Bhagavata Purana · Chapter 10.58

yas tv etad bhagavata īśvarasya viṣṇor $ vīryāḍhyaṃ vṛjina-haraṃ su-maṅgalaṃ ca &
ākhyānaṃ paṭhati śṛṇoty anusmared vā % duṣkīrtiṃ duritam apohya yāti śāntim // BhP_10.57.042*
0 śrī-śuka uvāca
ekadā pāṇḍavān draṣṭuṃ pratītān puruṣottamaḥ /
indraprasthaṃ gataḥ śṛīmān yuyudhānādibhir vṛtaḥ

dṛṣṭvā tam āgataṃ pārthā mukundam akhileśvaram /
uttasthur yugapad vīrāḥ prāṇā mukhyam ivāgatam

pariṣvajyācyutaṃ vīrā aṅga-saṅga-hatainasaḥ /
sānurāga-smitaṃ vaktraṃ vīkṣya tasya mudaṃ yayuḥ

yudhiṣṭhirasya bhīmasya kṛtvā pādābhivandanam /
phālgunaṃ parirabhyātha yamābhyāṃ cābhivanditaḥ

paramāsana āsīnaṃ kṛṣṇā kṛṣṇam aninditā /
navoḍhā vrīḍitā kiñcic chanair etyābhyavandata

tathaiva sātyakiḥ pārthaiḥ pūjitaś cābhivanditaḥ /
niṣasādāsane 'nye ca pūjitāḥ paryupāsata

pṛthām samāgatya kṛtābhivādanas tayāti-hārdārdra-dṛśābhirambhitaḥ /
āpṛṣṭavāṃs tāṃ kuśalaṃ saha-snuṣāṃ pitṛ-ṣvasāram paripṛṣṭa-bāndhavaḥ

tam āha prema-vaiklavya- ruddha-kaṇṭhāśru-locanā /
smarantī tān bahūn kleśān kleśāpāyātma-darśanam

tadaiva kuśalaṃ no 'bhūt sa-nāthās te kṛtā vayam /
jñatīn naḥ smaratā kṛṣṇa bhrātā me preṣitas tvayā

na te 'sti sva-para-bhrāntir viśvasya suhṛd-ātmanaḥ /
tathāpi smaratāṃ śaśvat kleśān haṃsi hṛdi sthitaḥ

BhP_10.58.011/0 yudhiṣṭhira uvāca
kiṃ na ācaritaṃ śreyo na vedāham adhīśvara /
yogeśvarāṇāṃ durdarśo yan no dṛṣṭaḥ ku-medhasām

iti vai vārṣikān māsān rājñā so 'bhyarthitaḥ sukham /
janayan nayanānandam indraprasthaukasāṃ vibhuḥ

ekadā ratham āruhya vijayo vānara-dhvajam /
gāṇḍīvaṃ dhanur ādāya tūṇau cākṣaya-sāyakau

sākaṃ kṛṣṇena sannaddho vihartuṃ vipinaṃ mahat /
bahu-vyāla-mṛgākīrṇaṃ prāviśat para-vīra-hā

tatrāvidhyac charair vyāghrān śūkarān mahiṣān rurūn /
śarabhān gavayān khaḍgān hariṇān śaśa-śallakān

tān ninyuḥ kiṅkarā rājñe medhyān parvaṇy upāgate /
tṛṭ-parītaḥ pariśrānto bibhatsur yamunām agāt

tatropaspṛśya viśadaṃ pītvā vāri mahā-rathau /
kṛṣṇau dadṛśatuḥ kanyāṃ carantīṃ cāru-darśanām

tām āsādya varārohāṃ su-dvijāṃ rucirānanām /
papraccha preṣitaḥ sakhyā phālgunaḥ pramadottamām

kā tvaṃ kasyāsi su-śroṇi kuto vā kiṃ cikīrṣasi /
manye tvāṃ patim icchantīṃ sarvaṃ kathaya śobhane

BhP_10.58.020/0 śrī-kālindy uvāca
ahaṃ devasya savitur duhitā patim icchatī /
viṣṇuṃ vareṇyaṃ vara-daṃ tapaḥ paramam āsthitaḥ

nānyaṃ patiṃ vṛṇe vīra tam ṛte śrī-niketanam /
tuṣyatāṃ me sa bhagavān mukundo 'nātha-saṃśrayaḥ

kālindīti samākhyātā vasāmi yamunā-jale /
nirmite bhavane pitrā yāvad acyuta-darśanam

tathāvadad guḍākeśo vāsudevāya so 'pi tām /
ratham āropya tad-vidvān dharma-rājam upāgamat

yadaiva kṛṣṇaḥ sandiṣṭaḥ pārthānāṃ paramādbutam /
kārayām āsa nagaraṃ vicitraṃ viśvakarmaṇā

bhagavāṃs tatra nivasan svānāṃ priya-cikīrṣayā /
agnaye khāṇḍavaṃ dātum arjunasyāsa sārathiḥ

so 'gnis tuṣṭo dhanur adād dhayān śvetān rathaṃ nṛpa /
arjunāyākṣayau tūṇau varma cābhedyam astribhiḥ

mayaś ca mocito vahneḥ sabhāṃ sakhya upāharat /
yasmin duryodhanasyāsīj jala-sthala-dṛśi-bhramaḥ

sa tena samanujñātaḥ suhṛdbhiś cānumoditaḥ /
āyayau dvārakāṃ bhūyaḥ sātyaki-pramakhair vṛtaḥ

athopayeme kālindīṃ su-puṇya-rtv-ṛkṣa ūrjite /
vitanvan paramānandaṃ svānāṃ parama-maṅgalaḥ

