Bhagavata Purana · Chapter 10.20

BhP_10.20.001/0 śrī-śuka uvāca
tayos tad adbhutaṃ karma dāvāgner mokṣam ātmanaḥ /
gopāḥ strībhyaḥ samācakhyuḥ pralamba-vadham eva ca

gopa-vṛddhāś ca gopyaś ca tad upākarṇya vismitāḥ /
menire deva-pravarau kṛṣṇa-rāmau vrajaṃ gatau

tataḥ prāvartata prāvṛṭ sarva-sattva-samudbhavā /
vidyotamāna-paridhir visphūrjita-nabhas-talā

sāndra-nīlāmbudair vyoma sa-vidyut-stanayitnubhiḥ /
aspaṣṭa-jyotir ācchannaṃ brahmeva sa-guṇaṃ babhau

aṣṭau māsān nipītaṃ yad bhūmyāś coda-mayaṃ vasu /
sva-gobhir moktum ārebhe parjanyaḥ kāla āgate

taḍidvanto mahā-meghāś caṇḍa -śvasana -vepitāḥ /
prīṇanaṃ jīvanaṃ hy asya mumucuḥ karuṇā iva

tapaḥ-kṛśā deva-mīḍhā āsīd varṣīyasī mahī /
yathaiva kāmya-tapasas tanuḥ samprāpya tat-phalam

niśā-mukheṣu khadyotās tamasā bhānti na grahāḥ /
yathā pāpena pāṣaṇḍā na hi vedāḥ kalau yuge

śrutvā parjanya-ninadaṃ maṇḍukāḥ sasṛjur giraḥ /
tūṣṇīṃ śayānāḥ prāg yadvad brāhmaṇā niyamātyaye

āsann utpatha-gāminyaḥ kṣudra-nadyo 'nuśuṣyatīḥ /
puṃso yathāsvatantrasya deha-draviṇa -sampadaḥ

haritā haribhiḥ śaṣpair indragopaiś ca lohitā /
ucchilīndhra-kṛta-cchāyā nṛṇāṃ śrīr iva bhūr abhūt

kṣetrāṇi śaṣya-sampadbhiḥ karṣakāṇāṃ mudaṃ daduḥ /
māninām anutāpaṃ vai daivādhīnam ajānatām

jala-sthalaukasaḥ sarve nava-vāri-niṣevayā /
abibhran ruciraṃ rūpaṃ yathā hari-niṣevayā

saridbhiḥ saṅgataḥ sindhuś cukṣobha śvasanormimān /
apakva-yoginaś cittaṃ kāmāktaṃ guṇa-yug yathā

girayo varṣa-dhārābhir hanyamānā na vivyathuḥ /
abhibhūyamānā vyasanair yathādhokṣaja-cetasaḥ

mārgā babhūvuḥ sandigdhās tṛṇaiś channā hy asaṃskṛtāḥ /
nābhyasyamānāḥ śrutayo dvijaiḥ kālena cāhatāḥ

loka-bandhuṣu megheṣu vidyutaś cala-sauhṛdāḥ /
sthairyaṃ na cakruḥ kāminyaḥ puruṣeṣu guṇiṣv iva

dhanur viyati māhendraṃ nirguṇaṃ ca guṇiny abhāt /
vyakte guṇa-vyatikare 'guṇavān puruṣo yathā

na rarājoḍupaś channaḥ sva-jyotsnā-rājitair ghanaiḥ /
ahaṃ-matyā bhāsitayā sva-bhāsā puruṣo yathā

meghāgamotsavā hṛṣṭāḥ pratyanandañ chikhaṇḍinaḥ /
gṛheṣu tapta-nirviṇṇā yathācyuta-janāgame

pītvāpaḥ pādapāḥ padbhir āsan nānātma-mūrtayaḥ /
prāk kṣāmās tapasā śrāntā yathā kāmānusevayā

saraḥsv aśānta-rodhaḥsu nyūṣur aṅgāpi sārasāḥ /
gṛheṣv aśānta-kṛtyeṣu grāmyā iva durāśayāḥ

jalaughair nirabhidyanta setavo varṣatīśvare /
pāṣaṇḍinām asad-vādair veda-mārgāḥ kalau yathā

vyamuñcan vāyubhir nunnā bhūtebhyaś cāmṛtaṃ ghanāḥ /
yathāśiṣo viś-patayaḥ kāle kāle dvijeritāḥ

