Bhagavata Purana · Chapter 10.18

BhP_10.18.001/0 śrī-śuka uvāca
atha kṛṣṇaḥ parivṛto jñātibhir muditātmabhiḥ /
anugīyamāno nyaviśad vrajaṃ gokula-maṇḍitam

vraje vikrīḍator evaṃ gopāla-cchadma-māyayā /
grīṣmo nāmartur abhavan nāti-preyāñ charīriṇām

sa ca vṛndāvana-guṇair vasanta iva lakṣitaḥ /
yatrāste bhagavān sākṣād rāmeṇa saha keśavaḥ

yatra nirjhara-nirhrāda- nivṛtta-svana-jhillikam /
śaśvat tac-chīkararjīṣa- druma-maṇḍala-maṇḍitam

sarit-saraḥ-prasravaṇormi-vāyunā kahlāra-kañjotpala-reṇu-hāriṇā /
na vidyate yatra vanaukasāṃ davo nidāgha-vahny-arka-bhavo 'ti-śādvale

agādha-toya-hradinī-taṭormibhir dravat-purīṣyāḥ pulinaiḥ samantataḥ /
na yatra caṇḍāṃśu-karā viṣolbaṇā bhuvo rasaṃ śādvalitaṃ ca gṛhṇate

vanaṃ kusumitaṃ śrīman nadac-citra-mṛga-dvijam /
gāyan mayūra-bhramaraṃ kūjat-kokila-sārasam

krīḍiṣyamāṇas tat krṣṇo bhagavān bala-saṃyutaḥ /
veṇuṃ viraṇayan gopair go-dhanaiḥ saṃvṛto 'viśat

pravāla-barha-stabaka- srag-dhātu-kṛta-bhūṣaṇāḥ /
rāma-kṛṣṇādayo gopā nanṛtur yuyudhur jaguḥ

kṛṣṇasya nṛtyataḥ kecij jaguḥ kecid avādayan /
veṇu-pāṇitalaiḥ śṛṅgaiḥ praśaśaṃsur athāpare

gopa-jāti-praticchannā devā gopāla-rūpiṇau /
īḍire kṛṣṇa-rāmau ca naṭā iva naṭaṃ nṛpa

bhramaṇair laṅghanaiḥ kṣepair āsphoṭana-vikarṣaṇaiḥ /
cikrīḍatur niyuddhena kāka-pakṣa-dharau kvacit

kvacin nṛtyatsu cānyeṣu gāyakau vādakau svayam /
śaśaṃsatur mahā-rāja sādhu sādhv iti vādinau

kvacid bilvaiḥ kvacit kumbhaiḥ kvacāmalaka-muṣṭibhiḥ /
aspṛśya-netra-bandhādyaiḥ kvacin mṛga-khagehayā

kvacic ca dardura-plāvair vividhair upahāsakaiḥ /
kadācit syandolikayā karhicin nṛpa-ceṣṭayā

evaṃ tau loka-siddhābhiḥ krīḍābhiś ceratur vane /
nady-adri-droṇi-kuñjeṣu kānaneṣu saraḥsu ca

paśūṃś cārayator gopais tad-vane rāma-kṛṣṇayoḥ /
gopa-rūpī pralambo 'gād asuras taj-jihīrṣayā

taṃ vidvān api dāśārho bhagavān sarva-darśanaḥ /
anvamodata tat-sakhyaṃ vadhaṃ tasya vicintayan

tatropāhūya gopālān kṛṣṇaḥ prāha vihāra-vit /
he gopā vihariṣyāmo dvandvī-bhūya yathā-yatham

tatra cakruḥ parivṛḍhau gopā rāma-janārdanau /
kṛṣṇa-saṅghaṭṭinaḥ kecid āsan rāmasya cāpare

ācerur vividhāḥ krīḍā vāhya-vāhaka-lakṣaṇāḥ /
yatrārohanti jetāro vahanti ca parājitāḥ

vahanto vāhyamānāś ca cārayantaś ca go-dhanam /
bhāṇḍīrakaṃ nāma vaṭaṃ jagmuḥ kṛṣṇa-purogamāḥ

rāma-saṅghaṭṭino yarhi śrīdāma-vṛṣabhādayaḥ /
krīḍāyāṃ jayinas tāṃs tān ūhuḥ kṛṣṇādayo nṛpa

uvāha kṛṣṇo bhagavān śrīdāmānaṃ parājitaḥ /
vṛṣabhaṃ bhadrasenas tu pralambo rohiṇī-sutam

aviṣahyaṃ manyamānaḥ kṛṣṇaṃ dānava-puṅgavaḥ /
vahan drutataraṃ prāgād avarohaṇataḥ param

tam udvahan dharaṇi-dharendra-gauravaṃ $ mahāsuro vigata-rayo nijaṃ vapuḥ &
sa āsthitaḥ puraṭa-paricchado babhau % taḍid-dyumān uḍupati-vāḍ ivāmbudaḥ // BhP_10.18.026* //
nirīkṣya tad-vapur alam ambare carat $ pradīpta-dṛg bhru-kuṭi-taṭogra-daṃṣṭrakam &
nirīkṣya tad-vapur alam ambare carat $ pradīpta-dṛg bhru-kuṭi-taṭogra-daṃṣṭrakam &
jvalac-chikhaṃ kaṭaka-kirīṭa-kuṇḍala- % tviṣādbhutaṃ haladhara īṣad atrasat // BhP_10.18.027* //
athāgata-smṛtir abhayo ripuṃ balo vihāya sārtham iva harantam ātmanaḥ /
ruṣāhanac chirasi dṛḍhena muṣṭinā surādhipo girim iva vajra-raṃhasā

sa āhataḥ sapadi viśīrṇa-mastako mukhād vaman rudhiram apasmṛto 'suraḥ /
mahā-ravaṃ vyasur apatat samīrayan girir yathā maghavata āyudhāhataḥ

dṛṣṭvā pralambaṃ nihataṃ balena bala-śālinā /
gopāḥ su-vismitā āsan sādhu sādhv iti vādinaḥ

āśiṣo 'bhigṛṇantas taṃ praśaśaṃsus tad-arhaṇam /
pretyāgatam ivāliṅgya prema-vihvala-cetasaḥ

pāpe pralambe nihate devāḥ parama-nirvṛtāḥ /
abhyavarṣan balaṃ mālyaiḥ śaśaṃsuḥ sādhu sādhv iti