Bhagavata Purana · Chapter 10.26

BhP_10.26.001/0 śrī-śuka uvāca
evaṃ-vidhāni karmāṇi gopāḥ kṛṣṇasya vīkṣya te /
atad-vīrya-vidaḥ procuḥ samabhyetya su-vismitāḥ

bālakasya yad etāni karmāṇy aty-adbhutāni vai /
katham arhaty asau janma grāmyeṣv ātma-jugupsitam

yaḥ sapta-hāyano bālaḥ kareṇaikena līlayā /
kathaṃ bibhrad giri-varaṃ puṣkaraṃ gaja-rāḍ iva

tokenāmīlitākṣeṇa pūtanāyā mahaujasaḥ /
pītaḥ stanaḥ saha prāṇaiḥ kāleneva vayas tanoḥ

hinvato 'dhaḥ śayānasya māsyasya caraṇāv udak /
ano 'patad viparyastaṃ rudataḥ prapadāhatam

eka-hāyana āsīno hriyamāṇo vihāyasā /
daityena yas tṛṇāvartam ahan kaṇṭha-grahāturam

kvacid dhaiyaṅgava-stainye mātrā baddha udūkhale /
gacchann arjunayor madhye bāhubhyāṃ tāv apātayat

vane sañcārayan vatsān sa-rāmo bālakair vṛtaḥ /
hantu-kāmaṃ bakaṃ dorbhyāṃ mukhato 'rim apāṭayat

vatseṣu vatsa-rūpeṇa praviśantaṃ jighāṃsayā /
hatvā nyapātayat tena kapitthāni ca līlayā

hatvā rāsabha-daiteyaṃ tad-bandhūṃś ca balānvitaḥ /
cakre tāla-vanaṃ kṣemaṃ paripakva-phalānvitam

pralambaṃ ghātayitvograṃ balena bala-śālinā /
amocayad vraja-paśūn gopāṃś cāraṇya-vahnitaḥ

āśī-viṣatamāhīndraṃ damitvā vimadaṃ hradāt /
prasahyodvāsya yamunāṃ cakre 'sau nirviṣodakām

dustyajaś cānurāgo 'smin sarveṣāṃ no vrajaukasām /
nanda te tanaye 'smāsu tasyāpy autpattikaḥ katham

kva sapta-hāyano bālaḥ kva mahādri-vidhāraṇam /
tato no jāyate śaṅkā vraja-nātha tavātmaje

BhP_10.26.015/0 śrī-nanda uvāca
śrūyatāṃ me vaco gopā vyetu śaṅkā ca vo 'rbhake /
enam kumāram uddiśya gargo me yad uvāca ha

varṇās trayaḥ kilāsyāsan gṛhṇato 'nu-yugaṃ tanūḥ /
śuklo raktas tathā pīta idānīṃ kṛṣṇatāṃ gataḥ

prāgayaṃ vasudevasya kvacij jātas tavātmajaḥ /
vāsudeva iti śrīmān abhijñāḥ sampracakṣate

bahūni santi nāmāni rūpāṇi ca sutasya te /
guṇa -karmānurūpāṇi tāny ahaṃ veda no janāḥ

eṣa vaḥ śreya ādhāsyad gopa-gokula-nandanaḥ /
anena sarva-durgāṇi yūyam añjas tariṣyatha

purānena vraja-pate sādhavo dasyu-pīḍitāḥ /
arājake rakṣyamāṇā jigyur dasyūn samedhitāḥ

ya etasmin mahā-bhāge prītiṃ kurvanti mānavāḥ /
nārayo 'bhibhavanty etān viṣṇu-pakṣān ivāsurāḥ

tasmān nanda kumāro 'yaṃ nārāyaṇa-samo guṇaiḥ /
śriyā kīrtyānubhāvena tat-karmasu na vismayaḥ

ity addhā māṃ samādiśya garge ca sva-gṛhaṃ gate /
manye nārāyaṇasyāṃśaṃ kṛṣṇam akliṣṭa-kāriṇam

iti nanda-vacaḥ śrutvā garga-gītaṃ taṃ vrajaukasaḥ /
muditā nandam ānarcuḥ kṛṣṇaṃ ca gata-vismayāḥ