Bhagavata Purana · Chapter 10.66

BhP_10.66.001/0 śrī-śuka uvāca
nanda-vrajaṃ gate rāme karūṣādhipatir nṛpa /
vāsudevo 'ham ity ajño dūtaṃ kṛṣṇāya prāhiṇot

tvaṃ vāsudevo bhagavān avatīṛno jagat-patiḥ /
iti prastobhito bālair mena ātmānam acyutam

dūtaṃ ca prāhiṇon mandaḥ kṛṣṇāyāvyakta-vartmane /
dvārakāyāṃ yathā bālo nṛpo bāla-kṛto 'budhaḥ

dūtas tu dvārakām etya sabhāyām āsthitaṃ prabhum /
kṛṣṇaṃ kamala-patrākṣaṃ rāja-sandeśam abravīt

vāsudevo 'vatīrno 'ham eka eva na cāparaḥ /
bhūtānām anukampārthaṃ tvaṃ tu mithyābhidhāṃ tyaja

yāni tvam asmac-cihnāni mauḍhyād bibharṣi sātvata /
tyaktvaihi māṃ tvaṃ śaraṇaṃ no ced dehi mamāhavam

BhP_10.66.007/0 śrī-śuka uvāca
katthanaṃ tad upākarṇya pauṇḍrakasyālpa-medhasaḥ /
ugrasenādayaḥ sabhyā uccakair jahasus tadā

uvāca dūtaṃ bhagavān parihāsa-kathām anu /
utsrakṣye mūḍha cihnāni yais tvam evaṃ vikatthase

mukhaṃ tad apidhāyājña kaṅka-gṛdhra-vaṭair vṛtaḥ /
śayiṣyase hatas tatra bhavitā śaraṇaṃ śunām

iti dūtas tam ākṣepaṃ svāmine sarvam āharat /
kṛṣṇo 'pi ratham āsthāya kāśīm upajagāma ha

pauṇḍrako 'pi tad-udyogam upalabhya mahā-rathaḥ /
akṣauhiṇībhyāṃ saṃyukto niścakrāma purād drutam

tasya kāśī-patir mitraṃ pārṣṇi-grāho 'nvayān nṛpa /
akṣauhiṇībhis tisṛbhir apaśyat pauṇḍrakaṃ hariḥ

śaṅkhāry-asi-gadā-śārṅga- śrīvatsādy-upalakṣitam /
bibhrāṇaṃ kaustubha-maṇiṃ vana-mālā-vibhūṣitam

kauśeya-vāsasī pīte vasānaṃ garuḍa-dhvajam /
amūlya-mauly-ābharaṇaṃ sphuran-makara-kuṇḍalam

dṛṣṭvā tam ātmanas tulyaṃ veṣaṃ kṛtrimam āsthitam /
yathā naṭaṃ raṅga-gataṃ vijahāsa bhṛśaṃ harīḥ

śulair gadābhiḥ parighaiḥ śakty-ṛṣṭi-prāsa-tomaraiḥ /
asibhiḥ paṭṭiśair bāṇaiḥ prāharann arayo harim

kṛṣṇas tu tat pauṇḍraka-kāśirājayor $ balaṃ gaja-syandana-vāji-patti-mat &
gadāsi-cakreṣubhir ārdayad bhṛśaṃ % yathā yugānte huta-bhuk pṛthak prajāḥ // BhP_10.66.017* //
āyodhanaṃ tad ratha-vāji-kuñjara- dvipat-kharoṣṭrair ariṇāvakhaṇḍitaiḥ /
babhau citaṃ moda-vahaṃ manasvinām ākrīḍanaṃ bhūta-pater ivolbaṇam

athāha pauṇḍrakaṃ śaurir bho bho pauṇḍraka yad bhavān /
dūta-vākyena mām āha tāny astraṇy utsṛjāmi te

tyājayiṣye 'bhidhānaṃ me yat tvayājña mṛṣā dhṛtam /
vrajāmi śaranaṃ te 'dya yadi necchāmi saṃyugam

iti kṣiptvā śitair bāṇair virathī-kṛtya pauṇḍrakam /
śiro 'vṛścad rathāṅgena vajreṇendro yathā gireḥ

tathā kāśī-pateḥ kāyāc chira utkṛtya patribhiḥ /
nyapātayat kāśī-puryāṃ padma-kośam ivānilaḥ

evaṃ matsariṇam hatvā pauṇḍrakaṃ sa-sakhaṃ hariḥ /
dvārakām āviśat siddhair gīyamāna-kathāmṛtaḥ

sa nityaṃ bhagavad-dhyāna- pradhvastākhila-bandhanaḥ /
bibhrāṇaś ca hare rājan svarūpaṃ tan-mayo 'bhavat

