Bhagavata Purana · Chapter 10.53

BhP_10.53.001/0 śrī-śuka uvāca
vaidarbhyāḥ sa tu sandeśaṃ niśamya yadu-nandanaḥ /
pragṛhya pāṇinā pāṇiṃ prahasann idam abravīt

BhP_10.53.002/0 śrī-bhagavān uvāca
tathāham api tac-citto nidrāṃ ca na labhe niśi /
vedāham rukmiṇā dveṣān mamodvāho nivāritaḥ

tām ānayiṣya unmathya rājanyāpasadān mṛdhe /
mat-parām anavadyāṅgīm edhaso 'gni-śikhām iva

BhP_10.53.004/0 śrī-śuka uvāca
udvāharkṣaṃ ca vijñāya rukmiṇyā madhusūdanaḥ /
rathaḥ saṃyujyatām āśu dārukety āha sārathim

sa cāśvaiḥ śaibya-sugrīva- meghapuṣpa-balāhakaiḥ /
yuktaṃ ratham upānīya tasthau prāñjalir agrataḥ

āruhya syandanaṃ śaurir dvijam āropya tūrṇa-gaiḥ /
ānartād eka-rātreṇa vidarbhān agamad dhayaiḥ

rājā sa kuṇḍina-patiḥ putra-sneha-vaśānugaḥ /
śiśupālāya svāṃ kanyāṃ dāsyan karmāṇy akārayat

puraṃ sammṛṣṭa-saṃsikta- mārga-rathyā-catuṣpatham /
citra-dhvaja-patākābhis toraṇaiḥ samalaṅkṛtam

srag-gandha-mālyābharaṇair virajo-'mbara-bhūṣitaiḥ /
juṣṭaṃ strī-puruṣaiḥ śrīmad- gṛhair aguru-dhūpitaiḥ

pitṝn devān samabhyarcya viprāṃś ca vidhi-van nṛpa /
bhojayitvā yathā-nyāyaṃ vācayām āsa maṅgalam

su-snātāṃ su-datīṃ kanyāṃ kṛta-kautuka-maṅgalām /
āhatāṃśuka-yugmena bhūṣitāṃ bhūṣaṇottamaiḥ

cakruḥ sāma-rg-yajur-mantrair vadhvā rakṣāṃ dvijottamāḥ /
purohito 'tharva-vid vai juhāva graha-śāntaye

hiraṇya-rūpya vāsāṃsi tilāṃś ca guḍa-miśritān /
prādād dhenūś ca viprebhyo rājā vidhi-vidāṃ varaḥ

evaṃ cedi-patī rājā damaghoṣaḥ sutāya vai /
kārayām āsa mantra-jñaiḥ sarvam abhyudayocitam

mada-cyudbhir gajānīkaiḥ syandanair hema-mālibhiḥ /
patty-aśva-saṅkulaiḥ sainyaiḥ parītaḥ kuṇdīnaṃ yayau

taṃ vai vidarbhādhipatiḥ samabhyetyābhipūjya ca /
niveśayām āsa mudā kalpitānya-niveśane

tatra śālvo jarāsandho dantavakro vidūrathaḥ /
ājagmuś caidya-pakṣīyāḥ pauṇḍrakādyāḥ sahasraśaḥ

kṛṣṇa-rāma-dviṣo yattāḥ kanyāṃ caidyāya sādhitum /
yady āgatya haret kṛṣno rāmādyair yadubhir vṛtaḥ

yotsyāmaḥ saṃhatās tena iti niścita-mānasāḥ /
ājagmur bhū-bhujaḥ sarve samagra-bala-vāhanāḥ

śrutvaitad bhagavān rāmo vipakṣīya nṛpodyamam /
kṛṣṇaṃ caikaṃ gataṃ hartuṃ kanyāṃ kalaha-śaṅkitaḥ

balena mahatā sārdhaṃ bhrātṛ-sneha-pariplutaḥ /
tvaritaḥ kuṇḍinaṃ prāgād gajāśva-ratha-pattibhiḥ

bhīṣma-kanyā varārohā kāṅkṣanty āgamanaṃ hareḥ /
pratyāpattim apaśyantī dvijasyācintayat tadā

aho tri-yāmāntarita udvāho me 'lpa-rādhasaḥ /
nāgacchaty aravindākṣo nāhaṃ vedmy atra kāraṇam /
so 'pi nāvartate 'dyāpi mat-sandeśa-haro dvijaḥ

api mayy anavadyātmā dṛṣṭvā kiñcij jugupsitam /
mat-pāṇi-grahaṇe nūnaṃ nāyāti hi kṛtodyamaḥ

durbhagāyā na me dhātā nānukūlo maheśvaraḥ /
devī vā vimukhī gaurī rudrāṇī girijā satī

evaṃ cintayatī bālā govinda-hṛta-mānasā /
nyamīlayata kāla-jñā netre cāśru-kalākule

evaṃ vadhvāḥ pratīkṣantyā govindāgamanaṃ nṛpa /
vāma ūrur bhujo netram asphuran priya-bhāṣiṇaḥ

atha kṛṣṇa-vinirdiṣṭaḥ sa eva dvija-sattamaḥ /
antaḥpura-carīṃ devīṃ rāja-putrīm dadarśa ha

sā taṃ prahṛṣṭa-vadanam avyagrātma-gatiṃ satī /
ālakṣya lakṣaṇābhijñā samapṛcchac chuci-smitā

