Bhagavata Purana · Chapter 10.10

BhP_10.10.001/0 śrī-rājovāca
kathyatāṃ bhagavann etat tayoḥ śāpasya kāraṇam /
yat tad vigarhitaṃ karma yena vā devarṣes tamaḥ

BhP_10.10.002/0 śrī-śuka uvāca
rudrasyānucarau bhūtvā sudṛptau dhanadātmajau /
kailāsopavane ramye mandākinyāṃ madotkaṭau

vāruṇīṃ madirāṃ pītvā madāghūrṇita-locanau /
strī-janair anugāyadbhiś ceratuḥ puṣpite vane

antaḥ praviśya gaṅgāyām ambhoja-vana-rājini /
cikrīḍatur yuvatibhir gajāv iva kareṇubhiḥ

yadṛcchayā ca devarṣir bhagavāṃs tatra kaurava /
apaśyan nārado devau kṣībāṇau samabudhyata

taṃ dṛṣṭvā vrīḍitā devyo vivastrāḥ śāpa-śaṅkitāḥ /
vāsāṃsi paryadhuḥ śīghraṃ vivastrau naiva guhyakau

tau dṛṣṭvā madirā-mattau śrī-madāndhau surātmajau /
tayor anugrahārthāya śāpaṃ dāsyann idaṃ jagau

BhP_10.10.008/0 śrī-nārada uvāca
na hy anyo juṣato joṣyān buddhi-bhraṃśo rajo-guṇaḥ /
śrī-madād ābhijātyādir yatra strī dyūtam āsavaḥ

hanyante paśavo yatra nirdayair ajitātmabhiḥ /
manyamānair imaṃ deham ajarāmṛtyu naśvaram

deva-saṃjñitam apy ante kṛmi-viḍ-bhasma-saṃjñitam /
bhūta-dhruk tat-kṛte svārthaṃ kiṃ veda nirayo yataḥ

dehaḥ kim anna-dātuḥ svaṃ niṣektur mātur eva ca /
mātuḥ pitur vā balinaḥ kretur agneḥ śuno 'pi vā

evaṃ sādhāraṇaṃ deham avyakta-prabhavāpyayam /
ko vidvān ātmasāt kṛtvā hanti jantūn ṛte 'sataḥ

asataḥ śrī-madāndhasya dāridryaṃ param añjanam /
ātmaupamyena bhūtāni daridraḥ param īkṣate

yathā kaṇṭaka-viddhāṅgo jantor necchati tāṃ vyathām /
jīva-sāmyaṃ gato liṅgair na tathāviddha-kaṇṭakaḥ

daridro nirahaṃ-stambho muktaḥ sarva-madair iha /
kṛcchraṃ yadṛcchayāpnoti tad dhi tasya paraṃ tapaḥ

nityaṃ kṣut-kṣāma-dehasya daridrasyānna-kāṅkṣiṇaḥ /
indriyāṇy anuśuṣyanti hiṃsāpi vinivartate

daridrasyaiva yujyante sādhavaḥ sama-darśinaḥ /
sadbhiḥ kṣiṇoti taṃ tarṣaṃ tata ārād viśuddhyati

sādhūnāṃ sama-cittānāṃ mukunda-caraṇaiṣiṇām /
upekṣyaiḥ kiṃ dhana-stambhair asadbhir asad-āśrayaiḥ

tad ahaṃ mattayor mādhvyā vāruṇyā śrī-madāndhayoḥ /
tamo-madaṃ hariṣyāmi straiṇayor ajitātmanoḥ

yad imau loka-pālasya putrau bhūtvā tamaḥ-plutau /
na vivāsasam ātmānaṃ vijānītaḥ sudurmadau

ato 'rhataḥ sthāvaratāṃ syātāṃ naivaṃ yathā punaḥ /
smṛtiḥ syān mat-prasādena tatrāpi mad-anugrahāt

vāsudevasya sānnidhyaṃ labdhvā divya-śarac-chate /
vṛtte svarlokatāṃ bhūyo labdha-bhaktī bhaviṣyataḥ

BhP_10.10.023/0 śrī-śuka uvāca
evam uktvā sa devarṣir gato nārāyaṇāśramam /
nalakūvara-maṇigrīvāv āsatur yamalārjunau