śiraḥ patitam ālokya rāja-dvāre sa-kuṇḍalam /
kim idaṃ kasya vā vaktram iti saṃśiśire janāḥ

rājñaḥ kāśī-pater jñātvā mahiṣyaḥ putra-bāndhavāḥ /
paurāś ca hā hatā rājan nātha nātheti prārudan

sudakṣiṇas tasya sutaḥ kṛtvā saṃsthā-vidhiṃ pateḥ /
nihatya pitṛ-hantāraṃ yāsyāmy apacitiṃ pituḥ

ity ātmanābhisandhāya sopādhyāyo maheśvaram /
su-dakṣiṇo 'rcayām āsa parameṇa samādhinā

prīto 'vimukte bhagavāṃs tasmai varam adād vibhuḥ /
pitṛ-hantṛ-vadhopāyaṃ sa vavre varam īpsitam

dakṣiṇāgniṃ paricara brāhmaṇaiḥ samam ṛtvijam /
abhicāra-vidhānena sa cāgniḥ pramathair vṛtaḥ

sādhayiṣyati saṅkalpam abrahmaṇye prayojitaḥ /
ity ādiṣṭas tathā cakre kṛṣṇāyābhicaran vratī

tato 'gnir utthitaḥ kuṇḍān mūrtimān ati-bhīṣaṇaḥ /
tapta-tāmra-śikhā-śmaśrur aṅgārodgāri-locanaḥ

daṃṣṭrogra-bhru-kuṭī-daṇḍa- kaṭhorāsyaḥ sva-jihvayā /
ālihan sṛkvaṇī nagno vidhunvaṃs tri-śikhaṃ jvalat

padbhyāṃ tāla-pramāṇābhyāṃ kampayann avanī-talam /
so 'bhyadhāvad vṛto bhūtair dvārakāṃ pradahan diśaḥ

tam ābhicāra-dahanam āyāntaṃ dvārakaukasaḥ /
vilokya tatrasuḥ sarve vana-dāhe mṛgā yathā

akṣaiḥ sabhāyāṃ krīḍantaṃ bhagavantaṃ bhayāturāḥ /
trāhi trāhi tri-lokeśa vahneḥ pradahataḥ puram

śrutvā taj jana-vaiklavyaṃ dṛṣṭvā svānāṃ ca sādhvasam /
śaraṇyaḥ samprahasyāha mā bhaiṣṭety avitāsmy aham

sarvasyāntar-bahiḥ-sākṣī kṛtyāṃ māheśvarīṃ vibhuḥ /
vijñāya tad-vighātārthaṃ pārśva-sthaṃ cakram ādiśat

tat sūrya-koṭi-pratimaṃ sudarśanaṃ jājvalyamānaṃ pralayānala-prabham /
sva-tejasā khaṃ kakubho 'tha rodasī cakraṃ mukundāstraṃ athāgnim ārdayat

kṛtyānalaḥ pratihataḥ sa rathānga-pāṇer $ astraujasā sa nṛpa bhagna-mukho nivṛttaḥ &
vārāṇasīṃ parisametya sudakṣiṇaṃ taṃ % sartvig-janaṃ samadahat sva-kṛto 'bhicāraḥ // BhP_10.66.040* //
cakraṃ ca viṣṇos tad-anupraviṣṭaṃ vārānasīṃ sāṭṭa-sabhālayāpaṇām /
sa-gopurāṭṭālaka-koṣṭha-saṅkulāṃ sa-kośa-hasty-aśva-rathānna-śālinīm

dagdhvā vārāṇasīṃ sarvāṃ viṣṇoś cakraṃ sudarśanam /
bhūyaḥ pārśvam upātiṣṭhat kṛṣṇasyākliṣṭa-karmaṇaḥ

ya enaṃ śrāvayen martya uttamaḥ-śloka-vikramam /
samāhito vā śṛṇuyāt sarva-pāpaiḥ pramucyate