Bhagavata Purana · Chapter 10.12

BhP_10.12.001/0 śrī-śuka uvāca
kvacid vanāśāya mano dadhad vrajāt prātaḥ samutthāya vayasya-vatsapān /
prabodhayañ chṛṅga-raveṇa cāruṇā vinirgato vatsa-puraḥsaro hariḥ

tenaiva sākaṃ pṛthukāḥ sahasraśaḥ snigdhāḥ suśig-vetra-viṣāṇa-veṇavaḥ /
svān svān sahasropari-saṅkhyayānvitān vatsān puraskṛtya viniryayur mudā

kṛṣṇa-vatsair asaṅkhyātair yūthī-kṛtya sva-vatsakān /
cārayanto 'rbha-līlābhir vijahrus tatra tatra ha

phala-prabāla-stavaka- sumanaḥ-piccha-dhātubhiḥ /
kāca-guñjā-maṇi-svarṇa- bhūṣitā apy abhūṣayan

muṣṇanto 'nyonya-śikyādīn jñātān ārāc ca cikṣipuḥ /
tatratyāś ca punar dūrād dhasantaś ca punar daduḥ

yadi dūraṃ gataḥ kṛṣṇo vana-śobhekṣaṇāya tam /
ahaṃ pūrvam ahaṃ pūrvam iti saṃspṛśya remire

kecid veṇūn vādayanto dhmāntaḥ śṛṅgāṇi kecana /
kecid bhṛṅgaiḥ pragāyantaḥ kūjantaḥ kokilaiḥ pare

vicchāyābhiḥ pradhāvanto gacchantaḥ sādhu-haṃsakaiḥ /
bakair upaviśantaś ca nṛtyantaś ca kalāpibhiḥ

vikarṣantaḥ kīśa-bālān ārohantaś ca tair drumān /
vikurvantaś ca taiḥ sākaṃ plavantaś ca palāśiṣu

sākaṃ bhekair vilaṅghantaḥ saritaḥ srava-samplutāḥ /
vihasantaḥ praticchāyāḥ śapantaś ca pratisvanān

itthaṃ satāṃ brahma-sukhānubhūtyā dāsyaṃ gatānāṃ para-daivatena /
māyāśritānāṃ nara-dārakeṇa sākaṃ vijahruḥ kṛta-puṇya-puñjāḥ

yat-pāda-pāṃsur bahu-janma-kṛcchrato $ dhṛtātmabhir yogibhir apy alabhyaḥ &
sa eva yad-dṛg-viṣayaḥ svayaṃ sthitaḥ % kiṃ varṇyate diṣṭam ato vrajaukasām // BhP_10.12.012* //
athāgha-nāmābhyapatan mahāsuras teṣāṃ sukha-krīḍana-vīkṣaṇākṣamaḥ /
nityaṃ yad-antar nija-jīvitepsubhiḥ pītāmṛtair apy amaraiḥ pratīkṣyate

dṛṣṭvārbhakān kṛṣṇa-mukhān aghāsuraḥ $ kaṃsānuśiṣṭaḥ sa bakī-bakānujaḥ &
ayaṃ tu me sodara-nāśa-kṛt tayor % dvayor mamainaṃ sa-balaṃ haniṣye // BhP_10.12.014* //
ete yadā mat-suhṛdos tilāpaḥ kṛtās tadā naṣṭa-samā vrajaukasaḥ /
prāṇe gate varṣmasu kā nu cintā prajāsavaḥ prāṇa-bhṛto hi ye te

iti vyavasyājagaraṃ bṛhad vapuḥ sa yojanāyāma-mahādri-pīvaram /
dhṛtvādbhutaṃ vyātta-guhānanaṃ tadā pathi vyaśeta grasanāśayā khalaḥ

dharādharoṣṭho jaladottaroṣṭho dary-ānanānto giri-śṛṅga-daṃṣṭraḥ /
dhvāntāntar-āsyo vitatādhva-jihvaḥ paruṣānila-śvāsa-davekṣaṇoṣṇaḥ

dṛṣṭvā taṃ tādṛśaṃ sarve matvā vṛndāvana-śriyam /
vyāttājagara-tuṇḍena hy utprekṣante sma līlayā

aho mitrāṇi gadata sattva-kūṭaṃ puraḥ sthitam /
asmat-saṅgrasana-vyātta- vyāla-tuṇḍāyate na vā

satyam arka-karāraktam uttarā-hanuvad ghanam /
adharā-hanuvad rodhas tat-praticchāyayāruṇam

pratispardhete sṛkkabhyāṃ savyāsavye nagodare /
tuṅga-śṛṅgālayo 'py etās tad-daṃṣṭrābhiś ca paśyata

