Bhagavata Purana · Chapter 10.28

BhP_10.28.001/0 śrī-bādarāyaṇir uvāca
ekādaśyāṃ nirāhāraḥ samabhyarcya janārdanam /
snātuṃ nandas tu kālindyāṃ dvādaśyāṃ jalam āviśat

taṃ gṛhītvānayad bhṛtyo varuṇasyāsuro 'ntikam /
avajñāyāsurīṃ velāṃ praviṣṭam udakaṃ niśi

cukruśus tam apaśyantaḥ kṛṣṇa rāmeti gopakāḥ /
bhagavāṃs tad upaśrutya pitaraṃ varuṇāhṛtam /
tad-antikaṃ gato rājan svānām abhaya-do vibhuḥ

prāptaṃ vīkṣya hṛṣīkeśaṃ loka-pālaḥ saparyayā /
mahatyā pūjayitvāha tad-darśana-mahotsavaḥ

BhP_10.28.005/0 śrī-varuṇa uvāca
adya me nibhṛto deho 'dyaivārtho 'dhigataḥ prabho /
tvat-pāda-bhājo bhagavann avāpuḥ pāram adhvanaḥ

namas tubhyaṃ bhagavate brahmaṇe paramātmane /
na yatra śrūyate māyā loka-sṛṣṭi-vikalpanā

ajānatā māmakena mūḍhenākārya-vedinā /
ānīto 'yaṃ tava pitā tad bhavān kṣantum arhati

mamāpy anugrahaṃ kṛṣṇa kartum arhasy aśeṣa-dṛk /
govinda nīyatām eṣa pitā te pitṛ-vatsala

BhP_10.28.009/0 śrī-śuka uvāca
evaṃ prasāditaḥ kṛṣṇo bhagavān īśvareśvaraḥ /
ādāyāgāt sva-pitaraṃ bandhūnāṃ cāvahan mudam

nandas tv atīndriyaṃ dṛṣṭvā loka-pāla-mahodayam /
kṛṣṇe ca sannatiṃ teṣāṃ jñātibhyo vismito 'bravīt

te cautsukya-dhiyo rājan matvā gopās tam īśvaram /
api naḥ sva-gatiṃ sūkṣmām upādhāsyad adhīśvaraḥ

iti svānāṃ sa bhagavān vijñāyākhila-dṛk svayam /
saṅkalpa-siddhaye teṣāṃ kṛpayaitad acintayat

jano vai loka etasminn avidyā-kāma-karmabhiḥ /
uccāvacāsu gatiṣu na veda svāṃ gatiṃ bhraman

iti sañcintya bhagavān mahā-kāruṇiko hariḥ /
darśayām āsa lokaṃ svaṃ gopānāṃ tamasaḥ param

satyaṃ jñānam anantaṃ yad brahma-jyotiḥ sanātanam /
yad dhi paśyanti munayo guṇāpāye samāhitāḥ

te tu brahma-hradam nītā magnāḥ kṛṣṇena coddhṛtāḥ /
dadṛśur brahmaṇo lokaṃ yatrākrūro 'dhyagāt purā

nandādayas tu taṃ dṛṣṭvā paramānanda-nivṛtāḥ /
kṛṣṇaṃ ca tatra cchandobhiḥ stūyamānaṃ su-vismitāḥ