Bhagavata Purana · Chapter 10.46

BhP_10.46.001/0 śrī-śuka uvāca
vṛṣṇīnāṃ pravaro mantrī kṛṣṇasya dayitaḥ sakhā /
śiṣyo bṛhaspateḥ sākṣād uddhavo buddhi-sattamaḥ

tam āha bhagavān preṣṭhaṃ bhaktam ekāntinaṃ kvacit /
gṛhītvā pāṇinā pāṇiṃ prapannārti-haro hariḥ

gacchoddhava vrajaṃ saumya pitror nau prītim āvaha /
gopīnāṃ mad-viyogādhiṃ mat-sandeśair vimocaya

tā man-manaskā tṛṣṭ-prāṇā mad-arthe tyakta-daihikāḥ /
mām eva dayitaṃ preṣṭham ātmānaṃ manasā gatāḥ /
ye tyakta-loka-dharmāś ca mad-arthe tān bibharmy aham

mayi tāḥ preyasāṃ preṣṭhe dūra-sthe gokula-striyaḥ /
smarantyo 'ṅga vimuhyanti virahautkaṇṭhya-vihvalāḥ

dhārayanty ati-kṛcchreṇa prāyaḥ prāṇān kathañcana /
pratyāgamana-sandeśair ballavyo me mad-ātmikāḥ

BhP_10.46.007/0 śrī-śuka uvāca
ity ukta uddhavo rājan sandeśaṃ bhartur ādṛtaḥ /
ādāya ratham āruhya prayayau nanda-gokulam

prāpto nanda-vrajaṃ śrīmān nimlocati vibhāvasau /
channa-yānaḥ praviśatāṃ paśūnāṃ khura-reṇubhiḥ

vāsitārthe 'bhiyudhyadbhir nāditaṃ śuśmibhir vṛṣaiḥ /
dhāvantībhiś ca vāsrābhir udho-bhāraiḥ sva-vatsakān

itas tato vilaṅghadbhir go-vatsair maṇḍitaṃ sitaiḥ /
go-doha-śabdābhiravaṃ veṇūnāṃ niḥsvanena ca

gāyantībhiś ca karmāṇi śubhāni bala-kṛṣṇayoḥ /
sv-alaṅkṛtābhir gopībhir gopaiś ca su-virājitam

agny-arkātithi-go-vipra- pitṛ-devārcanānvitaiḥ /
dhūpa-dīpaiś ca mālyaiś ca gopāvāsair mano-ramam

sarvataḥ puṣpita-vanaṃ dvijāli-kula-nāditam /
haṃsa-kāraṇḍavākīrṇaiḥ padma-ṣaṇḍaiś ca maṇḍitam

tam āgataṃ samāgamya kṛṣṇasyānucaraṃ priyam /
nandaḥ prītaḥ pariṣvajya vāsudeva-dhiyārcayat

bhojitaṃ paramānnena saṃviṣṭaṃ kaśipau sukham /
gata-śramaṃ paryapṛcchat pāda-saṃvāhanādibhiḥ

kaccid aṅga mahā-bhāga sakhā naḥ śūra-nandanaḥ /
āste kuśaly apatyādyair yukto muktaḥ suhṛd-vrataḥ

diṣṭyā kaṃso hataḥ pāpaḥ sānugaḥ svena pāpmanā /
sādhūnāṃ dharma-śīlānāṃ yadūnāṃ dveṣṭi yaḥ sadā

api smarati naḥ kṛṣṇo mātaraṃ suhṛdaḥ sakhīn /
gopān vrajaṃ cātma-nāthaṃ gāvo vṛndāvanaṃ girim

apy āyāsyati govindaḥ sva-janān sakṛd īkṣitum /
tarhi drakṣyāma tad-vaktraṃ su-nasaṃ su-smitekṣaṇam

dāvāgner vāta-varṣāc ca vṛṣa-sarpāc ca rakṣitāḥ /
duratyayebhyo mṛtyubhyaḥ kṛṣṇena su-mahātmanā

smaratāṃ kṛṣṇa-vīryāṇi līlāpāṅga-nirīkṣitam /
hasitaṃ bhāṣitaṃ cāṅga sarvā naḥ śithilāḥ kriyāḥ

saric-chaila-vanoddeśān mukunda-pada-bhūṣitān /
ākrīḍān īkṣyamāṇānāṃ mano yāti tad-ātmatām

manye kṛṣṇaṃ ca rāmaṃ ca prāptāv iha surottamau /
surāṇāṃ mahad-arthāya gargasya vacanaṃ yathā

kaṃsaṃ nāgāyuta-prāṇaṃ mallau gaja-patiṃ yathā /
avadhiṣṭāṃ līlayaiva paśūn iva mṛgādhipaḥ

tāla-trayaṃ mahā-sāraṃ dhanur yaṣṭim ivebha-rāṭ /
babhañjaikena hastena saptāham adadhād girim

pralambo dhenuko 'riṣṭas tṛṇāvarto bakādayaḥ /
daityāḥ surāsura-jito hatā yeneha līlayā