vindyānuvindyāv āvantyau duryodhana-vaśānugau /
svayaṃ-vare sva-bhaginīṃ kṛṣṇe saktāṃ nyaṣedhatām

rājādhidevyās tanayāṃ mitravindāṃ pitṛ-ṣvasuḥ /
prasahya hṛtavān kṛṣṇo rājan rājñāṃ prapaśyatām

nagnajin nāma kauśalya āsīd rājāti-dhārmikaḥ /
tasya satyābhavat kanyā devī nāgnajitī nṛpa

na tāṃ śekur nṛpā voḍhum ajitvā sapta-go-vṛṣān /
tīkṣṇa-śṛṅgān su-durdharṣān vīrya-gandhāsahān khalān

tāṃ śrutvā vṛṣa-jil-labhyāṃ bhagavān sātvatāṃ patiḥ /
jagāma kauśalya-puraṃ sainyena mahatā vṛtaḥ

sa kośala-patiḥ prītaḥ pratyutthānāsanādibhiḥ /
arhaṇenāpi guruṇā pūjayan pratinanditaḥ

varaṃ vilokyābhimataṃ samāgataṃ narendra-kanyā cakame ramā-patim /
bhūyād ayaṃ me patir āśiṣo 'nalaḥ karotu satyā yadi me dhṛto vrataḥ

yat-pāda-paṅkaja-rajaḥ śirasā bibharti $ śṛīr abya-jaḥ sa-giriśaḥ saha loka-pālaiḥ &
līlā-tanuḥ sva-kṛta-setu-parīpsayā yaḥ % kāle 'dadhat sa bhagavān mama kena tuṣyet // BhP_10.58.037* //
arcitaṃ punar ity āha nārāyaṇa jagat-pate /
ātmānandena pūrṇasya karavāṇi kim alpakaḥ

BhP_10.58.039/0 śrī-śuka uvāca
tam āha bhagavān hṛṣṭaḥ kṛtāsana-parigrahaḥ /
megha-gambhīrayā vācā sa-smitaṃ kuru-nandana

BhP_10.58.040/0 śrī-bhagavān uvāca
narendra yācñā kavibhir vigarhitā rājanya-bandhor nija-dharma-vartinaḥ /
tathāpi yāce tava sauhṛdecchayā kanyāṃ tvadīyāṃ na hi śulka-dā vayam

BhP_10.58.041/0 śrī-rājovāca
ko 'nyas te 'bhyadhiko nātha kanyā-vara ihepsitaḥ /
guṇaika-dhāmno yasyāṅge śrīr vasaty anapāyinī

kintv asmābhiḥ kṛtaḥ pūrvaṃ samayaḥ sātvatarṣabha /
puṃsāṃ vīrya-parīkṣārthaṃ kanyā-vara-parīpsayā

saptaite go-vṛṣā vīra durdāntā duravagrahāḥ /
etair bhagnāḥ su-bahavo bhinna-gātrā nṛpātmajāḥ

yad ime nigṛhītāḥ syus tvayaiva yadu-nandana /
varo bhavān abhimato duhitur me śriyaḥ-pate

evaṃ samayam ākarṇya baddhvā parikaraṃ prabhuḥ /
ātmānaṃ saptadhā kṛtvā nyagṛhṇāl līlayaiva tān

baddhvā tān dāmabhiḥ śaurir bhagna-darpān hataujasaḥ /
vyakarsal līlayā baddhān bālo dāru-mayān yathā

tataḥ prītaḥ sutāṃ rājā dadau kṛṣṇāya vismitaḥ /
tāṃ pratyagṛhṇād bhagavān vidhi-vat sadṛśīṃ prabhuḥ

rāja-patnyaś ca duhituḥ kṛṣṇaṃ labdhvā priyaṃ patim /
lebhire paramānandaṃ jātaś ca paramotsavaḥ

śaṅkha-bhery-ānakā nedur gīta-vādya-dvijāśiṣaḥ /
narā nāryaḥ pramuditāḥ suvāsaḥ-srag-alaṅkṛtāḥ

daśa-dhenu-sahasrāṇi pāribarham adād vibhuḥ /
yuvatīnāṃ tri-sāhasraṃ niṣka-grīva-suvāsasam

nava-nāga-sahasrāṇi nāgāc chata-guṇān rathān /
rathāc chata-guṇān aśvān aśvāc chata-guṇān narān

dampatī ratham āropya mahatyā senayā vṛtau /
sneha-praklinna-hṛdayo yāpayām āsa kośalaḥ

śrutvaitad rurudhur bhūpā nayantaṃ pathi kanyakām /
bhagna-vīryāḥ su-durmarṣā yadubhir go-vṛṣaiḥ purā

tān asyataḥ śara-vrātān bandhu-priya-kṛd arjunaḥ /
gāṇḍīvī kālayām āsa siṃhaḥ kṣudra-mṛgān iva

pāribarham upāgṛhya dvārakām etya satyayā /
reme yadūnām ṛṣabho bhagavān devakī-sutaḥ

śrutakīrteḥ sutāṃ bhadrāṃ upayeme pitṛ-ṣvasuḥ /
kaikeyīṃ bhrātṛbhir dattāṃ kṛṣṇaḥ santardanādibhiḥ

sutāṃ ca madrādhipater lakṣmaṇāṃ lakṣaṇair yatām /
svayaṃ-vare jahāraikaḥ sa suparṇaḥ sudhām iva

anyāś caivaṃ-vidhā bhāryāḥ kṛṣṇasyāsan sahasraśaḥ /
bhaumaṃ hatvā tan-nirodhād āhṛtāś cāru-darśanāḥ