Bhagavata Purana · Chapter 10.19

BhP_10.19.001/0 śrī-śuka uvāca
krīḍāsakteṣu gopeṣu tad-gāvo dūra-cāriṇīḥ /
svairaṃ carantyo viviśus tṛṇa-lobhena gahvaram

ajā gāvo mahiṣyaś ca nirviśantyo vanād vanam /
īṣīkāṭavīṃ nirviviśuḥ krandantyo dāva-tarṣitāḥ

te 'paśyantaḥ paśūn gopāḥ kṛṣṇa-rāmādayas tadā /
jātānutāpā na vidur vicinvanto gavāṃ gatim

tṛṇais tat-khura-dac-chinnair goṣ-padair aṅkitair gavām /
mārgam anvagaman sarve naṣṭājīvyā vicetasaḥ

muñjāṭavyāṃ bhraṣṭa-mārgaṃ krandamānaṃ sva-godhanam /
samprāpya tṛṣitāḥ śrāntās tatas te sannyavartayan

tā āhūtā bhagavatā megha-gambhīrayā girā /
sva-nāmnāṃ ninadaṃ śrutvā pratineduḥ praharṣitāḥ

tataḥ samantād dava-dhūmaketur yadṛcchayābhūt kṣaya-kṛd vanaukasām /
samīritaḥ sārathinolbaṇolmukair vilelihānaḥ sthira-jaṅgamān mahān

tam āpatantaṃ parito davāgniṃ gopāś ca gāvaḥ prasamīkṣya bhītāḥ /
ūcuś ca kṛṣṇaṃ sa-balaṃ prapannā yathā hariṃ mṛtyu-bhayārditā janāḥ

kṛṣṇa kṛṣṇa mahā-vīra he rāmāmogha vikrama /
dāvāgninā dahyamānān prapannāṃs trātum arhathaḥ

nūnaṃ tvad-bāndhavāḥ kṛṣṇa na cārhanty avasāditum /
vayaṃ hi sarva-dharma-jña tvan-nāthās tvat-parāyaṇāḥ

BhP_10.19.011/0 śrī-śuka uvāca
vaco niśamya kṛpaṇaṃ bandhūnāṃ bhagavān hariḥ /
nimīlayata mā bhaiṣṭa locanānīty abhāṣata

tatheti mīlitākṣeṣu bhagavān agnim ulbaṇam /
pītvā mukhena tān kṛcchrād yogādhīśo vyamocayat

tataś ca te 'kṣīṇy unmīlya punar bhāṇḍīram āpitāḥ /
niśamya vismitā āsann ātmānaṃ gāś ca mocitāḥ

kṛṣṇasya yoga-vīryaṃ tad yoga-māyānubhāvitam /
dāvāgner ātmanaḥ kṣemaṃ vīkṣya te menire 'maram

gāḥ sannivartya sāyāhne saha-rāmo janārdanaḥ /
veṇuṃ viraṇayan goṣṭham agād gopair abhiṣṭutaḥ

gopīnāṃ paramānanda āsīd govinda-darśane /
kṣaṇaṃ yuga-śatam iva yāsāṃ yena vinābhavat