Bhagavata Purana · Chapter 10.25

BhP_10.25.001/0 śrī-śuka uvāca
indras tadātmanaḥ pūjāṃ vijñāya vihatāṃ nṛpa /
gopebhyaḥ kṛṣṇa-nāthebhyo nandādibhyaś cukopa ha

gaṇaṃ sāṃvartakaṃ nāma meghānāṃ cānta-kārīṇām /
indraḥ pracodayat kruddho vākyaṃ cāheśa-māny uta

aho śrī-mada-māhātmyaṃ gopānāṃ kānanaukasām /
kṛṣṇaṃ martyam upāśritya ye cakrur deva-helanam

yathādṛḍhaiḥ karma-mayaiḥ kratubhir nāma-nau-nibhaiḥ /
vidyām ānvīkṣikīṃ hitvā titīrṣanti bhavārṇavam

vācālaṃ bāliśaṃ stabdham ajñaṃ paṇḍita-māninam /
kṛṣṇaṃ martyam upāśritya gopā me cakrur apriyam

eṣāṃ śriyāvaliptānāṃ kṛṣṇenādhmāpitātmanām /
dhunuta śrī-mada-stambhaṃ paśūn nayata saṅkṣayam

ahaṃ cairāvataṃ nāgam āruhyānuvraje vrajam /
marud-gaṇair mahā-vegair nanda-goṣṭha-jighāṃsayā

BhP_10.25.008/0 śrī-śuka uvāca
itthaṃ maghavatājñaptā meghā nirmukta-bandhanāḥ /
nanda-gokulam āsāraiḥ pīḍayām āsur ojasā

vidyotamānā vidyudbhiḥ stanantaḥ stanayitnubhiḥ /
tīvrair marud-gaṇair nunnā vavṛṣur jala-śarkarāḥ

sthūṇā-sthūlā varṣa-dhārā muñcatsv abhreṣv abhīkṣṇaśaḥ /
jalaughaiḥ plāvyamānā bhūr nādṛśyata natonnatam

aty-āsārāti-vātena paśavo jāta-vepanāḥ /
gopā gopyaś ca śītārtā govindaṃ śaraṇaṃ yayuḥ

śiraḥ sutāṃś ca kāyena pracchādyāsāra-pīḍitāḥ /
vepamānā bhagavataḥ pāda-mūlam upāyayuḥ

kṛṣṇa kṛṣṇa mahā-bhāga tvan-nāthaṃ gokulaṃ prabho /
trātum arhasi devān naḥ kupitād bhakta-vatsala

śilā-varṣāti-vātena hanyamānam acetanam /
nirīkṣya bhagavān mene kupitendra-kṛtaṃ hariḥ

apartv aty-ulbaṇaṃ varṣam ati-vātaṃ śilā-mayam /
sva-yāge vihate 'smābhir indro nāśāya varṣati

tatra pratividhiṃ samyag ātma-yogena sādhaye /
lokeśa-mānināṃ mauḍhyād dhaniṣye śrī-madaṃ tamaḥ

na hi sad-bhāva-yuktānāṃ surāṇām īśa-vismayaḥ /
matto 'satāṃ māna-bhaṅgaḥ praśamāyopakalpate

tasmān mac-charaṇaṃ goṣṭhaṃ man-nāthaṃ mat-parigraham /
gopāye svātma-yogena so 'yaṃ me vrata āhitaḥ

ity uktvaikena hastena kṛtvā govardhanācalam /
dadhāra līlayā viṣṇuś chatrākam iva bālakaḥ

athāha bhagavān gopān he 'mba tāta vrajaukasaḥ /
yathopajoṣaṃ viśata giri-gartaṃ sa-go-dhanāḥ

na trāsa iha vaḥ kāryo mad-dhastādri-nipātanāt /
vāta-varṣa-bhayenālaṃ tat-trāṇaṃ vihitaṃ hi vaḥ

tathā nirviviśur gartaṃ kṛṣṇāśvāsita-mānasaḥ /
yathāvakāśaṃ sa-dhanāḥ sa-vrajāḥ sopajīvinaḥ

kṣut-tṛḍ-vyathāṃ sukhāpekṣāṃ hitvā tair vraja-vāsibhiḥ /
vīkṣyamāṇo dadhārādriṃ saptāhaṃ nācalat padāt

kṛṣṇa-yogānubhāvaṃ taṃ niśamyendro 'ti-vismitaḥ /
nistambho bhraṣṭa-saṅkalpaḥ svān meghān sannyavārayat

khaṃ vyabhram uditādityaṃ vāta-varṣaṃ ca dāruṇam /
niśamyoparataṃ gopān govardhana-dharo 'bravīt

niryāta tyajata trāsaṃ gopāḥ sa-strī-dhanārbhakāḥ /
upārataṃ vāta-varṣaṃ vyuda-prāyāś ca nimnagāḥ

tatas te niryayur gopāḥ svaṃ svam ādāya go-dhanam /
śakaṭoḍhopakaraṇaṃ strī-bāla-sthavirāḥ śanaiḥ

bhagavān api taṃ śailaṃ sva-sthāne pūrva-vat prabhuḥ /
paśyatāṃ sarva-bhūtānāṃ sthāpayām āsa līlayā

taṃ prema-vegān nirbhṛtā vrajaukaso $ yathā samīyuḥ parirambhaṇādibhiḥ &
gopyaś ca sa-sneham apūjayan mudā % dadhy-akṣatādbhir yuyujuḥ sad-āśiṣaḥ // BhP_10.25.029* //
yaśodā rohiṇī nando rāmaś ca balināṃ varaḥ /
kṛṣṇam āliṅgya yuyujur āśiṣaḥ sneha-kātarāḥ

divi deva-gaṇāḥ siddhāḥ sādhyā gandharva-cāraṇāḥ /
tuṣṭuvur mumucus tuṣṭāḥ puṣpa-varṣāṇi pārthiva

śaṅkha-dundubhayo nedur divi deva-pracoditāḥ /
jagur gandharva-patayas tumburu-pramukhā nṛpa

tato 'nuraktaiḥ paśupaiḥ pariśrito rājan sva-goṣṭhaṃ sa-balo 'vrajad dhariḥ /
tathā-vidhāny asya kṛtāni gopikā gāyantya īyur muditā hṛdi-spṛśaḥ