Bhagavata Purana · Chapter 10.11

BhP_10.11.001/0 śrī-śuka uvāca
gopā nandādayaḥ śrutvā drumayoḥ patato ravam /
tatrājagmuḥ kuru-śreṣṭha nirghāta-bhaya-śaṅkitāḥ

bhūmyāṃ nipatitau tatra dadṛśur yamalārjunau /
babhramus tad avijñāya lakṣyaṃ patana-kāraṇam

ulūkhalaṃ vikarṣantaṃ dāmnā baddhaṃ ca bālakam /
kasyedaṃ kuta āścaryam utpāta iti kātarāḥ

bālā ūcur aneneti tiryag-gatam ulūkhalam /
vikarṣatā madhya-gena puruṣāv apy acakṣmahi

na te tad-uktaṃ jagṛhur na ghaṭeteti tasya tat /
bālasyotpāṭanaṃ tarvoḥ kecit sandigdha-cetasaḥ

ulūkhalaṃ vikarṣantaṃ dāmnā baddhaṃ svam ātmajam /
vilokya nandaḥ prahasad- vadano vimumoca ha

gopībhiḥ stobhito 'nṛtyad bhagavān bālavat kvacit /
udgāyati kvacin mugdhas tad-vaśo dāru-yantravat

bibharti kvacid ājñaptaḥ pīṭhakonmāna-pādukam /
bāhu-kṣepaṃ ca kurute svānāṃ ca prītim āvahan

darśayaṃs tad-vidāṃ loka ātmano bhṛtya-vaśyatām /
vrajasyovāha vai harṣaṃ bhagavān bāla-ceṣṭitaiḥ

krīṇīhi bhoḥ phalānīti śrutvā satvaram acyutaḥ /
phalārthī dhānyam ādāya yayau sarva-phala-pradaḥ

phala-vikrayiṇī tasya cyuta-dhānya-kara-dvayam /
phalair apūrayad ratnaiḥ phala-bhāṇḍam apūri ca

sarit-tīra-gataṃ kṛṣṇaṃ bhagnārjunam athāhvayat /
rāmaṃ ca rohiṇī devī krīḍantaṃ bālakair bhṛśam

nopeyātāṃ yadāhūtau krīḍā-saṅgena putrakau /
yaśodāṃ preṣayām āsa rohiṇī putra-vatsalām

krīḍantaṃ sā sutaṃ bālair ativelaṃ sahāgrajam /
yaśodājohavīt kṛṣṇaṃ putra-sneha-snuta-stanī

kṛṣṇa kṛṣṇāravindākṣa tāta ehi stanaṃ piba /
alaṃ vihāraiḥ kṣut-kṣāntaḥ krīḍā-śrānto 'si putraka

he rāmāgaccha tātāśu sānujaḥ kula-nandana /
prātar eva kṛtāhāras tad bhavān bhoktum arhati

pratīkṣate tvāṃ dāśārha bhokṣyamāṇo vrajādhipaḥ /
ehy āvayoḥ priyaṃ dhehi sva-gṛhān yāta bālakāḥ

dhūli-dhūsaritāṅgas tvaṃ putra majjanam āvaha /
janmarkṣaṃ te 'dya bhavati viprebhyo dehi gāḥ śuciḥ

paśya paśya vayasyāṃs te mātṛ-mṛṣṭān svalaṅkṛtān /
tvaṃ ca snātaḥ kṛtāhāro viharasva svalaṅkṛtaḥ

itthaṃ yaśodā tam aśeṣa-śekharaṃ matvā sutaṃ sneha-nibaddha-dhīr nṛpa /
haste gṛhītvā saha-rāmam acyutaṃ nītvā sva-vāṭaṃ kṛtavaty athodayam

BhP_10.11.021/0 śrī-śuka uvāca
gopa-vṛddhā mahotpātān anubhūya bṛhadvane /
nandādayaḥ samāgamya vraja-kāryam amantrayan

tatropānanda-nāmāha gopo jñāna-vayo-'dhikaḥ /
deśa-kālārtha-tattva-jñaḥ priya-kṛd rāma-kṛṣṇayoḥ

utthātavyam ito 'smābhir gokulasya hitaiṣibhiḥ /
āyānty atra mahotpātā bālānāṃ nāśa-hetavaḥ

muktaḥ kathañcid rākṣasyā bāla-ghnyā bālako hy asau /
harer anugrahān nūnam anaś copari nāpatat

cakra-vātena nīto 'yaṃ daityena vipadaṃ viyat /
śilāyāṃ patitas tatra paritrātaḥ sureśvaraiḥ

yan na mriyeta drumayor antaraṃ prāpya bālakaḥ /
asāv anyatamo vāpi tad apy acyuta-rakṣaṇam

yāvad autpātiko 'riṣṭo vrajaṃ nābhibhaved itaḥ /
tāvad bālān upādāya yāsyāmo 'nyatra sānugāḥ

vanaṃ vṛndāvanaṃ nāma paśavyaṃ nava-kānanam /
gopa-gopī-gavāṃ sevyaṃ puṇyādri-tṛṇa-vīrudham

tat tatrādyaiva yāsyāmaḥ śakaṭān yuṅkta mā ciram /
godhanāny agrato yāntu bhavatāṃ yadi rocate

tac chrutvaika-dhiyo gopāḥ sādhu sādhv iti vādinaḥ /
vrajān svān svān samāyujya yayū rūḍha-paricchadāḥ