ṛṣer bhāgavata-mukhyasya satyaṃ kartuṃ vaco hariḥ /
jagāma śanakais tatra yatrāstāṃ yamalārjunau

devarṣir me priyatamo yad imau dhanadātmajau /
tat tathā sādhayiṣyāmi yad gītaṃ tan mahātmanā

ity antareṇārjunayoḥ kṛṣṇas tu yamayor yayau /
ātma-nirveśa-mātreṇa tiryag-gatam ulūkhalam

bālena niṣkarṣayatānvag ulūkhalaṃ tad $ dāmodareṇa tarasotkalitāṅghri-bandhau &
niṣpetatuḥ parama-vikramitātivepa- % skandha-pravāla-viṭapau kṛta-caṇḍa-śabdau // BhP_10.10.027* //
tatra śriyā paramayā kakubhaḥ sphurantau $ siddhāv upetya kujayor iva jāta-vedāḥ &
tatra śriyā paramayā kakubhaḥ sphurantau $ siddhāv upetya kujayor iva jāta-vedāḥ &
kṛṣṇaṃ praṇamya śirasākhila-loka-nāthaṃ % baddhāñjalī virajasāv idam ūcatuḥ sma // BhP_10.10.028* //
kṛṣṇa kṛṣṇa mahā-yogiṃs tvam ādyaḥ puruṣaḥ paraḥ /
vyaktāvyaktam idaṃ viśvaṃ rūpaṃ te brāhmaṇā viduḥ

tvam ekaḥ sarva-bhūtānāṃ dehāsv-ātmendriyeśvaraḥ /
tvam eva kālo bhagavān viṣṇur avyaya īśvaraḥ

tvaṃ mahān prakṛtiḥ sūkṣmā rajaḥ-sattva-tamomayī /
tvam eva puruṣo 'dhyakṣaḥ sarva-kṣetra-vikāra-vit

gṛhyamāṇais tvam agrāhyo vikāraiḥ prākṛtair guṇaiḥ /
ko nv ihārhati vijñātuṃ prāk siddhaṃ guṇa-saṃvṛtaḥ

tasmai tubhyaṃ bhagavate vāsudevāya vedhase /
ātma-dyota-guṇaiś channa- mahimne brahmaṇe namaḥ

yasyāvatārā jñāyante śarīreṣv aśarīriṇaḥ /
tais tair atulyātiśayair vīryair dehiṣv asaṅgataiḥ

sa bhavān sarva-lokasya bhavāya vibhavāya ca /
avatīrṇo 'ṃśa-bhāgena sāmprataṃ patir āśiṣām

namaḥ parama-kalyāṇa namaḥ parama-maṅgala /
vāsudevāya śāntāya yadūnāṃ pataye namaḥ

anujānīhi nau bhūmaṃs tavānucara-kiṅkarau /
darśanaṃ nau bhagavata ṛṣer āsīd anugrahāt

vāṇī guṇānukathane śravaṇau kathāyāṃ $ hastau ca karmasu manas tava pādayor naḥ &
smṛtyāṃ śiras tava nivāsa-jagat-praṇāme % dṛṣṭiḥ satāṃ darśane 'stu bhavat-tanūnām // BhP_10.10.038*
0 śrī-śuka uvāca
itthaṃ saṅkīrtitas tābhyāṃ bhagavān gokuleśvaraḥ /
dāmnā colūkhale baddhaḥ prahasann āha guhyakau

BhP_10.10.040/0 śrī-bhagavān uvāca
jñātaṃ mama puraivaitad ṛṣiṇā karuṇātmanā /
yac chrī-madāndhayor vāgbhir vibhraṃśo 'nugrahaḥ kṛtaḥ

sādhūnāṃ sama-cittānāṃ sutarāṃ mat-kṛtātmanām /
darśanān no bhaved bandhaḥ puṃso 'kṣṇoḥ savitur yathā

tad gacchataṃ mat-paramau nalakūvara sādanam /
sañjāto mayi bhāvo vām īpsitaḥ paramo 'bhavaḥ

BhP_10.10.043/0 śrī-śuka uvāca
ity uktau tau parikramya praṇamya ca punaḥ punaḥ /
baddholūkhalam āmantrya jagmatur diśam uttarām