Bhagavata Purana · Chapter 10.67

BhP_10.67.001/0 śrī-rājovāca
bhuyo 'haṃ śrotum icchāmi rāmasyādbhuta-karmaṇaḥ /
anantasyāprameyasya yad anyat kṛtavān prabhuḥ

BhP_10.67.002/0 śrī-śuka uvāca
narakasya sakhā kaścid dvivido nāma vānaraḥ /
sugrīva-sacivaḥ so 'tha bhrātā maindasya vīryavān

sakhyuḥ so 'pacitiṃ kurvan vānaro rāṣṭra-viplavam /
pura-grāmākarān ghoṣān adahad vahnim utsṛjan

kvacit sa śailān utpāṭya tair deśān samacūrṇayat /
ānartān sutarām eva yatrāste mitra-hā hariḥ

kvacit samudra-madhya-stho dorbhyām utkṣipya taj-jalam /
deśān nāgāyuta-prāṇo velā-kūle nyamajjayat

āśramān ṛṣi-mukhyānāṃ kṛtvā bhagna-vanaspatīn /
adūṣayac chakṛn-mūtrair agnīn vaitānikān khalaḥ

puruṣān yoṣito dṛptaḥ kṣmābhṛd-dronī-guhāsu saḥ /
nikṣipya cāpyadhāc chailaiḥ peśaṣkārīva kīṭakam

evaṃ deśān viprakurvan dūṣayaṃś ca kula-striyaḥ /
śrutvā su-lalitaṃ gītaṃ giriṃ raivatakaṃ yayau

tatrāpaśyad yadu-patiṃ rāmaṃ puṣkara-mālinam /
sudarśanīya-sarvāṅgaṃ lalanā-yūtha-madhya-gam

gāyantaṃ vāruṇīṃ pītvā mada-vihvala-locanam /
vibhrājamānaṃ vapuṣā prabhinnam iva vāraṇam

duṣṭaḥ śākhā-mṛgaḥ śākhām ārūḍhaḥ kampayan drumān /
cakre kilakilā-śabdam ātmānaṃ sampradarśayan

tasya dhārṣṭyaṃ kaper vīkṣya taruṇyo jāti-cāpalāḥ /
hāsya-priyā vijahasur baladeva-parigrahāḥ

tā helayām āsa kapir bhrū-kṣepair sammukhādibhiḥ /
darśayan sva-gudaṃ tāsāṃ rāmasya ca nirīkṣitaḥ

taṃ grāvṇā prāharat kruddho balaḥ praharatāṃ varaḥ /
sa vañcayitvā grāvāṇaṃ madirā-kalaśaṃ kapiḥ

gṛhītvā helayām āsa dhūrtas taṃ kopayan hasan /
nirbhidya kalaśaṃ duṣṭo vāsāṃsy āsphālayad balam

kadarthī-kṛtya balavān vipracakre madoddhataḥ /
taṃ tasyāvinayaṃ dṛṣṭvā deśāṃś ca tad-upadrutān

kruddho muṣalam ādatta halaṃ cāri-jighāṃsayā /
dvivido 'pi mahā-vīryaḥ śālam udyamya pāṇinā

abhyetya tarasā tena balaṃ mūrdhany atāḍayat /
taṃ tu saṅkarṣaṇo mūrdhni patantam acalo yathā

pratijagrāha balavān sunandenāhanac ca tam /
mūṣalāhata-mastiṣko vireje rakta-dhārayā

girir yathā gairikayā prahāraṃ nānucintayan /
punar anyaṃ samutkṣipya kṛtvā niṣpatram ojasā

tenāhanat su-saṅkruddhas taṃ balaḥ śatadhācchinat /
tato 'nyena ruṣā jaghne taṃ cāpi śatadhācchinat

evaṃ yudhyan bhagavatā bhagne bhagne punaḥ punaḥ /
ākṛṣya sarvato vṛkṣān nirvṛkṣam akarod vanam

tato 'muñcac chilā-varṣaṃ balasyopary amarṣitaḥ /
tat sarvaṃ cūrṇayāṃ āsa līlayā muṣalāyudhaḥ

sa bāhū tāla-saṅkāśau muṣṭī-kṛtya kapīśvaraḥ /
āsādya rohiṇī-putraṃ tābhyāṃ vakṣasy arūrujat

yādavendro 'pi taṃ dorbhyāṃ tyaktvā muṣala-lāṅgale /
jatrāv abhyardayat kruddhaḥ so 'patad rudhiraṃ vaman

cakampe tena patatā sa-ṭaṅkaḥ sa-vanaspatiḥ /
parvataḥ kuru-śārdūla vāyunā naur ivāmbhasi

jaya-śabdo namaḥ-śabdaḥ sādhu sādhv iti cāmbare /
sura-siddha-munīndrāṇām āsīt kusuma-varṣiṇām

evaṃ nihatya dvividaṃ jagad-vyatikarāvaham /
saṃstūyamāno bhagavān janaiḥ sva-puram āviśat