Bhagavata Purana · Chapter 10.17

BhP_10.17.001/0 śrī-rājovāca
nāgālayaṃ ramaṇakaṃ kathaṃ tatyāja kāliyaḥ /
kṛtaṃ kiṃ vā suparṇasya tenaikenāsamañjasam

BhP_10.17.002/0 śrī-śuka uvāca
upahāryaiḥ sarpa-janair māsi māsīha yo baliḥ /
vānaspatyo mahā-bāho nāgānāṃ prāṅ-nirūpitaḥ

svaṃ svaṃ bhāgaṃ prayacchanti nāgāḥ parvaṇi parvaṇi /
gopīthāyātmanaḥ sarve suparṇāya mahātmane

viṣa-vīrya-madāviṣṭaḥ kādraveyas tu kāliyaḥ /
kadarthī-kṛtya garuḍaṃ svayaṃ taṃ bubhuje balim

tac chrutvā kupito rājan bhagavān bhagavat-priyaḥ /
vijighāṃsur mahā-vegaḥ kāliyaṃ samapādravat

tam āpatantaṃ tarasā viṣāyudhaḥ pratyabhyayād utthita-naika-mastakaḥ /
dadbhiḥ suparṇaṃ vyadaśad dad-āyudhaḥ karāla-jihrocchvasitogra-locanaḥ

taṃ tārkṣya-putraḥ sa nirasya manyumān $ pracaṇḍa-vego madhusūdanāsanaḥ &
pakṣeṇa savyena hiraṇya-rociṣā % jaghāna kadru-sutam ugra-vikramaḥ // BhP_10.17.007* //
suparṇa-pakṣābhihataḥ kāliyo 'tīva vihvalaḥ /
hradaṃ viveśa kālindyās tad-agamyaṃ durāsadam

tatraikadā jala-caraṃ garuḍo bhakṣyam īpsitam /
nivāritaḥ saubhariṇā prasahya kṣudhito 'harat

mīnān su-duḥkhitān dṛṣṭvā dīnān mīna-patau hate /
kṛpayā saubhariḥ prāha tatratya-kṣemam ācaran

atra praviśya garuḍo yadi matsyān sa khādati /
sadyaḥ prāṇair viyujyeta satyam etad bravīmy aham

tat kāliyaḥ paraṃ veda nānyaḥ kaścana lelihaḥ /
avātsīd garuḍād bhītaḥ kṛṣṇena ca vivāsitaḥ

kṛṣṇaṃ hradād viniṣkrāntaṃ divya-srag-gandha-vāsasam /
mahā-maṇi-gaṇākīrṇaṃ jāmbūnada-pariṣkṛtam

upalabhyotthitāḥ sarve labdha-prāṇā ivāsavaḥ /
pramoda-nibhṛtātmāno gopāḥ prītyābhirebhire

yaśodā rohiṇī nando gopyo gopāś ca kaurava /
kṛṣṇaṃ sametya labdhehā āsan śuṣkā nagā api

rāmaś cācyutam āliṅgya jahāsāsyānubhāva-vit /
premṇā tam aṅkam āropya punaḥ punar udaikṣata /
gāvo vṛṣā vatsataryo lebhire paramāṃ mudam

nandaṃ viprāḥ samāgatya guravaḥ sa-kalatrakāḥ /
ūcus te kāliya-grasto diṣṭyā muktas tavātmajaḥ

dehi dānaṃ dvi-jātīnāṃ kṛṣṇa-nirmukti-hetave /
nandaḥ prīta-manā rājan gāḥ suvarṇaṃ tadādiśat

yaśodāpi mahā-bhāgā naṣṭa-labdha-prajā satī /
pariṣvajyāṅkam āropya mumocāśru-kalāṃ muhuḥ

tāṃ rātriṃ tatra rājendra kṣut-tṛḍbhyāṃ śrama-karṣitāḥ /
ūṣur vrayaukaso gāvaḥ kālindyā upakūlataḥ

tadā śuci-vanodbhūto dāvāgniḥ sarvato vrajam /
suptaṃ niśītha āvṛtya pradagdhum upacakrame

tata utthāya sambhrāntā dahyamānā vrajaukasaḥ /
kṛṣṇaṃ yayus te śaraṇaṃ māyā-manujam īśvaram

kṛṣṇa kṛṣṇa mahā-bhaga he rāmāmita-vikrama /
eṣa ghoratamo vahnis tāvakān grasate hi naḥ

su-dustarān naḥ svān pāhi kālāgneḥ suhṛdaḥ prabho /
na śaknumas tvac-caraṇaṃ santyaktum akuto-bhayam

itthaṃ sva-jana-vaiklavyaṃ nirīkṣya jagad-īśvaraḥ /
tam agnim apibat tīvram ananto 'nanta-śakti-dhṛk