Bhagavata Purana · Chapter 10.27

deve varṣati yajña-viplava-ruṣā vajrāsma-varṣānilaiḥ $ sīdat-pāla-paśu-striy ātma-śaraṇaṃ dṛṣṭvānukampy utsmayan &
utpāṭyaika-kareṇa śailam abalo līlocchilīndhraṃ yathā % bibhrad goṣṭham apān mahendra-mada-bhit prīyān na indro gavām // BhP_10.26.025*
0 śrī-śuka uvāca
govardhane dhṛte śaile āsārād rakṣite vraje /
go-lokād āvrajat kṛṣṇaṃ surabhiḥ śakra eva ca

vivikta upasaṅgamya vrīḍītaḥ kṛta-helanaḥ /
pasparśa pādayor enaṃ kirīṭenārka-varcasā

dṛṣṭa-śrutānubhāvo 'sya kṛṣṇasyāmita-tejasaḥ /
naṣṭa-tri-lokeśa-mada idam āha kṛtāñjaliḥ

BhP_10.27.004/0 indra uvāca
viśuddha-sattvaṃ tava dhāma śāntaṃ tapo-mayaṃ dhvasta-rajas-tamaskam /
māyā-mayo 'yaṃ guṇa-sampravāho na vidyate te grahaṇānubandhaḥ

kuto nu tad-dhetava īśa tat-kṛtā lobhādayo ye 'budha-linga-bhāvāḥ /
tathāpi daṇḍaṃ bhagavān bibharti dharmasya guptyai khala-nigrahāya

pitā gurus tvaṃ jagatām adhīśo duratyayaḥ kāla upātta-daṇḍaḥ /
hitāya cecchā-tanubhiḥ samīhase mānaṃ vidhunvan jagad-īśa-māninām

ye mad-vidhājñā jagad-īśa-māninas tvāṃ vīkṣya kāle 'bhayam āśu tan-madam /
hitvārya-mārgaṃ prabhajanty apasmayā īhā khalānām api te 'nuśāsanam

sa tvaṃ mamaiśvarya-mada-plutasya kṛtāgasas te 'viduṣaḥ prabhāvam /
kṣantuṃ prabho 'thārhasi mūḍha-cetaso maivaṃ punar bhūn matir īśa me 'satī

tavāvatāro 'yam adhokṣajeha bhuvo bharāṇām uru-bhāra-janmanām /
camū-patīnām abhavāya deva bhavāya yuṣmac-caraṇānuvartinām

namas tubhyaṃ bhagavate puruṣāya mahātmane /
vāsudevāya kṛṣṇāya sātvatāṃ pataye namaḥ

svacchandopātta-dehāya viśuddha-jñāna-mūrtaye /
sarvasmai sarva-bījāya sarva-bhūtātmane namaḥ

mayedaṃ bhagavan goṣṭha- nāśāyāsāra-vāyubhiḥ /
ceṣṭitaṃ vihate yajñe māninā tīvra-manyunā

tvayeśānugṛhīto 'smi dhvasta-stambho vṛthodyamaḥ /
īśvaraṃ gurum ātmānaṃ tvām ahaṃ śaraṇaṃ gataḥ

BhP_10.27.014/0 śrī-śuka uvāca
evaṃ saṅkīrtitaḥ kṛṣṇo maghonā bhagavān amum /
megha-gambhīrayā vācā prahasann idam abravīt

BhP_10.27.015/0 śrī-bhagavān uvāca
mayā te 'kāri maghavan makha-bhaṅgo 'nugṛhṇatā /
mad-anusmṛtaye nityaṃ mattasyendra-śriyā bhṛśam

mām aiśvarya-śrī-madāndho daṇḍa pāṇiṃ na paśyati /
taṃ bhraṃśayāmi sampadbhyo yasya cecchāmy anugraham

gamyatāṃ śakra bhadraṃ vaḥ kriyatāṃ me 'nuśāsanam /
sthīyatāṃ svādhikāreṣu yuktair vaḥ stambha-varjitaiḥ

athāha surabhiḥ kṛṣṇam abhivandya manasvinī /
sva-santānair upāmantrya gopa-rūpiṇam īśvaram

BhP_10.27.019/0 surabhir uvāca
kṛṣṇa kṛṣṇa mahā-yogin viśvātman viśva-sambhava /
bhavatā loka-nāthena sa-nāthā vayam acyuta

tvaṃ naḥ paramakaṃ daivaṃ tvaṃ na indro jagat-pate /
bhavāya bhava go-vipra devānāṃ ye ca sādhavaḥ

indraṃ nas tvābhiṣekṣyāmo brahmaṇā coditā vayam /
avatīrṇo 'si viśvātman bhūmer bhārāpanuttaye

BhP_10.27.022/0 śṛī-śuka uvāca
evaṃ kṛṣṇam upāmantrya surabhiḥ payasātmanaḥ /
jalair ākāśa-gaṅgāyā airāvata-karoddhṛtaiḥ

indraḥ surarṣibhiḥ sākaṃ codito deva-mātṛbhiḥ /
abhyasiñcata dāśārhaṃ govinda iti cābhyadhāt

tatrāgatās tumburu-nāradādayo gandharva-vidyādhara-siddha-cāraṇāḥ /
jagur yaśo loka-malāpahaṃ hareḥ surāṅganāḥ sannanṛtur mudānvitāḥ

taṃ tuṣṭuvur deva-nikāya-ketavo hy avākiraṃś cādbhuta-puṣpa-vṛṣṭibhiḥ /
lokāḥ parāṃ nirvṛtim āpnuvaṃs trayo gāvas tadā gām anayan payo-drutām

nānā-rasaughāḥ sarito vṛkṣā āsan madhu-sravāḥ /
akṛṣṭa-pacyauṣadhayo girayo 'bibhran un maṇīn

kṛṣṇe 'bhiṣikta etāni sarvāṇi kuru-nandana /
nirvairāṇy abhavaṃs tāta krūrāṇy api nisargataḥ

iti go-gokula-patiṃ govindam abhiṣicya saḥ /
anujñāto yayau śakro vṛto devādibhir divam