhyapūjayan

taṃ tu te virathaṃ cakruś catvāraś caturo hayān /
ekas tu sārathiṃ jaghne cicchedaṇyaḥ śarāsanam

taṃ baddhvā virathī-kṛtya kṛcchreṇa kuravo yudhi /
kumāraṃ svasya kanyāṃ ca sva-puraṃ jayino 'viśan

tac chrutvā nāradoktena rājan sañjāta-manyavaḥ /
kurūn praty udyamaṃ cakrur ugrasena-pracoditāḥ

sāntvayitvā tu tān rāmaḥ sannaddhān vṛṣṇi-puṅgavān /
naicchat kurūṇāṃ vṛṣṇīnāṃ kaliṃ kali-malāpahaḥ

jagāma hāstina-puraṃ rathenāditya-varcasā /
brāhmaṇaiḥ kula-vṛddhaiś ca vṛtaś candra iva grahaiḥ

gatvā gajāhvayaṃ rāmo bāhyopavanam āsthitaḥ /
uddhavaṃ preṣayām āsa dhṛtarāṣṭraṃ bubhutsayā

so 'bhivandyāmbikā-putraṃ bhīṣmaṃ droṇaṃ ca bāhlikam /
duryodhanaṃ ca vidhi-vad rāmam āgataṃ abravīt

te 'ti-prītās tam ākarṇya prāptaṃ rāmaṃ suhṛt-tamam /
tam arcayitvābhiyayuḥ sarve maṅgala-pāṇayaḥ

taṃ saṅgamya yathā-nyāyaṃ gām arghyaṃ ca nyavedayan /
teṣāṃ ye tat-prabhāva-jñāḥ praṇemuḥ śirasā balam

bandhūn kuśalinaḥ śrutvā pṛṣṭvā śivam anāmayam /
parasparam atho rāmo babhāṣe 'viklavaṃ vacaḥ

ugrasenaḥ kṣiteśeśo yad va ājñāpayat prabhuḥ /
tad avyagra-dhiyaḥ śrutvā kurudhvam avilambitam

yad yūyaṃ bahavas tv ekaṃ jitvādharmeṇa dhārmikam /
abadhnītātha tan mṛṣye bandhūnām aikya-kāmyayā

vīrya-śaurya-balonnaddham ātma-śakti-samaṃ vacaḥ /
kuravo baladevasya niśamyocuḥ prakopitāḥ

aho mahac citram idaṃ kāla-gatyā duratyayā /
ārurukṣaty upānad vai śiro mukuṭa-sevitam

ete yaunena sambaddhāḥ saha-śayyāsanāśanāḥ /
vṛṣṇayas tulyatāṃ nītā asmad-datta-nṛpāsanāḥ

cāmara-vyajane śaṅkham ātapatraṃ ca pāṇḍuram /
kirīṭam āsanaṃ śayyāṃ bhuñjate 'smad-upekṣayā

alaṃ yadūnāṃ naradeva-lāñchanair dātuḥ pratīpaiḥ phaṇinām ivāmṛtam /
ye 'smat-prasādopacitā hi yādavā ājñāpayanty adya gata-trapā bata

katham indro 'pi kurubhir bhīṣma-droṇārjunādibhiḥ /
adattam avarundhīta siṃha-grastam ivoraṇaḥ

BhP_10.68.029/0 śrī-bādarāyaṇir uvāca
janma-bandhu-śrīyonnaddha- madās te bharatarṣabha /
āśrāvya rāmaṃ durvācyam asabhyāḥ puram āviśan

dṛṣṭvā kurūnāṃ dauḥśīlyaṃ śrutvāvācyāni cācyutaḥ /
avocat kopa-saṃrabdho duṣprekṣyaḥ prahasan muhuḥ

nūnaṃ nānā-madonnaddhāḥ śāntiṃ necchanty asādhavaḥ /
teṣāṃ hi praśamo daṇḍaḥ paśūnāṃ laguḍo yathā

aho yadūn su-saṃrabdhān kṛṣṇaṃ ca kupitaṃ śanaiḥ /
sāntvayitvāham eteṣāṃ śamam icchann ihāgataḥ

ta ime manda-matayaḥ kalahābhiratāḥ khalāḥ /
taṃ mām avajñāya muhur durbhāṣān mānino 'bruvan

