Bhagavata Purana · Chapter 10.65

BhP_10.65.001/0 śrī-śuka uvāca
balabhadraḥ kuru-śreṣṭha bhagavān ratham āsthitaḥ /
suhṛd-didṛkṣur utkaṇṭhaḥ prayayau nanda-gokulam

pariṣvaktaś cirotkaṇṭhair gopair gopībhir eva ca /
rāmo 'bhivādya pitarāv āśīrbhir abhinanditaḥ

ciraṃ naḥ pāhi dāśārha sānujo jagad-īśvaraḥ /
ity āropyāṅkam āliṅgya netraiḥ siṣicatur jalaiḥ

gopa-vṛddhāṃś ca vidhi-vad yaviṣṭhair abhivanditaḥ /
yathā-vayo yathā-sakhyaṃ yathā-sambandham ātmanaḥ

samupetyātha gopālān hāsya-hasta-grahādibhiḥ /
viśrāntam sukham āsīnaṃ papracchuḥ paryupāgatāḥ

pṛṣṭāś cānāmayaṃ sveṣu prema-gadgadayā girā /
kṛṣṇe kamala-patrākṣe sannyastākhila-rādhasaḥ

kaccin no bāndhavā rāma sarve kuśalam āsate /
kaccit smaratha no rāma yūyaṃ dāra-sutānvitāḥ

diṣṭyā kaṃso hataḥ pāpo diṣṭyā muktāḥ suhṛj-janāḥ /
nihatya nirjitya ripūn diṣṭyā durgaṃ samāśrītāḥ

gopyo hasantyaḥ papracchū rāma-sandarśanādṛtāḥ /
kaccid āste sukhaṃ kṛṣṇaḥ pura-strī-jana-vallabhaḥ

kaccit smarati vā bandhūn pitaraṃ mātaraṃ ca saḥ /
apy asau mātaraṃ draṣṭuṃ sakṛd apy āgamiṣyati /
api vā smarate 'smākam anusevāṃ mahā-bhujaḥ

mātaraṃ pitaraṃ bhrātṝn patīn putrān svasṝn api /
yad-arthe jahima dāśārha dustyajān sva-janān prabho

tā naḥ sadyaḥ parityajya gataḥ sañchinna-sauhṛdaḥ /
kathaṃ nu tādṛśaṃ strībhir na śraddhīyeta bhāṣitam

kathaṃ nu gṛhṇanty anavasthitātmano $ vacaḥ kṛta-ghnasya budhāḥ pura-striyaḥ &
gṛhṇanti vai citra-kathasya sundara- % smitāvalokocchvasita-smarāturāḥ // BhP_10.65.013* //
kiṃ nas tat-kathayā gopyaḥ kathāḥ kathayatāparāḥ /
yāty asmābhir vinā kālo yadi tasya tathaiva naḥ

iti prahasitaṃ śaurer jalpitaṃ cāru-vīkṣitam /
gatiṃ prema-pariṣvaṅgaṃ smarantyo ruruduḥ striyaḥ

saṅkarṣaṇas tāḥ kṛṣṇasya sandeśair hṛdayaṃ-gamaiḥ /
sāntvayām āsa bhagavān nānānunaya-kovidaḥ

dvau māsau tatra cāvātsīn madhuṃ mādhavaṃ eva ca /
rāmaḥ kṣapāsu bhagavān gopīnāṃ ratim āvahan

pūrṇa-candra-kalā-mṛṣṭe kaumudī-gandha-vāyunā /
yamunopavane reme sevite strī-gaṇair vṛtaḥ

varuṇa-preṣitā devī vāruṇī vṛkṣa-koṭarāt /
patantī tad vanaṃ sarvaṃ sva-gandhenādhyavāsayat

taṃ gandhaṃ madhu-dhārāyā vāyunopahṛtaṃ balaḥ /
āghrāyopagatas tatra lalanābhiḥ samaṃ papau

upagīyamāno gandharvair vanitā-śobhi-maṇḍale /
reme kareṇu-yūtheśo māhendra iva vāraṇaḥ

nedur dundubhayo vyomni vavṛṣuḥ kusumair mudā /
gandharvā munayo rāmaṃ tad-vīryair īḍire tadā

upagīyamāna-carito vanitābhir halāyudha /
vaneṣu vyacarat kṣīvo mada-vihvala-locanaḥ

sragvy eka-kuṇḍalo matto vaijayantyā ca mālayā /
bibhrat smita-mukhāmbhojaṃ sveda-prāleya-bhūṣitam

sa ājuhāva yamunāṃ jala-krīḍārtham īśvaraḥ /
nijaṃ vākyam anādṛtya matta ity āpagāṃ balaḥ

anāgatāṃ halāgreṇa kupito vicakarṣa ha /
pāpe tvaṃ mām avajñāya yan nāyāsi mayāhutā /
neṣye tvāṃ lāṅgalāgreṇa śatadhā kāma-cāriṇīm

evaṃ nirbhartsitā bhītā yamunā yadu-nandanam /
uvāca cakitā vācaṃ patitā pādayor nṛpa

rāma rāma mahā-bāho na jāne tava vikramam /
yasyaikāṃśena vidhṛtā jagatī jagataḥ pate

paraṃ bhāvaṃ bhagavato bhagavan mām ajānatīm /
moktum arhasi viśvātman prapannāṃ bhakta-vatsala

tato vyamuñcad yamunāṃ yācito bhagavān balaḥ /
vijagāha jalaṃ strībhiḥ kareṇubhir ivebha-rāṭ

kāmaṃ vihṛtya salilād uttīrṇāyāsītāmbare /
bhūṣaṇāni mahārhāṇi dadau kāntiḥ śubhāṃ srajam

vasitvā vāsasī nīle mālāṃ āmucya kāñcanīm /
reye sv-alaṅkṛto lipto māhendra iva vāraṇaḥ

adyāpi dṛśyate rājan yamunākṛṣṭa-vartmanā /
balasyānanta-vīryasya vīryaṃ sūcayatīva hi

evaṃ sarvā niśā yātā ekeva ramato vraje /
rāmasyākṣipta-cittasya mādhuryair vraja-yoṣitām