evaṃ vanaṃ tad varṣiṣṭhaṃ pakva-kharjura-jambumat /
go-gopālair vṛto rantuṃ sa-balaḥ prāviśad dhariḥ

dhenavo manda-gāminya ūdho-bhāreṇa bhūyasā /
yayur bhagavatāhūtā drutaṃ prītyā snuta-stanāḥ

vanaukasaḥ pramuditā vana-rājīr madhu-cyutaḥ /
jala-dhārā girer nādād āsannā dadṛśe guhāḥ

kvacid vanaspati-kroḍe guhāyāṃ cābhivarṣati /
nirviśya bhagavān reme kanda-mūla-phalāśanaḥ

dadhy-odanaṃ samānītaṃ śilāyāṃ salilāntike /
sambhojanīyair bubhuje gopaiḥ saṅkarṣaṇānvitaḥ

śādvalopari saṃviśya carvato mīlitekṣaṇān /
tṛptān vṛṣān vatsatarān gāś ca svodho-bhara-śramāḥ

prāvṛṭ-śriyaṃ ca tāṃ vīkṣya sarva-kāla-sukhāvahām /
bhagavān pūjayāṃ cakre ātma-śakty-upabṛṃhitām

evaṃ nivasatos tasmin rāma-keśavayor vraje /
śarat samabhavad vyabhrā svacchāmbv-aparuṣānilā

śaradā nīrajotpattyā nīrāṇi prakṛtiṃ yayuḥ /
bhraṣṭānām iva cetāṃsi punar yoga-niṣevayā

vyomno 'bbhraṃ bhūta-śābalyaṃ bhuvaḥ paṅkam apāṃ malam /
śaraj jahārāśramiṇāṃ kṛṣṇe bhaktir yathāśubham

sarva-svaṃ jaladā hitvā virejuḥ śubhra-varcasaḥ /
yathā tyaktaiṣaṇāḥ śāntā munayo mukta-kilbiṣāḥ

girayo mumucus toyaṃ kvacin na mumucuḥ śivam /
yathā jñānāmṛtaṃ kāle jñānino dadate na vā

naivāvidan kṣīyamāṇaṃ jalaṃ gādha-jale-carāḥ /
yathāyur anv-ahaṃ kṣayyaṃ narā mūḍhāḥ kuṭumbinaḥ

gādha-vāri-carās tāpam avindañ charad-arka-jam /
yathā daridraḥ kṛpaṇaḥ kuṭumby avijitendriyaḥ

śanaiḥ śanair jahuḥ paṅkaṃ sthalāny āmaṃ ca vīrudhaḥ /
yathāhaṃ-mamatāṃ dhīrāḥ śarīrādiṣv anātmasu

niścalāmbur abhūt tūṣṇīṃ samudraḥ śarad-āgame /
ātmany uparate samyaṅ munir vyuparatāgamaḥ

kedārebhyas tv apo 'gṛhṇan karṣakā dṛḍha-setubhiḥ /
yathā prāṇaiḥ sravaj jñānaṃ tan-nirodhena yoginaḥ

śarad-arkāṃśu-jāṃs tāpān bhūtānām uḍupo 'harat /
dehābhimāna-jaṃ bodho mukundo vraja-yoṣitām

kham aśobhata nirmeghaṃ śarad-vimala-tārakam /
sattva-yuktaṃ yathā cittaṃ śabda-brahmārtha-darśanam

akhaṇḍa-maṇḍalo vyomni rarājoḍu-gaṇaiḥ śaśī /
yathā yadu-patiḥ kṛṣṇo vṛṣṇi-cakrāvṛto bhuvi

āśliṣya sama-śītoṣṇaṃ prasūna-vana-mārutam /
janās tāpaṃ jahur gopyo na kṛṣṇa-hṛta-cetasaḥ

gāvo mṛgāḥ khagā nāryaḥ puṣpiṇyaḥ śaradābhavan /
anvīyamānāḥ sva-vṛṣaiḥ phalair īśa-kriyā iva

udahṛṣyan vārijāni sūryotthāne kumud vinā /
rājñā tu nirbhayā lokā yathā dasyūn vinā nṛpa

pura-grāmeṣv āgrayaṇair indriyaiś ca mahotsavaiḥ /
babhau bhūḥ pakva-śaṣyāḍhyā kalābhyāṃ nitarāṃ hareḥ

vaṇiṅ-muni-nṛpa-snātā nirgamyārthān prapedire /
varṣa-ruddhā yathā siddhāḥ sva-piṇḍān kāla āgate