nograsenaḥ kila vibhur bhoja-vṛṣṇy-andhakeśvaraḥ /
śakrādayo loka-pālā yasyādeśānuvartinaḥ

sudharmākramyate yena pārijāto 'marāṅghripaḥ /
ānīya bhujyate so 'sau na kilādhyāsanārhaṇaḥ

yasya pāda-yugaṃ sākṣāc chrīr upāste 'khileśvarī /
sa nārhati kila śrīśo naradeva-paricchadān

yasyāṅghri-paṅkaja-rajo 'khila-loka-pālair $ mauly-uttamair dhṛtam upāsita-tīrtha-tīrtham &
brahmā bhavo 'ham api yasya kalāḥ kalāyāḥ % śrīś codvahema ciram asya nṛpāsanaṃ kva // BhP_10.68.037* //
bhuñjate kurubhir dattaṃ bhū-khaṇḍaṃ vṛṣṇayaḥ kila /
upānahaḥ kila vayaṃ svayaṃ tu kuravaḥ śiraḥ

aho aiśvarya-mattānāṃ mattānām iva māninām /
asambaddhā giṛo rukṣāḥ kaḥ sahetānuśāsītā

adya niṣkauravaṃ pṛthvīṃ kariṣyāmīty amarṣitaḥ /
gṛhītvā halam uttasthau dahann iva jagat-trayam

lāṅgalāgreṇa nagaram udvidārya gajāhvayam /
vicakarṣa sa gaṅgāyāṃ prahariṣyann amarṣitaḥ

jala-yānam ivāghūrṇaṃ gaṅgāyāṃ nagaraṃ patat /
ākṛṣyamāṇam ālokya kauravāḥ jāta-sambhramāḥ

tam eva śaraṇaṃ jagmuḥ sa-kuṭumbā jijīviṣavaḥ /
sa-lakṣmaṇaṃ puras-kṛtya sāmbaṃ prāñjalayaḥ prabhum

rāma rāmākhilādhāra prabhāvaṃ na vidāma te /
mūḍhānāṃ naḥ ku-buddhīnāṃ kṣantum arhasy atikramam

sthity-utpatty-apyayānāṃ tvam eko hetur nirāśrayaḥ /
lokān krīḍanakān īśa krīḍatas te vadanti hi

tvam eva mūrdhnīdam ananta līlayā bhū-maṇḍalaṃ bibharṣi sahasra-mūrdhan /
ante ca yaḥ svātma-niruddha-viśvaḥ śeṣe 'dvitīyaḥ pariśiṣyamāṇaḥ

kopas te 'khila-śikṣārthaṃ na dveṣān na ca matsarāt /
bibhrato bhagavan sattvaṃ sthiti-pālana-tatparaḥ

namas te sarva-bhūtātman sarva-śakti-dharāvyaya /
viśva-karman namas te 'stu tvāṃ vayaṃ śaraṇaṃ gatāḥ

BhP_10.68.049/0 śrī-śuka uvāca
evaṃ prapannaiḥ saṃvignair vepamānāyanair balaḥ /
prasāditaḥ su-prasanno mā bhaiṣṭety abhayaṃ dadau

duryodhanaḥ pāribarhaṃ kuñjarān ṣaṣṭi-hāyanān /
dadau ca dvādaśa-śatāny ayutāni turaṅgamān

rathānāṃ ṣaṭ-sahasrāṇi raukmāṇāṃ sūrya-varcasām /
dāsīnāṃ niṣka-kaṇṭhīnāṃ sahasraṃ duhitṛ-vatsalaḥ

pratigṛhya tu tat sarvaṃ bhagavān sātvatarṣabhaḥ /
sa-sutaḥ sa-snuṣaḥ prāyāt suhṛdbhir abhinanditaḥ

tataḥ praviṣṭaḥ sva-puraṃ halāyudhaḥ $ sametya bandhūn anurakta-cetasaḥ &
śaśaṃsa sarvaṃ yadu-puṅgavānāṃ % madhye sabhāyāṃ kuruṣu sva-ceṣṭitam // BhP_10.68.053* //
adyāpi ca puraṃ hy etat sūcayad rāma-vikramam /
samunnataṃ dakṣiṇato gaṅgāyām anudṛśyate