vṛddhān bālān striyo rājan sarvopakaraṇāni ca /
anaḥsv āropya gopālā yattā ātta-śarāsanāḥ

godhanāni puraskṛtya śṛṅgāṇy āpūrya sarvataḥ /
tūrya-ghoṣeṇa mahatā yayuḥ saha-purohitāḥ

gopyo rūḍha-rathā nūtna- kuca-kuṅkuma-kāntayaḥ /
kṛṣṇa-līlā jaguḥ prītyā niṣka-kaṇṭhyaḥ suvāsasaḥ

tathā yaśodā-rohiṇyāv ekaṃ śakaṭam āsthite /
rejatuḥ kṛṣṇa-rāmābhyāṃ tat-kathā-śravaṇotsuke

vṛndāvanaṃ sampraviśya sarva-kāla-sukhāvaham /
tatra cakrur vrajāvāsaṃ śakaṭair ardha-candravat

vṛndāvanaṃ govardhanaṃ yamunā-pulināni ca /
vīkṣyāsīd uttamā prītī rāma-mādhavayor nṛpa

evaṃ vrajaukasāṃ prītiṃ yacchantau bāla-ceṣṭitaiḥ /
kala-vākyaiḥ sva-kālena vatsa-pālau babhūvatuḥ

avidūre vraja-bhuvaḥ saha gopāla-dārakaiḥ /
cārayām āsatur vatsān nānā-krīḍā-paricchadau

kvacid vādayato veṇuṃ kṣepaṇaiḥ kṣipataḥ kvacit /
kvacit pādaiḥ kiṅkiṇībhiḥ kvacit kṛtrima-go-vṛṣaiḥ

vṛṣāyamāṇau nardantau yuyudhāte parasparam /
anukṛtya rutair jantūṃś ceratuḥ prākṛtau yathā

kadācid yamunā-tīre vatsāṃś cārayatoḥ svakaiḥ /
vayasyaiḥ kṛṣṇa-balayor jighāṃsur daitya āgamat

taṃ vatsa-rūpiṇaṃ vīkṣya vatsa-yūtha-gataṃ hariḥ /
darśayan baladevāya śanair mugdha ivāsadat

gṛhītvāpara-pādābhyāṃ saha-lāṅgūlam acyutaḥ /
bhrāmayitvā kapitthāgre prāhiṇod gata-jīvitam /
sa kapitthair mahā-kāyaḥ pātyamānaiḥ papāta ha

taṃ vīkṣya vismitā bālāḥ śaśaṃsuḥ sādhu sādhv iti /
devāś ca parisantuṣṭā babhūvuḥ puṣpa-varṣiṇaḥ

tau vatsa-pālakau bhūtvā sarva-lokaika-pālakau /
saprātar-āśau go-vatsāṃś cārayantau viceratuḥ

svaṃ svaṃ vatsa-kulaṃ sarve pāyayiṣyanta ekadā /
gatvā jalāśayābhyāśaṃ pāyayitvā papur jalam

te tatra dadṛśur bālā mahā-sattvam avasthitam /
tatrasur vajra-nirbhinnaṃ gireḥ śṛṅgam iva cyutam

sa vai bako nāma mahān asuro baka-rūpa-dhṛk /
āgatya sahasā kṛṣṇaṃ tīkṣṇa-tuṇḍo 'grasad balī

kṛṣṇaṃ mahā-baka-grastaṃ dṛṣṭvā rāmādayo 'rbhakāḥ /
babhūvur indriyāṇīva vinā prāṇaṃ vicetasaḥ

taṃ tālu-mūlaṃ pradahantam agnivad gopāla-sūnuṃ pitaraṃ jagad-guroḥ /
caccharda sadyo 'tiruṣākṣataṃ bakas tuṇḍena hantuṃ punar abhyapadyata

tam āpatantaṃ sa nigṛhya tuṇḍayor dorbhyāṃ bakaṃ kaṃsa-sakhaṃ satāṃ patiḥ /
paśyatsu bāleṣu dadāra līlayā mudāvaho vīraṇavad divaukasām

tadā bakāriṃ sura-loka-vāsinaḥ samākiran nandana-mallikādibhiḥ /
samīḍire cānaka-śaṅkha-saṃstavais tad vīkṣya gopāla-sutā visismire

muktaṃ bakāsyād upalabhya bālakā rāmādayaḥ prāṇam ivendriyo gaṇaḥ /
sthānāgataṃ taṃ parirabhya nirvṛtāḥ praṇīya vatsān vrajam etya taj jaguḥ

śrutvā tad vismitā gopā gopyaś cātipriyādṛtāḥ /
pretyāgatam ivotsukyād aikṣanta tṛṣitekṣaṇāḥ

aho batāsya bālasya bahavo mṛtyavo 'bhavan /
apy āsīd vipriyaṃ teṣāṃ kṛtaṃ pūrvaṃ yato bhayam

athāpy abhibhavanty enaṃ naiva te ghora-darśanāḥ /
jighāṃsayainam āsādya naśyanty agnau pataṅgavat

aho brahma-vidāṃ vāco nāsatyāḥ santi karhicit /
gargo yad āha bhagavān anvabhāvi tathaiva tat

iti nandādayo gopāḥ kṛṣṇa-rāma-kathāṃ mudā /
kurvanto ramamāṇāś ca nāvindan bhava-vedanām

evaṃ vihāraiḥ kaumāraiḥ kaumāraṃ jahatur vraje /
nilāyanaiḥ setu-bandhair markaṭotplavanādibhiḥ