āstṛtāyāma-mārgo 'yaṃ rasanāṃ pratigarjati /
eṣāṃ antar-gataṃ dhvāntam etad apy antar-ānanam

dāvoṣṇa-khara-vāto 'yaṃ śvāsavad bhāti paśyata /
tad-dagdha-sattva-durgandho 'py antar-āmiṣa-gandhavat

asmān kim atra grasitā niviṣṭān ayaṃ tathā ced bakavad vinaṅkṣyati /
kṣaṇād aneneti bakāry-uśan-mukhaṃ vīkṣyoddhasantaḥ kara-tāḍanair yayuḥ

itthaṃ mitho 'tathyam ataj-jña-bhāṣitaṃ $ śrutvā vicintyety amṛṣā mṛṣāyate &
rakṣo viditvākhila-bhūta-hṛt-sthitaḥ % svānāṃ niroddhuṃ bhagavān mano dadhe // BhP_10.12.025* //
tāvat praviṣṭās tv asurodarāntaraṃ paraṃ na gīrṇāḥ śiśavaḥ sa-vatsāḥ /
pratīkṣamāṇena bakāri-veśanaṃ hata-sva-kānta-smaraṇena rakṣasā

tān vīkṣya kṛṣṇaḥ sakalābhaya-prado $ hy ananya-nāthān sva-karād avacyutān &
dīnāṃś ca mṛtyor jaṭharāgni-ghāsān % ghṛṇārdito diṣṭa-kṛtena vismitaḥ // BhP_10.12.027* //
kṛtyaṃ kim atrāsya khalasya jīvanaṃ $ na vā amīṣāṃ ca satāṃ vihiṃsanam &
kṛtyaṃ kim atrāsya khalasya jīvanaṃ $ na vā amīṣāṃ ca satāṃ vihiṃsanam &
dvayaṃ kathaṃ syād iti saṃvicintya % jñātvāviśat tuṇḍam aśeṣa-dṛg ghariḥ // BhP_10.12.028* //
tadā ghana-cchadā devā bhayād dhā-heti cukruśuḥ /
jahṛṣur ye ca kaṃsādyāḥ kauṇapās tv agha-bāndhavāḥ

tac chrutvā bhagavān kṛṣṇas tv avyayaḥ sārbha-vatsakam /
cūrṇī-cikīrṣor ātmānaṃ tarasā vavṛdhe gale

tato 'tikāyasya niruddha-mārgiṇo hy udgīrṇa-dṛṣṭer bhramatas tv itas tataḥ /
pūrṇo 'ntar-aṅge pavano niruddho mūrdhan vinirbhidya vinirgato bahiḥ

tenaiva sarveṣu bahir gateṣu prāṇeṣu vatsān suhṛdaḥ paretān /
dṛṣṭyā svayotthāpya tad-anvitaḥ punar vaktrān mukundo bhagavān viniryayau

pīnāhi-bhogotthitam adbhutaṃ mahaj jyotiḥ sva-dhāmnā jvalayad diśo daśa /
pratīkṣya khe 'vasthitam īśa-nirgamaṃ viveśa tasmin miṣatāṃ divaukasām

tato 'tihṛṣṭāḥ sva-kṛto 'kṛtārhaṇaṃ $ puṣpaiḥ sugā apsarasaś ca nartanaiḥ &
gītaiḥ surā vādya-dharāś ca vādyakaiḥ % stavaiś ca viprā jaya-niḥsvanair gaṇāḥ // BhP_10.12.034* //
tad-adbhuta-stotra-suvādya-gītikā- jayādi-naikotsava-maṅgala-svanān /
śrutvā sva-dhāmno 'nty aja āgato 'cirād dṛṣṭvā mahīśasya jagāma vismayam

rājann ājagaraṃ carma śuṣkaṃ vṛndāvane 'dbhutam /
vrajaukasāṃ bahu-tithaṃ babhūvākrīḍa-gahvaram

etat kaumārajaṃ karma harer ātmāhi-mokṣaṇam /
mṛtyoḥ paugaṇḍake bālā dṛṣṭvocur vismitā vraje

naitad vicitraṃ manujārbha-māyinaḥ parāvarāṇāṃ paramasya vedhasaḥ /
agho 'pi yat-sparśana-dhauta-pātakaḥ prāpātma-sāmyaṃ tv asatāṃ sudurlabham

sakṛd yad-aṅga-pratimāntar-āhitā manomayī bhāgavatīṃ dadau gatim /
sa eva nityātma-sukhānubhūty-abhi- vyudasta-māyo 'ntar-gato hi kiṃ punaḥ

BhP_10.12.040/0 śrī-sūta uvāca
itthaṃ dvijā yādavadeva-dattaḥ śrutvā sva-rātuś caritaṃ vicitram /
papraccha bhūyo 'pi tad eva puṇyaṃ vaiyāsakiṃ yan nigṛhīta-cetāḥ

BhP_10.12.041/0 śrī-rājovāca
brahman kālāntara-kṛtaṃ tat-kālīnaṃ kathaṃ bhavet /
yat kaumāre hari-kṛtaṃ jaguḥ paugaṇḍake 'rbhakāḥ

tad brūhi me mahā-yogin paraṃ kautūhalaṃ guro /
nūnam etad dharer eva māyā bhavati nānyathā

vayaṃ dhanyatamā loke guro 'pi kṣatra-bandhavaḥ /
vayaṃ pibāmo muhus tvattaḥ puṇyaṃ kṛṣṇa-kathāmṛtam