tasyā āvedayat prāptaṃ śaśaṃsa yadu-nandanam /
uktaṃ ca satya-vacanam ātmopanayanaṃ prati

tam āgataṃ samājñāya vaidarbhī hṛṣṭa-mānasā /
na paśyantī brāhmaṇāya priyam anyan nanāma sā

prāptau śrutvā sva-duhitur udvāha-prekṣaṇotsukau /
abhyayāt tūrya-ghoṣeṇa rāma-kṛṣṇau samarhaṇaiḥ

madhu-parkam upānīya vāsāṃsi virajāṃsi saḥ /
upāyanāny abhīṣṭāni vidhi-vat samapūjayat

tayor niveśanaṃ śrīmad upākalpya mahā-matiḥ /
sa-sainyayoḥ sānugayor ātithyaṃ vidadhe yathā

evaṃ rājñāṃ sametānāṃ yathā-vīryaṃ yathā-vayaḥ /
yathā-balaṃ yathā-vittaṃ sarvaiḥ kāmaiḥ samarhayat

kṛṣṇam āgatam ākarṇya vidarbha-pura-vāsinaḥ /
āgatya netrāñjalibhiḥ papus tan-mukha-paṅkajam

asyaiva bhāryā bhavituṃ rukmiṇy arhati nāparā /
asāv apy anavadyātmā bhaiṣmyāḥ samucitaḥ patiḥ

kiñcit su-caritaṃ yan nas tena tuṣṭas tri-loka-kṛt /
anugṛhṇātu gṛhṇātu vaidarbhyāḥ pāṇim acyutaḥ

evaṃ prema-kalā-baddhā vadanti sma puraukasaḥ /
kanyā cāntaḥ-purāt prāgād bhaṭair guptāmbikālayam

padbhyāṃ viniryayau draṣṭuṃ bhavānyāḥ pāda-pallavam /
sā cānudhyāyatī samyaṅ mukunda-caraṇāmbujam

yata-vāṅ mātṛbhiḥ sārdhaṃ sakhībhiḥ parivāritā /
guptā rāja-bhaṭaiḥ śūraiḥ sannaddhair udyatāyudhaiḥ /
mṛḍaṅga-śaṅkha-paṇavās tūrya-bheryaś ca jaghnire

nānopahāra balibhir vāramukhyāḥ sahasraśaḥ /
srag-gandha-vastrābharaṇair dvija-patnyaḥ sv-alaṅkṛtāḥ

gāyantyaś ca stuvantaś ca gāyakā vādya-vādakāḥ /
parivārya vadhūṃ jagmuḥ sūta-māgadha-vandinaḥ

āsādya devī-sadanaṃ dhauta-pāda-karāmbujā /
upaspṛśya śuciḥ śāntā praviveśāmbikāntikam

tāṃ vai pravayaso bālāṃ vidhi-jñā vipra-yoṣitaḥ /
bhavānīṃ vandayāṃ cakrur bhava-patnīṃ bhavānvitām

namasye tvāmbike 'bhīkṣṇaṃ sva-santāna-yutāṃ śivām /
bhūyāt patir me bhagavān kṛṣṇas tad anumodatām

adbhir gandhākṣatair dhūpair vāsaḥ-sraṅ-mālya bhūṣaṇaiḥ /
nānopahāra-balibhiḥ pradīpāvalibhiḥ pṛthak

vipra-striyaḥ patimatīs tathā taiḥ samapūjayat /
lavaṇāpūpa-tāmbūla- kaṇṭha-sūtra-phalekṣubhiḥ

tasyai striyas tāḥ pradaduḥ śeṣāṃ yuyujur āśiṣaḥ /
tābhyo devyai namaś cakre śeṣāṃ ca jagṛhe vadhūḥ

muni-vratam atha tyaktvā niścakrāmāmbikā-gṛhāt /
pragṛhya pāṇinā bhṛtyāṃ ratna-mudropaśobhinā

tāṃ deva-māyām iva dhīra-mohinīṃ su-madhyamāṃ kuṇḍala-maṇḍitānanām /
śyāmāṃ nitambārpita-ratna-mekhalāṃ vyañjat-stanīṃ kuntala-śaṅkitekṣaṇām

śuci-smitāṃ bimba-phalādhara-dyuti- śoṇāyamāna-dvija-kunda-kuḍmalām /
padā calantīṃ kala-haṃsa-gāminīṃ siñjat-kalā-nūpura-dhāma-śobhinā

vilokya vīrā mumuhuḥ samāgatā yaśasvinas tat-kṛta-hṛc-chayārditāḥ /
yāṃ vīkṣya te nṛpatayas tad udāra-hāsa- vrīdāvaloka-hṛta-cetasa ujjhitāstrāḥ

petuḥ kṣitau gaja-rathāśva-gatā vimūḍhā yātrā-cchalena haraye 'rpayatīṃ sva-śobhām /
saivaṃ śanaiś calayatī cala-padma-kośau prāptiṃ tadā bhagavataḥ prasamīkṣamāṇā

utsārya vāma-karajair alakān apaṅgaiḥ prāptān hriyaikṣata nṛpān dadṛśe 'cyutaṃ ca /
tāṃ rāja-kanyāṃ ratham ārurakṣatīṃ jahāra kṛṣṇo dviṣatāṃ samīkṣatām

rathaṃ samāropya suparṇa-lakṣaṇaṃ rājanya-cakraṃ paribhūya mādhavaḥ /
tato yayau rāma-purogamaḥ śanaiḥ śṛgāla-madhyād iva bhāga-hṛd dhariḥ