BhP_10.46.027/0 śrī-śuka uvāca
iti saṃsmṛtya saṃsmṛtya nandaḥ kṛṣṇānurakta-dhīḥ /
aty-utkaṇṭho 'bhavat tūṣṇīṃ prema-prasara-vihvalaḥ

yaśodā varṇyamānāni putrasya caritāni ca /
śṛṇvanty aśrūṇy avāsrākṣīt sneha-snuta-payodharā

tayor itthaṃ bhagavati kṛṣṇe nanda-yaśodayoḥ /
vīkṣyānurāgaṃ paramaṃ nandam āhoddhavo mudā

BhP_10.46.030/0 śrī-uddhava uvāca
yuvāṃ ślāghyatamau nūnaṃ dehinām iha māna-da /
nārāyaṇe 'khila-gurau yat kṛtā matir īdṛśī

etau hi viśvasya ca bīja-yonī rāmo mukundaḥ puruṣaḥ pradhānam /
anvīya bhūteṣu vilakṣaṇasya jñānasya ceśāta imau purāṇau

yasmin janaḥ prāṇa-viyoga-kāle kṣanaṃ samāveśya mano 'viśuddham /
nirhṛtya karmāśayam āśu yāti parāṃ gatiṃ brahma-mayo 'rka-varṇaḥ

tasmin bhavantāv akhilātma-hetau nārāyaṇe kāraṇa-martya-mūrtau /
bhāvaṃ vidhattāṃ nitarāṃ mahātman kiṃ vāvaśiṣṭaṃ yuvayoḥ su-kṛtyam

āgamiṣyaty adīrgheṇa kālena vrajam acyutaḥ /
priyaṃ vidhāsyate pitror bhagavān sātvatāṃ patiḥ

hatvā kaṃsaṃ raṅga-madhye pratīpaṃ sarva-sātvatām /
yad āha vaḥ samāgatya kṛṣṇaḥ satyaṃ karoti tat

mā khidyataṃ mahā-bhāgau drakṣyathaḥ kṛṣṇam antike /
antar hṛdi sa bhūtānām āste jyotir ivaidhasi

na hy asyāsti priyaḥ kaścin nāpriyo vāsty amāninaḥ /
nottamo nādhamo vāpi sa-mānasyāsamo 'pi vā

na mātā na pitā tasya na bhāryā na sutādayaḥ /
nātmīyo na paraś cāpi na deho janma eva ca

na cāsya karma vā loke sad-asan-miśra-yoniṣu /
krīḍārthaṃ so 'pi sādhūnāṃ paritrāṇāya kalpate

sattvaṃ rajas tama iti bhajate nirguṇo guṇān /
krīḍann atīto 'pi guṇaiḥ sṛjaty avan hanty ajaḥ

yathā bhramarikā-dṛṣṭyā bhrāmyatīva mahīyate /
citte kartari tatrātmā kartevāhaṃ-dhiyā smṛtaḥ

yuvayor eva naivāyam ātmajo bhagavān hariḥ /
sarveṣām ātmajo hy ātmā pitā mātā sa īśvaraḥ

dṛṣṭaṃ śrutaṃ bhūta-bhavad-bhaviṣyat $ sthāsnuś cariṣṇur mahad alpakaṃ ca &
vinācyutād vastu tarāṃ na vācyaṃ % sa eva sarvaṃ paramātma-bhūtaḥ // BhP_10.46.043* //
evaṃ niśā sā bruvator vyatītā nandasya kṛṣṇānucarasya rājan /
gopyaḥ samutthāya nirūpya dīpān vāstūn samabhyarcya daudhīny amanthun

tā dīpa-dīptair maṇibhir virejū rajjūr vikarṣad-bhuja-kaṅkaṇa-srajaḥ /
calan-nitamba-stana-hāra-kuṇḍala- tviṣat-kapolāruṇa-kuṅkumānanāḥ

udgāyatīnām aravinda-locanaṃ vrajāṅganānāṃ divam aspṛśad dhvaniḥ /
dadhnaś ca nirmanthana-śabda-miśrito nirasyate yena diśām amaṅgalam

bhagavaty udite sūrye nanda-dvāri vrajaukasaḥ /
dṛṣṭvā rathaṃ śātakaumbhaṃ kasyāyam iti cābruvan

akrūra āgataḥ kiṃ vā yaḥ kaṃsasyārtha-sādhakaḥ /
yena nīto madhu-purīṃ kṛṣṇaḥ kamala-locanaḥ

kiṃ sādhayiṣyaty asmābhir bhartuḥ prītasya niṣkṛtim /
tataḥ strīṇāṃ vadantīnām uddhavo 'gāt kṛtāhnikaḥ